Cơưv shâuv Hloz Hôx chiê huôv tsar cêr siz hluz

          Tâu xênhz zưs thiêz hloz lox nhoz jos Nà Ản, xã Mường Lạn, huyện Sốp Cộp, iz thax tsav ntus đriv nhoz Tây Bắc txov nhêv, mê nhuôv nxeik phênhv ntâu tsi tâu mul cơưv ntơưr, tiv pox nhuôs tox siêz li siêz xar thâuv co zos li ntơư, mê nhuôv nxeik tsuv nhoz tsêr uô liêx têz thiêz mul zuôr txir. Viv li, Quyên tưz xar njôngr tâu mul cơưv ntơưr chiê uô cưk kriê ntơưr trâu têx mê nhuôs zâu hâur zuk luz jos. Viv li, Quyên tưz hla đhâu cxuô phêv liv chiê mul cơưv ntơưr. Shông 2002, thâuv cơưv tiêr cao đẳng sư phạm, Quyên uô ntêx nyuôk jênhv mul kriê ntơưr ntơưv tsêr cơưv cxênhx iz Mường Lạn, iz tsêr cơưv nhoz xã ntus đriv. Uô cưk kriê ntơưr trâu têx mê nhuôs hâur tsêr cơưv nhoz tox siêz thiêx li pov tâu shux xênhz nhoz no li têx phêv liv. Cheix ntux no, mê nhuôs shux xênhz tsuôk hnar luz yo nhiês mul tơư pliêz mul cơưv ntơưr, ntơưr sau, ntơưr cơưv tsi muôx cxuô. Viv li Quyên cê truôx siêz kriê ntơưr trâu têx mê nhuôs shux xênhz cov jông, cê hu grus têx lênhx nênhs siêz jông tuôx paz txưv têx mê nhuôs shux xênhz. Tas nro têx siêz xar no puôr lênhx zos uô lơưr Hloz Hôx li lul heik kriê:“Cơưv shâuv thiêz uô lơưr Hloz Hôx zos tsuv pâuz pheiz kênh, tsov cưv txos cxuô lênhx nênhs. Cur zos cưk kriê, cur lớp muôx iz lênhx shux xênhz njuôs zos Sy Xênhv Zax, thâuv cur muôz luz yo sor, luz hnaz ntơưr trâu Sy nưs tưz puôs ciês cur kuôx, cur nus viv li chas cox ho kuôx mak Sy heik kuôx viv no zos jiês xuz thơưx cur tâu hnar yo sor. Thâuv co cur tror ndo txos cur ntu thâuv tsênhv zâu, ưz 2 lênhx puôr lênhx kuôx, tas nro lớp cơưv puôr lênhx kuôx, viv li cur truôx siêz thor têx chuôz zênhx, tris yo cxôngx têx lênhx nênhs jông siêz chiê paz trâu têx mê nhuôs shux xênhz nhoz no”.

          Cxôngx shông 2008 txos shông 2012, txơưv uô côngz xưv coar lik, zos Phưv hiệu trưởng thiêz phưv phongx zaoz zux thiêz thox cxov huyện Sốp Cộp, cưk kriê Quyên cux moz siêz uô têx hâux lưv xã hội. Tsi taz paz max têx mê nhuôs shux xênhz muôx luz nênhx txov nhêv mak shông 2017 Quyên ho cxaz chuôz Câu lạc bộ jông siêz Sốp Cộp. Iz ciêz Câu lạc bộ gra  mor blâuv, cuô đik mul puz trâu têx nênhs moz pluôs nhoz tsêr kho moz Sốp Cộp 2 jiês, paz max têx mê nhuôs trâus moz gênhs zos chuôz zis pluôs, uô ntâuz ntơưr hlôngr tsêr kho moz, hu grus paz yêz thâux nênhs moz mul chơưv kho, paz nhiêx txiêx seiz njuôs thiêz kho moz, seiz nus têx chuôz zis muôx tsêr trâus cuz hnhiêz. Zuôr xar 20 shông uô côngz xưv jông siêz, Quyên muôx tâu ntâu chiv nhênhv lok six jông.

          Niêv lâuk tul txir uô bộ đội pênhz phax, tsi khênhr lol tsêr, iz lênhx tsoz phưz 2 lênhx mê nhuôs tsênhv zâu, taz sik Quyên thâuv tưs cux uô jông hâux lưv hâur tsêr cơưv, côngz xưv xã hội. Cưk kriê Quàng Văn Hồng, Hiệu trưởng tsêr cơưv phổ thôngz mênhx cxưx bán trú cxênhx 1 Mường Lạn, huyện Sốp Cộp, luz tsêr cơưv mak tưz tâu cưk kriê Quyên paz hu grus ntâu lênhx nênhs jông siêz paz max têx mê nhuôs shux xênhz pluôs nhoz tox siêz puz pâuz: “Hâur têx shôngk đhâu, đ/c Quyên lok six tsov cưv txos tsêr cơưv thiêz têx mê nhuôs shux xênhz muôx luz nênhx txov nhêv nhoz hâur tsêr cơưv. đ/c tưz paz hu grus têx lênhx nênhs siêz jông, têx tuêv siêz jông sâuv cxuô qơư paz max tsêr cơưv. Đ/c tsênhv paz hu grus lênhx nênhs paz cxiv tsêr nox mor trâu tsêr cơưv, thôngx cxix gôngr côngv tris yo, ntâuz ntơưr trâu têx mê nhuôs shux xênhz muôx luz nênhx txov nhêv hâur tsêr cơưv”.

          Sir jos hâur huôx tôngv chuyên môn, moz siêz đros têx huôx tôngv xã hội, jông siêz, Quyên tưz tâu Bộ zaoz zux thiêz thox cxov, UB huyện Sốp Cộp khơưk muôz ntâu ntơưr kruôk... Thâuv nus lok tsưr ziv hâur ntu zuôr txos Quyên pheiz kênh: Nhoz ntus đriv tox siêz tsênhv txov nhêv no, cur uô ndo njôngr uô lơưr Hloz Hôx li lul heik thâuv uô zuk li côngz xưv: “Cur zuôr đros câu lạc bộ siêz jông tror paz amx têx mê nhuôs trâus moz gênhs chuôz zis pluôs thiêz têx lênhx nênhs muôx luz nênhx txov nhev nhoz sâuv thax tsav huyện Sốp Cộp. Thâuv tưs muôx lênhx nênhs zuôr trâus tâu paz txưv mak cur zuôr đros têx lênhx nênhs hâur câu lạc bộ paz max chiê pheiz kênh tâu phênhv tưs lơưr li têx phêv liv hâur luz nênhx”.

          Cưk kriê Quyên li têx hâux lưv uô tsênhv tsênhz, muôx ziz njiêz co tsênhz tsênhz zos iz cêr uô nênhx jông lơưr Hloz Hôx li lul heik kriê./.

(Tuyết Lan- Txâur Vax cxeik nhênhv)