Thượng úy Công an sir jos uô hâux lưv paz muôx luz nênhx shir phaz

Cơưv tiêr Học viện An ninh shông 2021, tror lok uô côngz xưv ntơưv Sơn La, Thượng úy Lê Cao Thiên tưz uô đhâu ntâu kror hâux lưv. Txơưv uô kror hâux lưv tưs, cux sir jos hlôngr yiêz, xar tơưv, uô tiêr tâu jông têx jênhv vưv tâu choz. Tưz tsik zos biên tập viên, MC phênhv “Ngaz tuk Sơn La” xưz, chor jiês muk uô côngz xưv ntơưv cxuô thax tsav qơư paz trâu Thiên muôx ntâu chênhz zênhv, txix co paz muôx tâu têx kror tsưr ziv uô yiêz hâur têx côngz xưv. Thượng úy Lê Cao Thiên hêik pâuz: “Cur tsik tâu cơưv đhâu hâux lưv tưs lok pov tsir hlo. Viv li têx hnuz xuz thơưx uô kror hâux lưv no mak cux cxơưx. Taz sik đros sir jos, tâu sơưr đơưk cxơưz cxiz, cur tưz sir jos hla đhâu têx phiv liv co. Đhâu chor jiês muk tsênhv tsênhz txos ntơưv têx qơư nhoz đêz, tox siêz, ntus đriv thiêx pov tâu pêx xênhv têx cêr txov tsuv muôx chor nênhs siêz jông đros paz. Viv li cur thiêz cxuô lênhx nênhs hâur CLB tưz txuôk đros chor nênhs siêz jông thiêz paz trâu lơưr cov luz nênhx tsik yuô txov nhêv”.

Txix têx tsênhv tsênhz co, tưz tsik zos uô tiêr jông têx hâux lưv mak tsênhv sir jos uô côngz xưv Đoàn thiêz phongz yaox hluôk nênhs. Đros zos Bí thư Chi đoàn Khối Cxiv tsa lưx lươngv, Thiên đros sơưr đơưk tưz txuôk đros, kriz uô ntâu huôx tôngv tsênhv tsênhz paz trâu cxuô thax tsav qơư. Txos nhiv no, tưz muôx 68 luz tsêr cơưv tâu cxiv tsa, 18 ntâu phòng tin học tâu muôz cxiv tsa puz trâu chor shux xênhz tox siêz, đros tas nro tsiv gri muôx 40 tiv đêiv ntâu. Thượng úy Lê Cao Thiên hêik pâuz: “Đros pêz, yênhx luz tsêr tâu cxiv tsa uô, yênhx luz tsêr cơưv tâu uô tiêr zos kror paz cxơưz cxiz trâu zuk shir phaz, thâuv zuk têx hâux lưv zâu co paz tâu trâu lơưr tsik yuô txov nhêv, phiv liv hâur luz nênhx. Thiêz cur pov đrâuv xar hôiv muôx lok six chôngz chor nênhs txơưx, lok six chôngz nênhs muôx siêz jông, lơưr uô tâu têx hâux lưv lox thiêz muôx tsiv gri. Lơưr chênhr zos chor nênhs chi cax chiê zuk sir jos cơư shâuv đuô chiê paz trâu sơưr đơưk nhoz tox siêz Sơn La muôx tâu luz nênhx shir phaz đuô”.

Têx hâux lưv uô tsênhv tsênhz, mak Thượng úy Lê Cao Thiên đros chor canr bôv, chiến sĩ hâur taz viv kriz uô tưz paz trâu pêx xênhv njênhs thiêz nhiêv txos chor chiến sĩ công an đuô. Đại úy Nguyễn Đình Anh – Tsar Ban Hluôk nênhs Công an tỉnh Sơn La hêik pâuz: “Thượng úy Lê Cao Thiên zos lênhx Bí thư chor hluôk nênhs, sir jos uô hâux lưv; kriz uô ntâu kror huôx tôngv tsênhv tsênhz, uô truôx jông taz viv li jênhv vưv chinhr triv. Đhâu co zaz zâuv chôngz lênhx hluôk nênhs đros uô. Tưz tsik zos sir jos cxiv tsa phongz yaox xưz, tsênhv sir jos kriê, paz trâu chor hluôk nênhs cơưv shâuv, gôngr côngv thiêz yênhx nênhs. Tsênhv tsênhz, chor dưv anr mak Thiên uô tưz muôx tâu tsiv gri lox, paz uô trâu chor chiến sĩ công an sưv jê đros pêx xênhv thiêz tâu pêx xênhv nhiêv thiêz njênhs njôngr”.

Thượng úy Lê Cao Thiên li sir jos xar tơưv, car xar, car uô cux tâu hâu nov taz viv sâu jênhv, ntâuz gri siêz. Thượng tá Đinh Đức Thiện – Phưv Trưởng phòng Côngz xưv chinhr triv, Công an tỉnh Sơn La puz pâuz: “Hâur qênhx shênhx uô côngz xưv, Lê Cao Thiên muôx ntâu sir jos nriêr pâuz, cơưv shâuv, sir zôngv khoa học công nghệ, hlôngr yiêz xar tơưv trâu côngz xưv yax kriê. Thiên cux tưz muôx ntâu xar tơưv jông thiêz tax tâu ntâu kror khoa học jông. Hâur côngz xưv đoàn thiêz phongz yaox hluôk nênhs, Thiên zos iz lênhx Bí thư lok six sir jos, tưz paz muôx tâu têx phongz yaox tsiv gri. Ntu zuôr txos, pêz vav tiêk Lê Cao Thiên zuôr tror phuôx huiz zuk têx hâux lưv, txux chi, đros tas nro phòng PX03 thiêz Đôiv yax kriê uô tâu ntâu tsaz yênhx jông tâu chor canr bôv, chiến sĩ thiêz pêx xênhv nhiêv txos hâur côngz xưv yax kriê paz uô tâu jông ngaz tuk sâuv thax tsav”.

Đros têx sir jos, txix shông 2022 txos nhiv no, Thiên tưz tâu têx cấp, têx nganhx khơưk muôz xar muôx 80 ntơưr kruôk. Hâur co jông tiv zix zos khơưk kruôk Chiến sĩ sik tưr tas nro lưx lươngv Công an shông 2025. Thiêz zuôr txos, Thiên zuôr zos lênhx nênhs nhoz Công an tỉnh Sơn La tâu khơưk muôz Giải Lý Tự Trọng shông 2025./.

CTV Trung Hiếu-Lik Thox cxêik nhênhv