Quảng Ninh: Zơưv lênhx nênhs Cho 40 shông ntâu chos jôngr por vêv ar têz têz qơưk

          “ Hloz Hôx phuôx tôngv “ zis zis chos ntông”, cur nhoz no chos ntông lim, têx zav ntông tsiv grê, têx zav yuôx njuôz. Niêx shông cur mul muôz njuôs, shôngz, yuôr lim mak tsês chiê”.

          Zơưv Triệu Tài Cao cê heik cê chox pêz mul har jôngr seiz. Shông no zơưv tưz muôx 77 shông hnuz nhôngs, nhoz uô nênhx iz tiêv sâuv têz qơưk Bằng Cả, Tân Dân, reik đros têx har jôngr njuôz jông cxôngx pok thâuk tsênhv zâu.

          Thâuv ntêx, huyện Hoành Bồ zos iz têz qơưk muôx têx jôngr lim, têx ntông tsiv grê nto bê cxuô qơư. Taz sik pox nhuôs hlơưr têz chos poz cưk , chos kok ntông, muôx têx chuôz zis ho mul nhiês txiêr ntông....Pov jôngr ziv hnuz ziv tsơưs, lok six moz zơưv li siêz, cê truôx siêz tsi chiê tsôngv box txiêr har jôngr nhoz saz đrâuv tos tsêr, cê mul khơưk đoz têx tsêz ntông lim cxuô zav chox lol chos iz buôk ndis tsêr nhoz.

          Jâuv hâur hâur pâus tsoz ntông lim chos tâu zuôr xar 50 shông, zơưv thav, cxôngx têx shông 1968, zơưv tsoz phưz têx tsoz ntông no li zuk mê nhuôs. Muôx jiês tâu bo xeir uô Chủ nhiệm HTX jôngr nuv ntâu shông tsi so, yênhx tưv lok jôngr nuv tsi ntâu taz sik zơưv lok six gruôs cơưv shâuv, nriêr pâuz. Uô ntêx, ntông tuôx tsơưs, tov kaz no nôngz pôngz lol hâur ar, tror hlar tuôx viv li jôngr ziv hnuz ziv njuôz jông.

          Txos têx shông 80, têz qơưk muôx chuv trương choz ar trâu tsôngv box por vêv, chos jôngr. Lênhx tưs cux sik zâuv chos ntông keo chiê sâu liv, zơưv truôx siêz tuôr truôx mênhv chêx jôngr zuôr xar 30 hecta, pheiz trâu tuz nhuôs chos cxaz têx zav ntông txơưr:

          “ Choz jôngr mak pox nhuôs lênhx tưs cux tsi xar jênhv, viv tsi pâuz chos tul tsi. Taz sik cur tsi xar li ntơưv, muôx ar muôx ntux txơưv jông lơưv, cur jênhv, ziv ntâu ziv jông. Luôk têx tuôx nhiês txiêr ntông, khơưk kok...muôx têx tsoz mak tiv ntux nas, xoz tuô uô kâus thiêz”.

          Zơưv Cao xar tiêk, chos ntông tsi zos iz, oz hnuz, tsuv viv liv zix lêx ntêr tov kaz no mak uô. Nênhs nus zuôr, zơưv tsi muôs, muôx têx lênhx heik li uz li no taz sik zơưv tsi coangz xênhz txos. Muôx têx lênhx tsênhv hêv tiêk zuôr txiêr, ntor luôx...zơưv ho đros tuz nhuôs mul xor, mul seiz car por vêv. Zơưv ndo yênhx tsoz ntông muôx pêv har jôngr.

          Txos nhiv no, luz trôngz thâuv ntêx tưz njuôz jông đros têx tsoz ntông lim lox muôx nhos 2-4 đok, yênhx cxênhz tsoz dó bầu...zơưv cux tsês chiê tsi txiêr muôs chiê sâu liv. Zos lơưr grê niêv ciêz, zơưv muôs jôngr lim nhiv no cux tâu muôx nhos 6 tỷ đeiv:

          “ Tsôngv box heik zơưv chas zuôr tsês ntêr shông li ntơưv uô tul tsi. Cur heik, iz lênhx nênhs tiêv nênhx tsi ntêr, nox tâu hor ntâu. Cur nox hor ntâu mak cur uô hiêv jôngr bâuv co. Cxiv tâu tsêr, zuôr tâu yêz ô tô tsês ntêr cux zuôr liêv, ntông lim, ntông trầm hương tsês mak ziv hnuz ziv huôv jông. Txos yênhx puôk shông....Cur uô lơưr Hloz Hôx li lul heik kriê, cur xav tênhv chos trâu tov kaz no, trâu tuz nhuôs xưz”.

          Chox kruô mul luz tsêr nhoz buôk pêv har jôngr, zơưv Cao heik luz tsêr no muôx 5 qar tâu cxiv uô tưz tâu zuôr xar 50 shông. Zơưv heik, nhoz ntơưv no mul 2,3 truôv txơưv mul seiz jôngr tâu, zuk tuz nhuôs cux zuôr tuôx nhoz no, por vêv jôngr thiêz têx mak zơưv uô tâu. Heik lok zơưv Triệu Tài Cao, chủ tịch UB xã Tân Dân, huyện Hoành Bồ, zơưv Linh Du Hồng puz pâuz:

          “ Zơưv Cao zos đeiv iêr chi cax lul, zơưv tsi taz por vêv jôngr lâus mak tsênhv kriê tuz nhuôs têx cêr chax chês, phongz cxưx jông hâur tiv phaz. Ndar txos tov kaz no Đảng ủy, Ub xã cux zuôr muôx tsưr ziv muôz zơưv Triệu Tài Cao li jôngr uô qơư ju lix jôngr ntông, nriêr pâuz thiêz huôv tsar kinh têr jông đuô”.

          Huyện Hoành Bồ zơưv têz qơưk nhiv no tâu tỉnh Quảng Ninh thôngx ziv puz cxiv têx qơư ju lix vênhx huôv, jôngr ntông jông. Pâuz li ntơưv zơưv Cao tsuôk pâuz luôs xưz, tov kaz no zơưv li têx har jôngr zuôr tos ntâu kruô tuôx seiz shuôk, zuôr nhiêv thiêz tror gôngr đas jos por vêv jôngr. “ Muôx iz tsoz zos muôx jôngr, jôngr zuôr njuôz, jôngr zuôr por vêv têz qơưk”./.

(TTĐB- Txâur Vax cxeik nhênhv)