Lênhx hluôk mênhx cxưx Hmôngz uô bluô nux cxôngx jêx jos

          Xênhz shông 1984, taz sik Lai Xênhv Vax, nhoz jos Sin Suối Hồ tâu lok six ntâu lênhx nênhs hâur jos pâuz txos viv tix lâuk zos lênhx nênhs sei đrơưv, muôx têx tsưr ziv xar tơưv jông hâur huôv tsar kinh têr. Sâuv mênhv chêx vax đar muôx nhos 4000 yiv ndis, tix lâuk tưz cxiv guôx huv đros, yưv pênhr tu zus buô zuôr greix thiêz tu zus keiz chiê zôngv têx xiv huv kôngz nuv uô zav nox trâu tsiêx cxu, keiz ok. Fênhx pheiz iz shôngk tix lâuk muôs 2 jas, muôx nhos 4 tênhr buô khênhx thiêz 1 tênhr keiz, sâu lol tâu 300 tsov đeiv. Tsi xav têx nhiêx txiêx tưz yưv, chuôz zis sâu liv tâu muôx nhos 150 tsov đeiv.

          Lai Xênhv Vax puz pâuz, thâuv qir uô trâur nuv tu zus, tix lâuk tưz cxaz chuôz ntâu lớp kriê cxaz zos tiv phaz tsưr tsix, cux xưk li sir jos nriêr pâuz đhâu ntâuz ntơưr lok tsưr ziv tu zus buô, keiz.Qir thơưx tix lâuk tsuôk zus 3 tul niêv buô thiêz 2,3 châuv tul pox keiz chiê uô nôngz, đhâu co, tix lâuk thiêx zus cxaz yênhx châuv tul niêv buô thiêz yênhx puôk tul pox keiz chiê uô nôngz:

          “ Cxôngx shông 2005 kinh têr chuôz zis lok six txov nhêv, uô liêx, uô têz chiê nox xưz. Txos shông 2011-2012, chuôz zis qir tu zus buô, keiz, phênhv sâu muôx tâu mê njik. Nhiv no chos pax lan, poz cưk, chos blêx, phênhv sâu siêz đuô thâuv ntêx. Nhiêx txiêx hâur chuôz zis zôngv cux ngaz tul, tsi txov nhêv li thâuv ntêx lơưv thiêz”.

          Đros thiêz tu zus buô, huôv tsar paz keiz, chuôz zis yưv pênhr chos pax Lan, iz zav pax chox lol phênhv sâu siêz trâu pox nhuôs nhoz no. Viv huv đros qiv hơưv, ar têz nhoz no viv li pax Lan huôv tsar jông thiêz yênhx iz xiv huv nto bê nhoz Sin Suối Hồ, viv jông gâux mak tsi muôx qơư tưs muôx. Iz shôngk shôngk thâuv zos tsiêz yiêz, tix lâuk chuôz zis muôs zuôr xar 100 ntâu tsoz pax Lan, sâu lol tâu 300 tsov đeiv ntâu.

          Đros trâur nuv jông li ntơưv, iz shông tix lâuk Lai chuôz zis sâu lol muôx nhos 500 tsov đeiv thiêz yênhx lênhx nênhs jông txơưx uô bluô nux nhoz tiv phaz. Tix lâuk li trâur nuv kinh têr yênhx ntâu đoanx nôngx mênhx zos chinhr quyênx tiv phaz tsưr tsix li qơư tuôx seiz shuôk. Ntâu chuôz zis nôngx mênhx hâur jos hâur thax tsav tưz cơưv shâuv trâur nuv no uô kinh têr trâu chuôz zis thiêz sir jos hla đhâu cêr pluôs, uô bluô nux.

          Tix lâuk Tuôv Xênhv Vax nhoz jos Sin Suối Hồ, xã Sin SUối Hồ, huyện Phong Thổ heik:

          “ Hâur jos Lai chuôz zis shông tưs cux muôs tâu ntâu pax Lan tiv zix. Lok huôv tsar kinh têr thiêz chos pax Lan Lai chuôz zis thâuv tưs cux zos chuôz zis uô ntêx nyuôk thiêz muôx chênhz zênhv chos pax Lan jông tiv zix. Nhoz hâur jos cux muôx ntâu chuôz zis tuôx Lai chuôz zis cơưv shâuv chiê chos pax Lan thiêz”.

          Tsiz taz txơưx uô kinh têr, tix lâuk Lai Xênhv Vax tsênhv zos đeiv iêr chi cax lul hâur jos, xã li cxuô huôx tôngv, phongz yaox. Đros trâur nuv kinh têr thiêz siêz jông viv côngv thôngx, tix lâus tưz tâu têx cấp, têx ngênhx nhoz tiv phaz sâu jênhv đros yênhx châuv đeiv ntơưr kruôk thiêz tâu tsôngv box hâur jos, hâur thax tsav lok six hluz.

          Zơưv Chinh Xênhv Vax, tsar jos Sin Suối Hồ, xã Sin Suối Hồ, Phong Thổ puz pâuz:

          “ Thâuv ntêx Lai chuôz zis lok six txov nhêv, taz sik nưs cux lok six sir jos, txơưx xar tơưv thiêz gruôs tu zus buô hloz lox sei muôs tâu ntâu. Lai tsênhv muôx chênhz zênhv, pênhr xưv chos pax Lan, txơưx tsoz phưz. Cur tsênhv yax mông pox nhuôs hâur jos tsuv uô lơưr Lai”./.

( Khắc Kiên- Txâur Vax cxeik nhênhv)