Têx lênhx nôngx mênhx bluô nux nhoz Quỳnh Nhai

            Sâuv thax tsav pas đêx niêv đêx Đas nhoz huyện Quỳnh Nhai, muôx têx nôngx mênhx sei đrơưv, sir jos huôv tsar cêr uô nox txix chos ntông nox txir sâuv ar nxaz côngv đros tu zus chiê uô bluô nux, sik côngv đas jos đros pox nhuôk cxiv tsa nôngx cxênhz yiêz. Tiv zix xưk li tix lâuk Dia Xênhv Thox nhoz jos Phiêng Ban, xã Mường Giàng, huyện Quỳnh Nhai, tỉnh Sơn La.

           Lok txos jos Phiêng Ban, jos tox siêz nhoz xã Mường Giàng, đros têx coz nas uô trâu qiv hơưv lax khiêv đuô hâur cheix ntux sor, ziv uô trâu pox nhuôk nhoz no li yênhx puôk hecta tsoz chos njuôz jông đuô. Tix lâuk Dia Xênhv Thox, Tsar Ban côngz xưv mặt trận jos Phiêng Ban, zos iz lênhx hluôk nênhs sei đrơưv, cơưv tiêr Đại học Luật, tix lâuk tưz muôx 6 shông uô Phưv Chủ tịch Hội nôngx mênhx xã, nhiv no zos iz lênhx nênhs bluô nux nhoz thax tsav ar têz nxaz no. Tos pêz tuôx seiz shuôk, tix lâuk Dia chox pêz muk seiz vax chos cà phê- trâur nuv kinh têr jông nhoz jos tox siêz no.

          Thâuv uô côngz xưv nhoz Hội nôngx mênhx xã, tix lâuk jênhv pov zuk têz qơưk tsênhv yuôr ntâu phêv liv, jos mak muôx ntâu ar têz, tsôngv box gruôs uô hâux lưv, taz sik luz nênhx tsênhv six fênhx yeiz pluôk ntêr lok no. Thâuv muk seiz tsênhv tsênhz nhoz iz cxiê qơư, tix lâuk cuiz tênhv thor uô côngz xưv hội, tsês tas nro six hơưv, đas jos nhênhz chơưv, cơưv shâuv uô kôngz nuv, vênhv tôngv pox nhuôk hâur jos hlôngr yiêz tsoz chos, chox cà phê, yuôx zêx, ntông nox txir lok chos sâuv ar têz nxaz, chos sik shơư đros têx tsoz chos txơưr, uô trơưk têx tsưr ziv kỹ thuật jông. Thôngx cxix, vênhv tôngv pox nhuôk tu zus nhux tưv, nhux đas cơư hâur guôx lơưr saz hax huv thiêz zôngv têx qir nhux co chiê zuôv trâu tsoz chos.

          Qir thơưx pox nhuôk tsi uô lơưr, lơưr xar tiêk uô li ntơưv mak tsi huv đros zuk tsôngv box Hmôngz. Chiê pox nhuôk uô lơưr, tix lâuk tưz uô ntêx nyuôk krêz đar mênhv chêx, xav tênhv tsoz chos, txeik pênhr zuôr nôngz zuz, qir zuôv; heik cán bộ cxiz kôngz huyện paz kriê tsưr ziv tsêz chos. Đhâu 4 shông, chuôz zis tưz muôx 3,8 hecta cà phê, 1,3 hecta yuôx zêx Shan Tuyết, 7 hecta poz cưk, tsêz no, chuôz zis sâu tâu 500 tsov đeiv ntâu, muôz hâux lưv uô trâu 10 lênhx nênhs lox tôngv hâur jos.

          Nhiv no, jos Phiêng Ban muôx 76 ziv chuôz zis, 100% zos tsôngv box mênhx cxưx Hmôngz, shông 2015, Phiêng Ban tâu côngz jênhv zos jos nôngx cxênhz yiêz thiêz txos nhiv no, jos muôx 50% ziv chuôz zis bluô nux, tsuôk yuôr 5% chor ziv chuôz zis pluôk thiêz zuôr xar pluôk. Shông 2025, jos sir jos cxuôv tas têx ziv chuôz zis pluôk thiêz tâu côngz jênhv zos jos nôngx cxênhz yiêz jông.

          Tix lâuk Dia Xênhv Thox puz pâuz cxaz: Xav tênhv phongz yaox uô bluô nux trâu chuôz zis, uô jêx jos jông jav đuô thiêz muôx txơưx jênhv paz max têx ziv chuôz zis pluôk sir jos hla đhâu cêr pluôk truôx vênhs, muôx phênhv sâu tâu siêz. Tix lâuk chuôz zis zuôr tsês iz phênhv chiê paz pox nhuôk tsiv uô thiêz heik kriê lơưr huôv tsar uô nox, yênhx trus ngaz tul luz nênhx thiêz hla đhâu cêr pluôk.

          Phênhv “Nôngx mênhx zuôr tsuv pâuz” hnuz no tsuôk muôx xâuk li no xưz. Phênhv no zos chiz coaz Đeix nta suôz VN nhoz thax tsav Tây Bắc uô. Muôx tsênhv qơư cxiz kôngz têz qơưk paz txưv./.

                                                         KT-Txâur Vax cxeik nhênhv