Pox niêv Yên Châu (Sơn La) sir jos cov tsik yêiz pluôs

Niêv tix Cha Xênhv Muôk nhoz jok Na Lù, xar Phiêng Khoài, huyện Yên  Châu (Sơn La) ziv chuôz zis sir jos khưr uô liêx têz lok phênhv sâu cux tsik tâu ntâu luôx tưs; ntâu shông cux zos chuôz zis pluôs hâur jok, hâur xar.

Shông 2015, txix chor pênhr nhiêx kir txêik hâur Zênhx hangx tsênhv chêi xar hôv thiêz chuôz zis cxênhx tsês tâu, niêv tix tưz sir jos hlôngr yiêz đuô têx vax ar têz tsik jông chiê chos cxuô zav ntông nox txir muôx tsiv gri kinh têr siêz, huv đros đêx ar, qiv hơưv ntơưv thax tsav qơư. Txos nhiv no, chuôz zis li kror qơư uô nox đar muôx 1 héc ta ntâu tưz muôx 400 tsoz txir khơưz đuz, 100 tsoz txir lưv tsiz sôngz paz muôx tâu phênhv sâu truôx. Đuô li, niêv tix cux chos nzir tâux, poz cưk uô zav nox trâu tu zus muôx 30 ntâu tuk buô, yil, nhux đas sha mê nhuôv thiêz kêiz ol. Niêv tix Cha puz pâuz: txix chuôz zis li tsưr ziv uô nox, hâur 2 shông tror lok no, đhâu xav tas cxuô kror, niêv tix chuôz zis tưz sâu tâu liv muôx 200 triệu đêiv ntâu: “Thâuv ntêx no cur chuôz zis cux txov nhêv cơưs, luz nênhx tsuôk zos khov trâu chos poz cưk, hax zav txov nhêv đuô thâuv oz tuk mê nhuôv tâu xênhz zus. Pov tâu tu zus tsơưs mak phiv liv, ho sâu tsik tâu siêz, đros sir jos hla đhâu cêr pluôs, cur oz niêv xir tưz nriêr tsưr ziv uô nox yiêz chiê huôv tsar kinh têr cov luz nênhx hlôngr yiêz đuô”.

Đros pênhr nhiêx muôx 200 triệu đêiv tâu paz txix Tsaz yênhx “Paz huôv tsar uô nox, hlôngr yiêz đuô tsưr ziv uô nox trâu pox niêv pluôs” zos Hôiv pox niêv Việt Nam yưv pênhr kriz uô, shông 2019, Hôiv Liên hiệp pox niêv huyện Yên Châu tưz sik côngv đros Hôiv Liên hiệp pox niêv tỉnh Sơn La xêir tsov xar Tú Nang (Yên Châu) kriz uô tsưr ziv Tôv sik côngv tu zus nhux đas sha mê nhuôv. Lơưr co, iz lênhx nênhs hâur tôv tâu txêik 15 triệu đêiv tsik zuôr nhiêx liv chiê zuôr nhux đas nôngz. Chor nhiêx kir txêik co zuôr tâu phêiz thêv uô 3 jiês hâur 3 shông, iz jiês thêv 5 triệu đêiv. Cuiv zos Hôiv liên hiệp pox niêv xar sêiz car. Chor thành viên hâur tôv tâu choz zok khoa học kỹ thuật, hêik pâuz lok tsưr ziv tu zus chiê taz por cov chor nhux đas hloz lox huôv tsar jông… Zos iz hâur chor hôiv viên cxaz chuôz trâu Tôv sik côngv tu zus nhux đas sha mê nhuôv xar Tú Nang, niêv tix Hoàng Thị Tươi puz pâuz: “Chor pênhr no lok six muôx liv trâu chor pox niêv muôx luz nênhx txov nhêv li cur. Đros tsik zuôr nhiêx liv mak cur tưz zuôr nhux đas nôngz lok zus cov sha mê nhuôv chiê huôv tsar cov tâu muôx iz paz nhux đas”.

Hâur ntu muôz nhiêx txêik chiê huôv tsar kinh têr,  Hôiv Liên hiệp pox niêv Yên Châu cux tsik so tsov cưv txos chor chuôz zis pox niêv nhoz iz lênhs, pox niêv uô tsưr chuôz zis; hêik chor pox niêv sơưr đơưk cxaz chuôz xênhz huôx, uô ntâuz ntơưr txêik pênhr chiê huôv tsar uô nox…

Txos nhiv no, Hôiv tưz jênhv sơưr bê kir txêik nhiêx txix Zênhx hangx Kôngz nuv thiêz Huôv tsar jêx jok thiêz Zênhx hangx Tsênhv chêi xar hôiv chor nhiêx xar muôs 180 tiv đêiv, đros xar muôx 90 tôv cxênhx txuôs txêik pênhr, zaz zâuv muôx 2.500 ntâu hôiv viên cxaz chuôz. Đuô li, Hôiv cux sir jos kriz uô cxiv vênhv tôngv cxiv tsa “Tsêr sor siêz jông” trâu pox niêv pluôs, pox niêv txov nhêv lok tsêr nhoz, paz trâu chor hôiv viên truôx siêz huôv tsar uô nox. Pos Quàng Thị Hoa, Chủ tịch Hôiv Liên hiệp pox niêv Yên Châu (Sơn La) puz pâuz: txix hâur shôngk shông 2021 txos nhiv no, Hôiv tưz sik côngv đros chor nganhx cik txos thiêz Hôiv Liên hiệp pox niêv thênhv siêz paz kho đuô têx vax tsêr đaz tuôs lav nhoz trâu 5 lênhx hôiv viên pluôs, phêiz kênh têx cêr txov, paz trâu chor pox niêv co truô siêz sir jos huôv tsar uô nox cov luz nênhx hlôngr yiêz đuô: “Ntu zuôr txos, Hôiv Liên hiệp pox niêv huyện zuôr tror yax kriê, hêik sơưr đơưk paz trâu chor hôiv viên pox niêv cux li khov trâu cxuô cấp, cxuô nganhx cik txos li têx paz chiê paz trâu chor hôiv viên kho đuô têx tsêr đaz tuôs lav nhoz, paz uô tâu zênhx liv têx tsưr ziv đại hôiv têiv plor pox niêv huyện tưz tso tơưv, cux li uô lơưr Nghị quyết Đại hôiv Đảng bôv huyện Yên Châu li tsưr ziv lok kho đuô têx tsêr đaz tuôs lav nhoz”.

Chor pox niêv Yên Châu zuôr sir jos phuôx huiz đas jos, tsik nhoz tok khov trâu têx phênhv paz, sir jos uô cov tâu jông luôs hâux lưv “txo grêk yêiz pluôs” cov luz nênhx huôv tsar đuô./.

(Trấn Long-Lik Thox cxêik nhênhv)