Lênhx tuz hluôk Sơn La li tsưr ziv sir zôngv têx

shông nxêz uô car gruk đêx hâuk

Njiz Lê Tiến Dũng ntơưv qơư muôz shôngz nxêz uô car gruk đêx hâuk nhoz xar Chiềng Cọ, thành phố Sơn La, Dũng puz pâuz: Hâur iz jiês muk ndis shuôk uô si saz đrâuv têz qơưk, tâu zôngv car shôngz gruk đêx hâuk, pov lok six hur thiêz ho sưv jê đros tênhv qơư, đros txix thâuv zâu zênhx pâuz txos chor shôngz nxêz muôx ntâu ntơưv Sơn La, taz sik têx qơư txơưr mak muôx tsơưs, viv li Dũng tưz xar tơưv tsưr ziv uô chor car gruk đêx hâuk no ciês ntơưv zuk qơư nhoz.

`        Hâur shôngk shông 2018, Dũng piz uô chor car shôngz gruk đêx xuz thơưx ciês, taz sik txix siêz xar txos trâu uô cux zos iz kror tsik zôngx ziv, tsuv sir jos thiêx uô tâu. Hâur 3 luz hli xuz thơưx, têx car shôngz tưs uô tâu cux tsik jông tas, zos tsik tơưs mak cux đax njưl;  Txơưv li ntơư, Dũng tror sir jos nriêr pâuz, nhênhz chơưv, hlôngr yiêz chuôz zênhx uô cov khưx phưx tâu têx phiv liv muôx yưv uô ntêx co, li: Hlôngr yiêz đuô hniêr mêir txiêr chiê chor shôngz tsik trâus tơưs; hlôngr yiêz đuô mêir kra tsik chiê chor pa tơưl cxơưz trâu chor shôngz, uô chor shông đax tsik njuôz jông: “Lok six ntâu jiês uô tsik tâu, ntâu jiês cux tsik xar uô, txix li co mak tsik jông kror tưs zuk kho đuô kror co, đhâu nriêr pâuz chênhz zênhv jux juk mak tưz uô tâu chor hax huv xuz thơưx ciês muôs trâu ciêz đrôngs txơưv tiêk chor nênhs zuôr cux tsik tâu huv siêz luôx tưs, taz sik no zos têx hax huv muôx liv viv li sơưr đơưk cux hêik kriê thiêz zuk cux kho uô cov jông đuô”.

Dũng puz pâuz nzir: Tsưr ziv uô chor car gruk đêx txix shôngz nxêz no cux tsik zôngx ziv uô, txix txiêr shôngz cov siz luôs, jêis oz zar hâur shôngz cov jông thiêz muôz hâu shơư cuô njêr iz hnuz iz hmo cov caz tsik tho nox thiêz chor car shôngz co thiêx tsik trâus tơưs. “Zos tiêk uô tâu mak cux zuôr paz txo grêk tsơưs tâu sir zôngv zav car gruk đêx zos nhựa, cux zuôr paz txo grêk tsơưs tâu sir zôngv têx vuôz tsuôz zos nhựa zôngv iz jiês. Cur cux xar tiêk chor nênhs uô têx qơư hâuk đêx pâuz tâu txos têx phiv liv tsik jông txix zôngv car gruk đêx nhựa, thiêz lơưr zuôr sir zôngv ntâu đuô chor car gruk đêx shôngz no, thiêz chor car no mak zuôr tror sir zôngv tâu ntâu jiês”.

Nhiv no, Dũng li 8 kror qơư uô car gruk đêx hâuk tưz paz muôx hâux lưv uô trâu zuôr xar 100 lênhx lox tôngv tiv phaz, uô tâu xar muôx 100.000 zar car iz hnuz; đros gri muôs txix 1.400 txos 1.700 đêiv iz zar car shôngz gruk đêx hâuk. Đhâu xar muôx 2 shông, Dũng têx hax huv car shôngz gruk đêx hâuk co tưz tâu muôs txos ntâu tỉnh hâur têz qơưk, thiêz tưz tâu muôs trâu têx ciêz đrôngs chor têz qơưk Liên Minh Châu Âu, Nga, Pháp, Đài Loan…tâu sơưr đơưk nhiêv sir zôngv thiêz thôngx ziv đros, txo grêk tsơưs sir zôngv chor car gruk đêx nhựa, gra siêz tsưr ziv por vêv tênhv qơư. Tix lâus Tóng Tuấn Cường, tsưr qơư nox hâuk Cường Béo, phường Chiềng Lề, thành phố Sơn La tưz tsik zôngv car gruk đêx nựa lơưv mak hlôngr trâu sir zôngv chor car gruk đêx uô txix shôngz no: “Txix thâuv zuôr chor car gruk đêx hâuk shôngz no lok zôngv mak tsôngv kruô lok six nhiêv, viv zôngv mak zôngx ziv thiêz cux jông tuôr đuô. Tiv oz zó slok kinh têr mak chor car gruk đêx no zuôr zôngv tâu 30 txos 50 jiês. Đhâu iz jiês sir zôgv mak zuôr muôz nzuôr tâu cov hur si, jiêz kruôr thiêz muôz lok sir zôngv, cê cxênhx txuôs tâu nhiêx txiêx, cê por vêv tênhv qơư”.

Taz sik nhiv no, qênhx shênhx ruôr ntor jôngr, uô liêx têz cux tsênhv muôx yưv ntâu, uô ruôr hiêv txos têx shôngz ntông; Chênhr zos li hêik ntơư, tix lâus Lê Tiến Dũng vav tiêk chor cơ quan muôx vax huôv tsuv moz siêz txos, chiê tsưx phưv cov tâu truôx têx shôngz nxêz tsik trâus ruôr hiêv thiêx muôx tâu shôngz uô chor car gruk đêx hâuk hêik ntơư muôs trâu ciêz đrôngl./.

(Trấn Long-Lik Thox cxêik nhênhv)