Lênhx hluôk nênhs Hmôngz tso tsês zuk kuz qơư nhoz, tso tsês tsi cơưv Đại học chiê khưr huôv tsar cêr uô nox

Lênhx hluôk Khang A Tủa

     Khang A Tủa tâu xênhz zus thiêz hloz lox ntơưv jos Háng Tầu Dê, xã Chế Cu Nha, huyện Mù Cang Chải, tỉnh Yên Bái. Tủa zos tul nhuôv hloz hâur iz chuôz zis muôx 5 cưr tix nuk muôs, chuôz zis luz nênhx tsuôk tos njôngr txos 2,3 jêk liêx.

          Sir jos hla đhâu cxuô phêv liv, cơưv tas cxênhx 1, cxênhx 2 thiêz cxênhx 3. Tủa mul cơưv ntơưv tsêr cơưv Việt Bắc tỉnh Thái Nguyên. Ntơưv tsêr cơưv no, Tủa tror tsâu siêz cơưv, iz chas zos shux xênhz cơưv ntơưr txơưx lớp 11 thiêz 12, shông cơưv lớp 11 Tủa tsênhv tâu 2 giải 4 hâur jiês thik uô xav fax sâuv meir tính nhoz tỉnh Thái Nguyên.

          Jiês thik xeir zuôr mul cơưv Đại học, Tủa thik tâu mul cơưv Tsêr cơưv ĐH Bách khoa Hà Nội (đros tas nto điểm thik zos 18,5 điểm) thiêz tsêr cơưv ĐH nông lâm Thái Nguyên (đros tas nro điểm thik zos 19,5 điểm).

          Đhâu co, txơưv tsênhv zos shux xênhz cơưv shông tiv 2 hâur tsêr cơưv ĐH Bách khoa Hà Nội, taz sik Khang A Tủa ho xeir tso tsês tsi cơưv đại học thiêz mak tsês six hơưv chiê uô zuk li siêz xar njôngr zos tuôr tsês tsôngv box Hmôngz li vênhx huôv jông.

          Tủa puz pâuz, Tủa tsênhv zos têx fôngx zưs uô têx dự án mak zuk xar njôngr txos. Nhiv no, Tủa zos lênhx nênhs sơưr thơưx hâur paz lênhx nênhs ADH, muôx 9 lênhx nênhs tsênhv, 20 lênhx txưv zênhv viên, puôr lênhx zos nênhs Hmôngz, tuôx cxôngx têx tỉnh tox siêz faz Bắc, cxôngx Điện Biên txos Hà Giang. Têx lênhx nênhs no muôx Hmôngz lênhs, Hmôngz đuz, Hmôngz suô, Hmôngz đơưz....

          Tủa heik, lơưr li qơư tsov txos zos sâu tsês tsôngv box Hmôngz nhoz Mù Cang Chải (Yên Bái), Sa Pa (Lào Cai), Đồng Văn (Hà Giang) li têx jax đaz nênhs hêik txos, heik tơưv sâuv têx kênh thôngz xor mông xã hội cux xưk li uô đĩa cxôngx lul Hmôngz trâu côngv thôngx.

          Tủa xar njôngr, no tâu seiz zos iz tsưr ziv chiê tuôr tsês têx vênhx huôv jông tiv zix, tâu ntâu lênhx mê nhuôs nhiêv txos chiê pox nhuôs tsôngv box Hmôngz pâuz tâu, jav tâu qênhx shênhx vênhx huôv Hmôngz tsênhv ziv hnuz ziv trâus pôngz plox. No cux zos tsưr ziv uô hâux lưv mak Tủa xeir tsov thiêz truôx siêz uô. Shông no, Khang A Tủa nhiv kruôr muôx 24 shông hnuz nhôngs thiêz zos iz hâur 54 lênhx shux xênhz xuz thơưx cơưv trâu tsêr cơưv ĐH Fulbright Việt Nam./.

(Tòng Anh BT-Txâur Vax cxeik nhênhv)