NÔNGX MÊNHX ZUÔR TSUV PÂUZ

Lênhx hluôk Hmôngz đros siêz xar uô bluô nux

Tsôngv cưr tix thiêz fôngx zưs sơưr đơưk hmor yuô! Txix têx txux chi cơưv tâu ntơưv Tsêr cơưv Đại học Nông Lâm Thái Nguyên thiêz cơưv shâuv têx tsưr ziv uô kôngz yiêz txix Israel, tix lâus Sổng A Thắng - lênhx hluôk nênhs Hmôngz nhoz jok Khuôn Bổ, xã Hưng Khánh, tỉnh Lào Cai tưz uô tâu têx kror jông hâur huôv tsar uô

Txix tsưr ziv chos yênhx châuv hecta tsoz yuôx đrox njuôz li sơn thục, blôngx khôi hâur xuz jôngr, tix lâus tsi tiêk chox lok phênhv sâu 500 tsov đeiv ntâu iz shông trâu chuôz zis mak tsênhv yênhx lênhx nênhs uô ntêx nyuôs, moz siêz heik kriê tsôngv px hâur jos sik đros huôv tsar uô bluô nux.

Tâu xênhz zus thiêz hloz lox hâur chuôz zis zênhx huôv tsar uô kôngz, txix ciês thâuv tsênhv zâu tix lâus Sổng A Thắng tưz pâuz tsênhz txos tsôngv px Khuôn Bổ li txox cêr txov, luz nênhx phênhv ntâu zos khov txos uô liêx têz, phênhv sâu tsi truôx tuk.

Đros siêz xar sir jos hla đhâu cêr txov, tix lâus truôx siêz cơưv ntơưr ntơưv Tsêr cơưv Đại học Nông Lâm Thái Nguyên, qơư tưz paz tix lâus muôx pênhr xưv txux chi lok tsêz chos, seiz car thiêz huôv tsar jôngr truôx vênhs. Tsi tas li, tâu muk Israel cơưv shâuv tưz krêz tơưv trâu tix lâus iz qơư yiêz - tâu buôk ti txos uô kôngz nuv yiêz, zôngv công nghệ siêz lok uô tsiv uô.

Jênhv pov têx zav tsoz chos huv đros chos hâur chuôz zis li têx xuz jôngr li sơn thục, blôngx khôi, tix lâus Thắng tưz cuêz tênhv chos tsoz yuôx đrox njuôz hâur xuz jôngr. No zos trâur nuv cê paz zôngv tâu têx ar têz, cê por vêv tâu tênhx qơư jôngr.

Qir thơưx, cuêz tênhv no tsi so njiz têx cêr cxơưx, viv đros ntâu lênhx pêx xênhv, yuôx đrox njuôz tsênhv yiêz thiêz nyei muôx yưv têx phiv liv. Hâur shôngk shông 2023, tix lâus Thắng tưz kriz uô tsưr ziv chos tsoz chos sơn thục thiêz blôngx khôi hâur xuz jôngr, piz txix tsưr ziv uô zâu, cê uô cê zuôr chênhz zênhv.

Khov uô trơưk tsưr ziv, tsoz phưz jông, têx tsoz chos hloz lox jông, sâu tâu siêz thiêz tsơưr lươngv siêz. Đhâu 2 shông ntâu sir jos uô, txos nhiv no, tix lâus Thắng li trâur nuv chos yuôx đrox njuôz hâur xuz jôngr tưz huôv tsar txos 7 ha, đros gri muôs zos 8.000 đêiv iz cir nhôngk, 50.000 đêiv iz cir (sơn thục kruôr) thiêz 30.000 đêiv iz cir (blôngx khôi nhung nhôngk), tix lâus Thắng sâu tâu 500 tsov đeiv ntâu iz shông – zos têx kror jông đros ntâu ziv chuôz zis nhoz tox siêz tsênhv yuôr ntâu txov nhêv li Khuôn Bổ.

Đros chinhz yênhx txơưx jênhv, tix lâus Thắng tsênhv vênhv tôngv tsôngv px truôx siêz hlôngr yiêz tsoz chos, zôngv ar jôngr chiê huôv tsar kinh têr chuôz zis.

Khov tâu tix lâus Thắng chox kriê, ntâu ziv chuôz zis hâur jok tưz jux juk buôk ti thiêz kriz uô tsưr ziv chos yuôx đrox njuôz li chuôz zis: Sổng A Gia, Sổng A Công, Sùng A Vang, Sổng A Châu. Txix cêr cxơưx thâuv qir krêz uô, nhiv no têx chuôz zis co tưz njênhs njôngr, sir jos cơưv shâuv thiêz uô trơưk chox lok phênhv sâu truôx 100 tsov đeiv ntâu iz shông. Tix lâus Thắng li tsưr ziv uô tsênhv paz hlôngr yiêz tsưr ziv uô nox, jux juk txo grêk yeiz pluôs truôx vênhs ntơưv tiv phaz.

Zơưv Phạm Xuân Toàn - Phưv Bí thư Thường trực Đảng ủy xã Hưng Khánh puz pâuz: "Đảng viên Sổng A Thắng li trâur nuv chos yuôx đrox njuôz hâur xuz jôngr tso pov hluôk nênhs tiv phaz li chinhz yênhx car xar, car uô hâur ntu hlôngr yiêz. Txix têx txux chi cơưv tâu ntơưv tsêr cơưv thiêz chênhz zênhv cxôngx nzor nhoz đrâuv luôs 2 chas têz qơưk, tix lâus tưz vênhv zôngv xar tơưv uô tsênhv tsênhz, hlôngr yênhx têx muôx jông hâur har jôngr yênhx kror liv chiê huôv tsar kinh têr reik đros por vêv tênhx qơư nhoz uô nênhx. Đhâu co, gôngr phênhv cxơưz cxiz txos tsôngv px tiv phaz. Nhiv no, Hưng Khánh tưz muôx 60 ntâu ha tsoz sơn thục thiêz khôi nhung, no zos tsưr ziv uô huv đros chiê chuôz tsar phênhv sâu trâu tsôngv pêx xênhv”.

Đros siêz xar njôngr hla đhâu cêr pluôs, Sổng A Thắng tưz yênhx lênhx nênhs uô ntêx nyuôk, cxơưz cxiz trâu ntâu lênhx hluôk nênhs thiêz tsôngv px nhoz no uô lơưr zuk li trâur nuv huôv tsar uô nox. Têx har jôngr njuôz nhiv no tsênhv zos qơư paz cxơưz cxiz huôv tsar têx tsưr ziv siêz xar, uô bluô nux sâuv zuk têz qơưk.

Phênhv "Nôngx mênhx zuôr tsuv pâuz" hnuz no tsuôk muôx xâuk li no xưz. Phênhv no zos Cơ quan Đeix TNVN thax tsav Tây Bắc uô đros Tsênhv qơư cxiz kôngz têz qơưk paz max./.

                                                                                                                   Thào Ly – Txâur Vax cxeik nhênhv