Lò Văn Cường-Lênhx hluôk nênhs moz siêz lus xar tsưr ziv tsiv uô tâu ntâu zav meir, chuôz zênhx jông phưx vưv tsôngv px Sơn La uô kôngz

Heik txos chuôz zis luz meir ntâuk blêx mê, niêv lâuk Tòng Thị Hoa nhoz jok Hua Ít, thị trấn Ít Ong, huyện Mường La heik shir phaz hlo. Thâuv ntêx thâuv tsi tâu muôx luz meir no, 360 xưv phaz blêx liêx, niêv lâuk chuôz zis tsuv muôx 2-3 lênhs ntâuk têk, ntâuk yênhx tas hnuz thiêx tas, lok six phiv liv thiêz pôngz ntâu six hơưv, hnuz nhôngs.

Txix shông 2018, thâuv zuôr tâu luz meir ntâuk blêx no lok meir cê ntâuk, cê nzuôx, cê zax zos Lò Văn Cường xar tsưr ziv tsiv uô, lêis sâu ntâuk iz chiv blêx, chuôz zis tưz tsi ndo cxơưx, lok six zôngx ziv, viv tsuôk gra meir muk txos liêx, sâu cưr têx blêx lok tso trâu hâur meir xưz, đhâu ntơư muôz hnaz chus chor blêx jông, blêx pur tưz tsi muôx bluôs, uô khâuz li ntâuk têk. Chuôz zis iz cxênhz ntâu xưv phaz liêx lêis sâu, ntâuk nhos iz luz six hơưv tưz uô tas. Lar heik thiêz shir phaz đuô zos iz luz meir ntâuk blêx li no, muôs hâur ciêz đrôngs 20 tsov đeiv, taz sik chor meir mê ntâuk blêx zos Lò Văn Cường uô mak muôs 3,5 tsov đeiv xưz. Gri fênhx zis, zôngx ziv thâux gra muk lol, luz meir ntâuk blêx no 2, 3 shông tror lok nor tưz yênhx iz kro jông paz trâu niêv lâuk chuôz zis thiêz ntâu ziv chuôz zis px nhoz Ít Ong thâuv txos cheix blêx siêr:

“Thâuv zôngv luz meir no lok six zôngx ziv, viv meir ntâuk lol six sei thiêz tsi pôngz ntâu six hơưv nzuôx, zax têx bluôs, khâuz....., ntâuk tas txơưv zơưv tso trâu hâur hnaz, thâux lok tsêr xưz”.

Đros Lò Văn Cường muk seiz Cường qơư tsiv uô têx meir, tsênhz tiês zos chuôz zis qar tsêr kruô, pov muôx ntâu zav chuôz zênhx uz no tso chuôs tsi ntơưv têx. Cường heik: Đhâu thâuv cơưv tas ntơưr cxênhx 3, hlôngr viv tưr thik mul cơưv trâu têx tsêr cơưv Đại học, Cường tưz đas cir muk uô tuz lênhv công an. Shông 2016, Cường muk uô tuz lênhv tror lok, đros trâu siêz nhiêv xar tsiv uô têx meir uz no, thiêz seiz njiê pov tsôngv px hâur jok khưr uô liêx têz tir yar tir nas njuôr lok six txov nhêv, têx kôngz uô sâu tsi tâu nju, Cường tưz xar tsưr ziv tsiv uô cxuô zav meir phưx vưv uô kôngz, paz txo grêk tsơưs nhiêx txiêx, six hơưv, hnuz nhôngs thiêz côngk đas jos khưr uô liêx têz trâu px:

“Thâuv xuz thơưx uô, cur njiz trâul lok six ntâu phiv liv, tiv iz zos lok nhiêx txiêx, 2 zos nhiv kruôr uô viv li chuôz zis tsi yuô jông siêz, thôngx ziv, meir mak khênhr muôz hlê muk hlê lok, hlê tas ho tror đhok trâu, muôx meir yiêz zos trâul tsi jông cux tsuv muôz tso tsês, viv li njiz ntâu phiv liv cơưk thiêz tas ntâu nhiêx txiêx”.

Chiê muôx chuôz zênhx phưx vưv tsiv uô thiêz đhok têx meir, iz chas cxênhx txuôs nhiêx txiêx, Cường tưz kêr txeik tsêr nhiêx 100 tsov đeiv chiê zuôr têx meir hav, meir yâu, meir txiêr kuôr hlâu..... Đhâu iz ntuk sir jos zok nriêr, xar tsưr ziv uô, Cường tưz xar tơưv, tsiv uô tâu yênhx côngz ntâu zav chuôz zênhx jông li: Meir ntâuk blêx; meir phênhz têx txir khơưz; meir jov poz cưk, uô krâur trâu têx tsiêx cxu nox......

“Cxuô zav meir uz no hâur ciêz đrôngs tsi yuô fiv đros px nhoz no li luz nênhx tsênhv tsênhz hâur niêx hnuz, viv li cur xar tsưr ziv chiê tsiv uô, đhok têx meir li heik sâuv. Thâuv tsênhv xar tsưr ziv tsiv uô , đhok luz meir no, zuk tưz xar tâu tsưr ziv kho, hlôngr uô luz meir tov, viv li hâur six hơưv đhâu, cur tưz uô tâu lok six ntâu cxuô zav meir”.

Thôngz sâu 3 shông ntâu đhâu, Cường tưz muôs tâu 300 ntâu luz meir cxuô zav; iz luz meir puôr lênhx muôs tus gri fênhx zis đuô têx meir hâur ciêz đrôngs txix 5 tsov txos 10 tơưv tsov đeiv.

Car xar, car uô, uô ntêx nyuôs hâur cxuô luôs hâux lưv hâur ntu têz qơưk hlôngr yiêz, uô tâu têx xiv huv jông trâu côngv thôngx, Lò Văn Cường zos iz tsov iêr chi cax hâur chor hluôk nênhs Sơn La sir jos xar tơưv tsưr ziv jông huôv tsar tsiv uô têx chuôz zênhx, meir uz no phưx vưv luz nênhx, xênhz huôx, zos lênhx uô ntêx nyuôs hâur phôngz yaox “Hluôk nênhs xar tơưv txux chi tsưr ziv jông”./.