Lò Văn Cường-lênhx hluôk nênhs moz siêz xar tơưv uô ntâu hax huv jông paz trâu pêx xênhv Sơn La

Thav txos luz mêir ntâuk blêx zâu uô tâu 3 kror hâux lưv hâur chuôz zis, niêv tix Tòng Thị Hoa nhoz tiểu khu Hua Ít, thị trấn Ít Ong, huyện Mường La shir phaz hlo. Thâuv ntêx tsik tâu muôx luz mêir no, niêv tix chuôz zis chor liêx tsuv muôx txix 2-3 lênhx nênhs sir jos ntâuk blêx, tas yênhx hnuz thiêx ntâuk tiêr, phiv liv thiêz tas ntâu six hơưv.

Txix shông 2018, thâuv zuôr tâu luz mêir ntâuk blêx uô tau 3 kror hâux lưv zos Lò Văn Cường xar tơưv uô lok zôngv, chuôz zis tưz tsik tas ntâu six hơưv chiê ntâuk blêx lơưv. Chuôz zis li 1.000 ntâu thiêr ndis liêx tsuôk sâu tas muôx iz six hơưv xưz tưz tiêr lơưv. Shir phaz đuô zos iz luz mêir ntâuk blêx mak muôx gri zos 20 triệu đêiv, taz sik luz mêir ntâuk blêx Lò Văn Cường xar tơưv uô no tsuôk muôx gri muôs zos 3,5 triệu đêiv xưz. Gri kik, zôngx ziv thâux muk lok trâu hâur têx liêx-luz mêir no oz pêz shông tror lok no tưz paz lok six ntâu trâu chor chuôz zis nhoz Ít Ong thâuv txos chêix blêx liêx siêr:

“Thâuv sir zôngv luz mêir no mak cux zôngx ziv thiêz lok six jông, viv luz mêir no cux ntâuk tâu blêx sêi thiêz tsik tas ntâu six hơưv chiê nzuôv blêx…ntâuk tas mak zuôr ntiv  tâu trâu ciês hâur hnaz chiê thâux lok tsêr xưz”.

Đros Lò Văn Cường muk hâur qơư uô, tsênhv tsênhz mak zos chuôz zis iz qar tsêr, pov muôx lok six ntâu cxuô zav chuôz zênhx, cxuô zav mêir. Cường puz pâuz: thâuv cơưv tiêr ntơưr cxênhx pêz, Cường tưz tsik thik tưr muk cơưv chor tsêr cơưv đại học, mak đăngk cir chiê muk uô tuz lênhv nganhx Công an.

Shông 2016, uô tiêr hâux lưv tror lok tsêr, zênhx muôx siêz nhiêv xar zos yênhx lênhx kỹ sư cơ khí, ho pov tâu pox nhuôs njiz phiv liv ntâu hâur khưr uô nox, tsơưr lươngv ho tsik siêz, Cường tưz muôx tsưr ziv xar tơưv uô têx mêir chiê phưx vưv trâu uô kôngz nuv, paz txo grêk tsơưs six hơưv thiêz chor nênhs uô, paz trâu pox nhuôs tsik tas ntâu đas jos uô:

“Xuz thơưx uô mak njiz lok six ntâu phiv liv, tiv zix zos nhiêx txiêx, đuô thiêz nhiv kruôr kriz uô xưz mak chuôz zis cux tsik tâu thôngx ziv đros paz, chor mêir lok tsuôk hlê tas ho tror muôz đhok trâu, muôx têx luz mêir yiêz lok cux uô puôk tsuôx tas viv li phiv liv txos ntâu kror hênhr”.

Chiê muôx cxuô zav lok uô, đrâuv chor nhiêx cxênhx tsês tâu, Cường tưz txêik zênhx hangx 100 triệu đêiv chiê zuôr cxuô zav mêir li mêir hav, mêir tho, mêir txiêr…; đhâu iz ntu sir jos uô, Cường tưz xar tơưv thiêz uô tâu lok six ntâu zav mêir jông, li: Mêir xưv lik têx vuôz tsuôz nhựa thiêz têx hnaz tax zôngv chiê uô yênhx têx zav tơưl chis, hlôngr trâu trox yêz meir; mêir ntâuk blêx hov zâu uô tâu pêz kror hâux lưv; mêir phênhz têx txir mận zâu; mêir uô zav nox hâur tu  zus….

“Chor mêir muôs sâuv ciêz đrôngs mak tsik huv đros trâu luz nênhx nhoz ntơưv no viv li cur xar tơưv tsưr ziv uô, hlôngr yiêz đuô cov huv đros. Thâuv tsênhv xar uô luz mêir no mak ho xar txos uô têx zav mêir txơưr đuô viv li hâur ntu đhâu mak tưz uô tâu lok six ntâu zav mêir”.

Hâur 3 shông ntâu đhâu, Cường tưz muôs tâu muôx 300 ntâu luz mêir cxuô zav; iz luz mêir puôr lênhx muôx gri muôs kik đuô txix 5 txos 10 triệu đêiv pir li chor mêir txơưr muôx sâuv ciêz đrôngs. Chor nênhs zuôr Cường têx mêir tưz tsik zos nênhs nhoz huyện Mường La xưz mak tsênhv zos chor nênhs nhoz têx huyện txơưr hâur  tỉnh li Mộc Châu, Phù Yên, Mai Sơn…tuôx zuôr chox muk zôngv thiêz. Lò Văn Cường puz pâuz nzir:

“Hâur ntu zuôr txos cur zuôr tror xar tơưv thiêz uô nzir ntâu zav mêir, kho đuô têx mêir cov jông đuô thiêz nhiêx txiêx kik đuô cov huv đros trâu têx đêx ar nhoz thax tsav tox siêz Tây Bắc. đros coi zuôr sir jos uô cov chor mêir muôx gri muôs fênhx zis đuô thiêz huv đros đuô chiê paz trâu pox nhuôs sơưr đơưk”./.

(Trấn Long-Lik Thox cxêik nhênhv)