Cxuô jiês yax kriê tsưx phưv truôx ntus đriv têz qơưs

Tus ndêx cxok kuôk cêv đriv têz 207, zos Zênhx Pênhz phax trôngx đriv Chiềng Khương, tuz lênhv Pênhz phax tỉnh Sơn La seiz car, hâur têx hnuz hâur hli 3 tsi tiêk muôx chor tuz lênhv muk lol qênhz yuôx shuôs, tsênhv zos qơư choz kriê cêr uô nênhx jông, sik đros tsưx phưv truôx đriv têz trâu cxuô lênhx cxuô tus, chor tuz nhuôs sơưr đơưk thiêz.

Tâu seiz njiê pov njôngr, tâu tuôr tâu cor txos tus ndêx cxok kuôk cêv đriv têz sâu bê Việt Nam; tâu mnôngs chor tuz lênhv pênhz phax niêx hnuz hmo uô luôs hâux lưv tsưx phưv ntus đriv heik thiêz thav kriê lơưr têx hâux lưv ziv uô trâu chor cưk kriê ntơưr, têx nhuôs shux xênhz nhoz no shir phaz, ndo txiêx njis thiêz moz siêz đros tsưx phưv truôx đriv têz pêz têz qơưk: “Mnôngs chor txir nzơưv tuz lênhv pênhz phax kriê lok tsưx phưv ntus đriv têz qơưk. Pêz tsênhv tâu muk seiz shuôs tus ndêx cxok kuôk cêv đriv têz, pâuz tsênhz lok luôs hâux lưv cxiv tsa thiêz tsưx phưv têz qơưk thôngz đhâu têx jiês cơưv li heik sâuv. Cur chos luk zuôr sir jos cơưv txux chi cov coz, chiê đros paz cxiv tsa thiêz tsưx phưv truôx têz qơưk hâur ntu zuôr txos”.

“Cur lok six jông siêz thiêz shir phaz thâuv tâu cơưv, tâu pâuz lok têx hâux lưv tsưx phưv têz qơưk. Cur vav chiê siêz, đhâu no cux zuôr tror muôx têx tsaz yênhx xưk li co thiêz, chiê pêz muôx têx cxaz chuôz ntâu đuô”.

No zos 02 lênhx nhuôs shux xênhz Vũ Trần Bảo Ngọc thiêz Cà Văn Hoàn cux li ntâu lênhx shux xênhz lớp 6A1, tsêr cơưv cxênhx 2 Chiềng Khương, huyện Sông Mã, Sơn La têx lul heik, tsưr ziv xar đhâu jiês cơưv, yax kriê lok tsưx phưv têz qơưk.

Iz jiês cơưv tsi muôx trôngx tos jâuv, tsi muôx ntơưr sâu, chưx mêv, taz sik tâu chor nhuôs shux xênhz ndo njôngr chiê hâur đruôz siêz tsi plox thâuv tâu ndis seiz, shuôs têx cêr muk lol  qênhz yuôx đriv têz, lok sik pov têx jêx jok nhoz ntus đriv tsênhv ziv hnuz ziv hlôngr yiêz, muôx luz nênhx tsâu sor viv cấp ủy, hâu nov thiêz pêx xênhv cêr sik thôngx siêz, siz paz, hâur co muôx chor canr bôv, chiến sĩ tuz lênhv pênhz phax.....

Trung úy Vũ Quốc Việt, Đội trưởng Đội vũ trang, Zênhx Pênhz phax trôngx đriv Chiềng Khương, lênhx buôk ti kriê têx txux chi, tsưr ziv heik sâuv trâu sơưr đơưk heik: “Cur jông siêz thiêz shir phaz thâuv tâu hlôngr njêx muôs trâu taz viv, trâu lưv lươngv yax kriê têx txux chi, tsưr ziv tsưx phưv đriv têz trâu têx nhuôs shux xênhz; kriê chor nhuôs pâuz tsênhz lok tsưx phưv ntus đriv têx zov chênhr cux li ndêx cxok kuôk cêv đriv têz têx muôx liv jông. Đhâu têx jiês cơưv li no, cur vav chiê siêz zuôr cxơưz đas jos, kriê tsưr ziv trâu chor tuz nhuôs nhiêv têz nhiêv qơư đuô, chiê thâuv hloz lox, lơưr zuôr zos têx lênhx tror đros tsưx phưv truôx tuk thax tsav ntus đriv, têz qơưk”.

Tsi tiêk têx hnuz hâur hli 3 xưz, mak chiv nhênhv Hnuz chax chês tuz lênhv Pênhz phax Việt Nam, lok sik Hnuz Pênhz phax tas nro tsôngv box sơưr đơưk...., têx jiês kriê thiêz cơưv txux chi li heik sâuv ho tâu chor Zênhx Pênhz phax hâur thax tsav tỉnh Sơn La đros cxuô luz tsêr cơưv tsưr tsix, đhâu ntơư, paz cxơưz đas jos, kriê nzir tsưr ziv thiêz nthuôr đar siêz xar trâu têx nhuôs shux xênhz nhoz ntus đriv. Cưk kriê ntơưr Bùi Thị Minh, uô hâux lưv hâur tsêr cơưv cxênhx 2 Chiềng Khương, huyện Sông Mã, Sơn La heik: “No zos hâux lưv uô muôx liv thiêz tsênhv tsênhz, paz têx nhuôs shux xênhz muôx nzir tsưr ziv, pâuz tsênhz lok têx ndêx cxok kuôk cêv đriv têz, thax tsav ntus đriv. Txix ntơư, kriê cxaz nzir trâu chor nhuôs pâuz đros tsưx phưv truôx tuk têz qơưk thâuv tsênhv nhoz cơưv txux chi hâur tsêr cơưv”.

Têx jiês yax kriê, cơưv nzir txux chi” li heik sâuv tsi ntêr, tsi ntâu taz sik muôx têx zuôr uô chor tuz nhuôs shux xênhz ndo njôngr tsês hâur đruôz siêz tsi plox; iz chas ntơư paz têx nhuôs pâuz tsênhz, zuk thiêz cxuô lênhx nênhs Việt Nam, lênhx tưs cux lok six zov chênhr, puôr lênhx tâu têz qơưk, têx tuz lênhv, chor lâul por hưv, moz siêz, hluz txos. Txix ntơư, cxênhx hluôk, têx tuz nhuôs zuôr hloz lox iz fâuv jux juk thiêz tror lês uô chor lâul têx luôs hâux lưv cxiv tsa, tsưx phưv têz qơưk./.

Lê Hạnh-Riê Lâux cxeik, nhênhv