Lênhx hluôk Hmôngz muôx tsưr ziv uô nox txix chos dâu tây sâuv ar têz tsuôs, sâu tâu yênhx puô tsov đêiv iz shông

Tsưz Xênhv Zax, xênhz zus thiêz hloz lox ntơưv jok Lèng Chư, xar ntus đriv Dào San, huyện Phong Thổ (Lai Châu). Tsưz Xênhv Zax tror ndo txos, shông 2009 đhâu cơưv tiêr lớp 9, tix lâus muk uô nênhs cxiv tsa vax tsêr nhoz ntâu tỉnh, thành sik txơưr. Tâu oz pêz shông tix lâus pov kror hâux lưv no tsik truôx viv li tror lok ntơưv zuk qơư nhoz chiê huôv tsar kinh têr txix chos tsơưz thiêz zuôr pox niêv xênhz zus mê nhuôv. Taz sik, shông 2019 muôx moz Covid-19 huôv xênhz, chor txir tsơưz muôs tsik tâu, tsưz tưz zok nriêr tsưr ziv chiê uô nox yiêz.

Shông 2020, tâu iz tuk tix lâus muôz puz iz kror nôngz txir dâu tây lok chos trâu chor mê nhuôv nox, Tsưz pov zav tsoz chos no zôngx ziv chos, zôngx ziv tsoz phưz thiêz huv đros trâu qiv hơưv, đêx ar ntơưv thax tsav qơư. Tiv zix, chor dâu tây no sâu tâu sêi, txir lox jông muôx ntâu tsơưr pưr thiêz sâuv ciêz đrôngs ho muôs tâu gri siêz, viv li Tsưz tưz muôx tsưr ziv chos siv iz shông thiêz uô zuz kriz đar nzir thax tsav chos.

Tas nro thax tsav chos dâu tây thâuv ntêx no zênhx zos têx ar liêx ntêir đaz tuôs, tiv muôx tsik txâuk đêx viv li Tsưz chuôz zis tsuôk chos tâu iz chiv thiêz tsês khôngz li co tok txos chiv shông tov kaz thiêz tror chos đuô blêx. Zênhx gruôs thiêz sir jos, Tsưz Xênhv Tsaz tưz ntâu jiês nriêr tsưr ziv chos siv têx zav tsoz chos txơưr taz sik tsik huv đros. Tix lâus Tsưz puz pâuz, thâuv nhiv kruôr chos dâu tây, tsik tâu muôx txux chi, tsưr ziv chos thiêz tsoz phưz viv li cê uô cê cơưv shâuv têx tsưr ziv, chênhz zênhv đros trâu cơưv shâuv nzir sâuv mạng lok sir zôngv trâu tsênhv tsênhz ntơưv zuk qơư chos thiêz chiê chor dâu tây hlo lox, huôv tsar tâu jông zuk tsuv bôngs ar cov siêz cov chor dâu tây tsik trâus đêx ngaz, yiz têx blôngx por tsês cov chor dâu tây txi txir ntâu thiêz zôngv têx ntâuz tax vor iz ndis hâur pâuk cov ar nông, paz trâu chor txir tsik lo tâu ar cov chor txir hur jông cux li tir tar têx caz hmoz ruôr hiêv txos têx txir dâu tây.

Đros tsênhv zos hluôk nênhs xar huôv tsar uô nox, car xar, car uô, lênhx hluôk nênhs Tsưz Xênhv Tsaz tưz hlôngr đuô chor liêx ntêir kruôr muôx tsik txâuk đêx zos yênhx têx vax txir dâu tây njuôz jông, txi txir ntâu thiêz uô tâu truôx jông lơưr tsưr ziv uô nox. Chiê muôx tâu vax txir dâu tây xưk li nhiv no, tix lâus yưv pênhr muôx 150 tsov đêiv ntâu thiêz uô cxiv luôs đêx zưs chiê paz uô trâu chor txir dâu tây nông. Chiv xuz thơưx, vax txir dâu tây txi txir ntâu, chor txir lox jông gâux, đros gri muôs txix 100.000-120.000 đêiv iz cir, chuôz zis sâu tâu muôx 10 tsov đêiv ntâu.

Têx uô tâu xuz thơưx tưz paz cxơưz cxiz chuôz zis kriz đar thax tsav chos. Shông 2022, tix lâus chos nzir 500 thiêr ndis, sâu tâu muôx 60 tsov đêiv ntâu. Txos shông 2023, chuôz zis tror chos nzir 800 thiêr ndis thiêz paz muôx tâu phênhv sâu 300 tsov đêv ntâu thiêz shông 2024 tưz sâu tâu xar muôx 400 tsov đêiv.

Tưz tsik zos uô bluô nux trâu zuk chuôz zis, Tsưz Xênhv Zax li tsưr ziv chos dâu tây no tsênhv paz muôx hâux lưv uô truôx tuk trâu 6 lênhx lox tôngv ntơưv thax tsav qơư thiêz paz cxơưz cxiz trâu chôngz lênhx hluôk nênhs mênhx cxưx tsơưs nênhs ntơưv thax tsav qơư nriêr pâuz, kriz uô huôv tsar têx tsưr ziv uô nox thiêz uô bluô nux ciês sâuv zuk thax tsav qơư nhoz.

 Phênhv “Nôngx mênhx zuôr tsuv pâuz” hnuz no tsuôk xâuk li no xưz. Phênhv no zos Đaix nta suôz Việt Nam nhoz thax tsav faz Bắc uô. Muôx Tsênhv qơư cxơưz cxiz uô kôngz têz qơưk đros paz uô./.

Vừ Chu-Lik Thox cxêik nhênhv