Zơưv Sênh ziv chuôz zis gruôs cơưv ntơưr

Shir phaz đros chuôz zis ntơưv ntus chuz, zơưv Ly A Sênh puz pâuz: thâuv ntêx no, tas nro zơưv oz niêv txir puôr lênhx tsik pâuz ntơưr, tsik pâuz luk tsoz tsiz, tsik pâuz suôr nhiêx. Muôx têx jiês êr poz cưk muk muôs, viv tsik pâuz suôr nhiêx viv li nênhs suôr muôz bâuv li chak nhiêx mak gra bâuv co lok tsêr xưz. Jênhv pâuz tsênhz kror phiv liv tiv tsik pâuz ntơưr, zơưv oz niêv txir xar tiêk tsuv chiê chor mê nhuôs muk cơưv cov pâuz ntơưr. Taz sik chiê cxơưx trâu chor mê nhuôs cơưv ntơưr mak chuôz zis tsuv muôx nhiêx. Đros siêz xar li co, zơưv oz niêv txir tưz sir jos uô liêx têz đros tu zus tsiêx cxu. Yênhx shông, zơưv chuôz zis tâu muôx 30 tấn poz cưk, 3 tấn blêx taz por muôx txâuk kôngz krâur thiêz phênhv sâu tsik so txix tu zus nhux tưv, kêiz buô jux juk paz trâu zơưv oz niêv txir muôx nhiêx txiêx chiê cxơưx trâu têx tuz nhuôs cơưv ntơưr. Têx shông co, ntơưv jok tsik muôx tsêr cơưv ntơưr viv li iz shông zơưv oz niêv txir tsuv muôz 6 puô cir blêx ntiêr nênhs chêix fuôx thâux xa chor mê nhuôs hla đêx chiê muk cơưv ntơưr ntơưv thị trấn Mường La. Zơưv Ly A Sênh puz pâuz:

“Tas nro cur oz niêv txir puôr lênhx tsk pâuz ntơưr, zus tâu tuk nhucc, tưv lok muôs cux tsik pâuz suôr nhiêx, viv li cur oz niêv txir sir jos chir chor mê nhuôs muk cơưv cov pâuz ntơưr. Zos tsik chiê chor mê nhuôs muk cơưv ntơưr mak tov kaz no cux zuôr tsik pâuz ntơưr li zuk, txov nhêv hênhr. Taz sik hmôngr jông chor mê nhuôs cux gruôs ciêz thiêz sir jos cơưv ntơưr. Cur oz niêv txir tưz sir jos chiê cxơưx trâu chỏ rnhuôs cơưv ntơưr cov txos qơư”.

Pâuz tâu txos niêv txir têx cêr khưr, sir jos, zơưv Sênh 4 lênhx nhuôs tuz puôr lênhx sir jos cơưv ntơưr. Zơưv Sênh 4 tuk nhuôs tuz tưz puôr lênhx cơưv tiêr ntơưr ntơưv têx tsêr cơưv đại học sik txơưr thiêz tưz yênhx nênhs. Nhiv no zơưv Sênh tuk tuz hlo zos Phưv hiệu trưởng tsêr cơưv ntơưr cxênhx iz Chiềng Công-Mường La; tuk tiv oz zos tsưr jk Thẳm Hon; tuk nhuôs tiv pêz nhiv o tsênhv uô hâux lưv ntơưv phongx cảnh sát cơ động, Công an tỉnh Sơn La thiêz tuk tuz nzơưs tsênhv uô hâux lưv ntơưv tỉnh Vĩnh Phúc. Tix lâus Ly A Dếnh, zơưv Sênh tuk tuz hlo hêik tiêk, chênhr zos muôx niêv txir kruôz kriê, txoz cxơưx mak pêz chor cưr tix thiêx muôx tâu hnuz no:

“Chiê muôx tâu li hnuz no mak niêv txir tưz sir jos cxơưx hêik cov pêz muk cơưv ntơưr. Thâuv ntêx no tas nro jok tsik muôx lênhx tưs muk cơưv ntơưr hlo; taz sik pov niêv txir khưr uô nox txov nhêv lok cux cxơưx trâu pêz muk cơưv ntơưr viv li txơưx muk tơư xưz lok pêz cux sir jos muk cơưv, tsik so iz hnuz hlo”.

Tsik pâuz ntơưr, taz sik zơưv Sênh zos nênhs txơưx xar đêz. Zos nênhs muôx suôz bê hâur jok, tưz tsik zos kruôz kriê chiê zuk têx mê nhuôs muk cơưv ntơưr thiêz yênhx nênhs xưz mak, zơưv tsênhv tsês ntâu six hơưv cê hêik pox nhuôs sơưr đơưk sik côngv siêz, uô jông lơưr Đảng, têz qơưk li têx cêr chêi, cê hêik têx tuz nhuôs hâur jok muk cơưv ntơưr. Lơưr zơưv Ly A Sênh, sơưr đơưk tsuv uô jông xar, txơưv nhuôs tuz, nhuôs nxêik lok cux chiê muk cơưv ntơưr hur si. Tsik zos muk cơưv ntơưr mak tsuv uô hâux lưv têz qơưk, kror zov chênhr zos tsuv pâuz ntơưr chiê muôx tsưr ziv uô nox, huôv tsar kinh tế chuôz zis:

“Nhiv no cur têx tuz nhuôs puôr lênhx yênhx nênhs thiêz muk uô haux lưv đêz. Cur cux hêik têx tuz nhuôs hâur jok sir jos cơưv ntơưr cov txơưx, cov pâuz tâu ntơưr chiê njuôk xav tsưr ziv uô nox, tsik njiz phiv liv li pêz ntu thâuv ntêx tsik pâuz ntơưr”.

Zơưv Ly A Sênh ziv chuôz zis tâu zos chuôz zis vênhx huôv ntâu shông sik lơưr liês thiêz zos chuôz zis gruôs cơưv ntơưr cấp tỉnh, ntâu cxuô cấp, nganhx nhoz tỉnh, huyện khơưk muôz ntơưr kruôk. Zơưv Sênh chuôz zis li cêr cơưv ntơưr tsênhv zos iz chuôz zis chiê sơưr đơưk cơưv shâuv thiêz uô trơưk./.

(Và Lia-Lik Thox cxêik nhênhv)