10 shông tsoz chos ntông nox txir tưz vor têx liêx têz nxaz Sơn La

Hâur ntu 2015-2020, Sơn La tsênhv njiz trâus ntâu phiv liv, kinh tế huôv tsar tsi truôx, tsênhv tsi tâu muôx cxix cxuô tsar zav, chuôz zis pluôs ntâu, têx liêx têz phênhv ntâu nxaz tox, tsoz chos niêx shông zos blêx, poz cưk, kok ntông, sâu tsi tâu nju; iz chuôs zis, iz lênhs lav uô iz kro mê njik, tsi huôv tsar uô ntâu; iz chas co cux tsi yuô muôx pênhr uô nox, têx kôngz uô tâu cux tsi yuô muôx nênhs zuôr.....

Tỉnh Sơn La tưz bax nhênhz chơưv, nzaz nzơưv Đảng, têz qơưk têx tsưr ziv, tsênhv chei paz; txix ntơư  tso tơưv ntâu tsưr ziv, chei paz huôv tsar uô kôngz, cxiv tsa qơư nhoz, zênhx max đơưk têx phiv liv. Hâur co lar heik zos Suô luk sôr 121 hnuz 30/11/2015 lok iz cxiê tsưr ziv chos tsoz chos nox txir sâuv ar têz nxaz txos shông 2020; đros thiêz hâux lưv sir jos muôz chor liêx têz nxaz uô blêx, chos poz cưk, kok ntông hlôngr chos tsoz chos nox txir; iz chas ntơư, xav tinhv co zos tas nro cxix luôs chính trị txix tỉnh txos ntơưv qơư hâux lưv zov chênhr. Zơưv Hoàng Văn Chất, kuz Bí thư Tỉnh ủy Sơn La heik:“Hâur 10 shông thâuv ntêx, Tỉnh ủy tưz xeir tsưr ziv huôv tsar uô kôngz trơưk công nghệ siêz thiêz chos tsoz chos nox txir sâuv ar têz nxaz zos huv đros tsênhv tsênhz hâur thax tsav tỉnh.... Xuz thơưx tỉnh tưz uô tâu yênhx côngz, taz sik vênhv tôngv cxuô chuôz zis sir jos huôv tsar uô kôngz txix nhiêk uô trâu nhiêk nox yênhx uô ntâu muôs zos lok six zov chênhr; muôs tâu ntâu têx txir ntông hâur ciêz đrôngs, reik đros jux juk cxuz cêr yeiz pluôs, cxiv tsa luz nênhx truôx tuk, huôv tsar uô bluô nux sâuv chênhr thax tsav qơư mak ntâu lênhx hâu nov tưz tas ntâu côngz đas jos, tsưr ziv cxiv tsa”.

Txos nhiv no, Sơn La zos tỉnh muôx liêx têz chos ntâu tsoz chos nox txir đuô hur si hâur faz Bắc, xav tas nro chor têz ntông nox txir thiêz txir tuôz ziz zos 85 cxênhz ntâu ha, shông 2025 njuôk xav sâu đê tâu 510 cxênhz tênhr, kror đruôz đraz iz ha zuôr tâu txix 150-300 tsov đeiv iz shông; iz cxiê thax tsav, qơư huôv tsar chos tâu ntâu, tu jông muôx têx tax 400-500 tsov đeiv iz ha, pir li shông 2016 tưz tâu gri đuô lok six ntâu.

Thax tsav muôx 200 ntâu zav txir shôngz txir ntông đros thiêz xav hur si liêx têz chos muôx 4.500 ha; 335 doanh nghiệp, HTX chos 9 cxênhz ntâu ha tsoz chos nox txir; yênhx cxênhz ha têz tsoz chos li heik sâuv đhok uô tâu qơư zưs đêx, tâu côngk nhav uô tâu trơưk cui tinhv; 14 xiv huv tâu Cục sở hữu trí tuệ muôz ntơưr côngk nhav por hưv; 8 thax tsav uô lơưr tsưr ziv yiêz trâu tsoz chos; zuôr xar 60 xiv huv txir ntông tâu côngk nhav OCOP..... Jux juk cxiv tsa, muôx suôz bê hâur ciêz đrôngs têz qơưk thiêz sâuv ntiêx têz, txix shông 2017-2025, Sơn La tưz muôs 158 cxênhz ntâu tênhr txir ntông trâu ciêz đrôngs 15 luz têz qơưk, hâur co muôx ntâu ciêz đrôngs lox li: Nhật, Úc, Pháp, Anh thiêz iz cxiê têz qơưk Liên minh châu Âu txơưr đuô. Zơưv Nguyễn Xuân Cường, Kuz ủy viên BCH T.Ư Đảng, kuz Bộ trưởng Bộ Kôngz nuv thiêz huôv tsar tox siêz ntâuk grê:“Xuz thơưx tsuv côngk nhav tỉnh Sơn La uô tâu jông, đhâu 10 shông tưz hlôngr yiêz ntâu, txix têx côngz trênhx, cêr huôv tsar uô nox, tsôngv pêx xênhv luz nênhx xênhz huôx. Thâuv ntêx, tsi yuô muôx lênhx nênhs pâuz txos Sơn La, nhiv no heik txos kôngz nuv công nghệ siêz zos heik txos Sơn La. Sơn La têx luôs hâux lưv uô tâu tsênhv nthuôr đêz đar txos trâu 2 chas thax tsav cơưv shâuv, uô trơưk”.

Zơưv Hoàng Quốc Khánh, Bí thư Tỉnh ủy Sơn La heik pâuz, ntơưv qơư zuôr fuô uô ntâu tsưr ziv chiê tror huôv tsar tsoz chos nox txir truôx tuk, gra siêz suôz bê, gri muôs hâur ntu zuôr txos. Hâur co, cxơưz cxiz huôv tsar tsoz chos nox txir truôx tuk, hur jông; tror cxiv tsa thiêz huôv tsar têx thax tsav chos ntâu; tror muôx nhiêx txiêx paz phưx vưv huôv tsar uô nox, por hưv, tsiv uô têx xiv huv:“Tỉnh zuôr tror nhênhz chơưv, tso tơưv iz cxiê tsênhv chei cxơưz cxiz huôv tsar uô nox, zuôr muôs têx txir ntông hâur thax tsav tỉnh; huôv tsar công nghiệp tsiv uô xiv huv, tsov cưv paz max tỉnh chor txir ntông hur jông muôs trâu 2 chas thax tsav, têz qơưk đrâuv; gra siêz chor tuz luôv, têx qơư sik hux jos hâux lưv uô, cxơưz cxiz zuôr muôs xiv huv truôx tuk đhâu ntâu qơư, ntâu thax tsav”./.

                                                                                                             VOVTB-Riê Lâux cxeik, nhênhv