NÔNGX MÊNHX ZUÔR TSUV PÂUZ

Hluôk nênhs Hmôngz muôx tsưr ziv huôv tsar uô nox

Đhâu zuôr xar 7 shông uô công nhân ntơưv iz công ty tsiv uô têx hnaz sênhr,hnaz tax nhoz tỉnh Hưng Yên, tix lâus Tênhr Xênhv Lâux, xênhz shông 1997, heir nênhs Hmôngz nhoz jok Lung Tang, xã Bắc Yên, Sơn La tưz quyết định tror lok zuk qơư nhoz cxiv tsa tsưr ziv tu zus cxuô zav tsiêx cxu, muôx phênhv sâu truôx tuk.

Đros chor pênhr nhiêx muôx nhos 100 tsov đeiv txuôs tâu tsês đhâu ntâu shông uô lox tôngv, tix lâus Tênhr yưv pênhr cxiv uô qơư, zuôr nôngz tsiêx cxu lok zus chiê muôs. Tsi tâu muôx ntâu tsưr ziv, tix lâus tưz bax cơưv shâuv đhâu internet, têx chuôz zis huôv tsar tu zus tâu jông hâur thiêz 2 chas thax tsav qơư, đhâu ntơư jux juk uô lơưr hâur tsênhv tsênhz. Đros trâu têx li heik co, tix lâus nzaz nzơưv muôz têx liêx têz chiê chos poz cưk, jâuz tâux puz tsiêx cxu, paz txo grês tsơưs nhiêx txiêx zuôr krâur, jâuz uz no trâu tsiêx cxu. Qơư tu zus tâu cxiv uô lax nziês, hur si, tsi so qêz suô, vêv xênhz, tsuôs yuôx tuô lov caz moz ơưk. Hok têx qir tsiêx cxu mak tâu muôz vâuv chiê fmông trâu tsoz chos, yênhx cêr huôv tsar uô nox truôx tuk, huv đros tênhx qơư.

          Tix lâus Tênhr Xênhv Lâux heik: Têx uô trâu cur moz siêz tror lok zuk thax tsav qơư zos tâu nhoz jê đros chor nênhs cxênhz jê, tu niêv txir thiêz xar huôv tsar uô nox sâuv zuk thax tsav qơư nhoz. Lok sâuv tu zus buô mak moz siêz qêz suô,  vêv xênhz qơư tu zus hur si, cxax yuôx phax moz ơưk cxix cxuô lơưr canr bôv kho moz tsiêx cxu heik kriê thiêz bax txâuk jâuz krâur nox trâu buô. Yis zôngx ziv tu zus, tsi yuô tas ntâu nhiêx txiêx, zav nox phênhv ntâu zos têx blôngzz hmaz blôngx ntông, tâux, kênhzz, tsơưz....

Txix 5 tus yis nôngz thiêz 2 tus niêv buô xuz thơưx, txos nhiv no, tix lâus Tênhr chuôz zis têx tsiêx cxu tưz vav muôx 40 tus buô grêix huôv tsar muôx grêix, 38 tus yis, 120 tus keiz thiêz 40 tus ok. Njuôk xav shông 2026 no, đhâu yưx tas têx nhiêx txiêx zuôr krâur, zuôr yuôx, ntiêr nênhs hlêis jâuz puz thiêz đros tu, chuôz zis sâu tâu liv txix tu zus muôx 120 tsov đeiv ntâu. Hâur ntu zuôr txos, tix lâus Tênhr njuôk xav tror krêz đar qơư tu zus buô thiêz yis, iz chas ntơư, yưv pênhr uô cov tiêr têx qơư tu zus truôx khor chiê huôv tsar tu zus tâu trơưk têk thiêz truôx tuk.

Heik lok hluôk nênhs Tênhr Xênhv Lâux, niêv lâuk Sa Thị Huệ, Đoanx xã Bắc Yên puz pâuz: Tênhr Xênhv Lâux zos lênhx hluôk nênhs moz siêz trâu cxuô luôs hâux lưv thiêz muôx txux chi, tsưr ziv jông hlôngr yiêz luz nênhx. Tsi tiêk sir jos huôv tsar khưr uô nox, mak tsênhv moz siêz đros uô têx hâux lưv zos Đoanx xã phuôx tôngv, tsi so paz uô têx hâux lưv, têx tsaz yênhx jông siêz, paz  chor chuôz zis thiêz nhuôs zâu muôx luz nênhx txov nhêv.

Tix lâus Tênhr Xênhv Lâux luôs hâux lưv tu zus tsiêx cxu tsênhv jux juk paz chuôz zis truôx tuk luz nênhx thiêz paz nthuôr đêz đar tsưr ziv, cêr huôv tsar uô nox, cxơưz cxiz cxuô lênhx hluôk nênhs sir jos huôv tsar uô nox uô hnar sâuv chênhr zuk thax tsav qơư nhoz.

Phênhv "Nôngx mênhx zuôr tsuv pâuz" hnuz no tsuôk xâuk li no xưz. Phênhv no zos Cơ quan Đeix TNVN nhoz thax tsav Tây Bắc đros Tsênhv qơư cxơưz cxiz kôngz têz qơưk uô./.

                                                                                     Vưx Tsu-Riê Lâux cxeik, nhênhv