Văn Yên (Yên Bái) sir jos por vêv jôngr hâur têx hnuz muôx yar ntux cuz sor

Chiê chuôz cxaz txơưx jênhv thiêz muôx tas nro côngv thôngx đros uô, Hạt Kiểm lâm huyện Văn Yên, tỉnh Yên Bái tưz sik côngv đros chinhr quyền cxuô thax tsav qơư tsưr tsix trâu pêx xênhv cir jênhv choz zok, por vêv muôx 37.600 ntâu héc ta jôngr ntơưv thax tsav 21 xar; cir jênhv phax cuz, tuô cuz thiêz por vêv jôngr trâu 3.000 ntâu ziv chuôz zis uô nênhx nhoz jê jôngr.

Ntơưv thax tsav chor xar, huyện Văn Yên tưz yênhx lix, uô truôx jông 157 tôv, đôiv uô ntêx hlo hâur por vêv thiêz phax tar cuz tox cuz jôngr, đros lưx lươngv chênhr zos dân quân tự vệ thiêz chor hluôk nênhs. Đros co zos cxiv tsa uô 20 xor mông, lôngx đhok 30 fiêx hêik pâuz txưr jôngr thiêz muôz muôx 3.000 ntâu ntâuz ntơưr yax kriê lok por vêv jôngr, kriê sir zôngv hluôr tơưl ngaz tuk hâur uô, hlơưr têx liêx têz trâu pêx xênhv pâuz. Zơưv Trần Văn Hưng, Tôv tsar Tôv por vêv jôngr jok Khe Gai, xar Đông An, huyện Văn Yên, Yên Bái puz pâuz: “Yênhx hli, chor nênhs hâur tôv por vêv jôngr puôr lênhx muk qênhz yuôx har jôngr. Zos pov muôx têx uô cxâuv lok sik nav har jôngr ntơưv têx ntus têz mak hêik trâu chinhr quyền ntơưv qơư thiêz lưx lươngv kiểm lâm pâuz chiê đơưk kho, tir tar têx kror uô cxâuv txuôk lơưr”.

Zơưv Trần Thống Nhất, Chủ tịch Ủy ban xar An Bình, huyện Văn Yên puz pâuz, uô lơưr lưx lươngv Kiểm lâm thiêz chinhr quyền huyện li hêik kriê, xar tưz xav jênhv têx har jôngr zov chênhr zuôr zôngx ziv muôx cuz tox cuz jôngr siêz thiêz hêik sơưr đơưk luôx têx har đrox nhov chiê tir tar hluôr tơưl chis cuz trâu hâur har jôngr; tso nênhs sêiz jor yênhx hnuz hmo hâur têx ntu tâu njuôk xav zôngx ziv muôx cuz jôngr txix cấp 3 tror sâur… “Pêz tưz uô truôx jông Ban Chox kriê thiêz chor tôv por vêv jôngr, chiê chor ziv chuôz zis thiêz tôv jênhv sêiz jor por vêv jôngr cir jênhv phax cuz tuô cuz jôngr. Đros co, pêz tsik so uô uô cê têx tsênhv njiêz lok phax tar cuz jôngr, por vêv jôngr trâu hâur chor jiês cơưv jêx jok, cơưv chor ziv chuôz zis”.

Chiê por vêv tâu jông chor har jôngr nhiv no muôx thiêz huôv tsar jôngr tâu truôx jông, lưx lươngv Kiểm lâm huyện Văn Yên tưz tsik so nriêr pâuz, nzor hêik trâu chinhr quyền pâuz uô jông têx tsưr ziv sêiz car, por vêv jôngr, sêiz car têx ntông thiêz phax cuz, tuô cuz jôngr.

Zơưv Đoàn Giao Long-Hạt trưởng Hạt Kiểm lâm huyện Văn Yên, tỉnh Yên Bái, puz pâuz: “Pêz chox kriê chor lưx lươngv kiểm lâm thax tsav tsik so hêik chor côngv thôngx jêx jok qênhz yuôx por vêv jôngr; nzor pov tâu têx txuz uô cxâuv chiê hêik trâu chinhr quyền ntơưv qơư pâuz đơưk tu têx uô cxâuk cik txos Chêi jôngr nuv”.

Đros têx tsưr ziv uô jông, cxix cxuô, txix shông 2023 txos nhiv no, sâuv thax tsav huyện Văn Yên tsik pov muôx yưv txuz cuz tox cuz jôngr tưs, paz trâu huyện Bảo Yên muôx nzir thax tsav muôx jôngr vor, tsơưr lươngv jôngr thiêz phuôx huiz tâu jông kinh têr txix har jôngr.

Đros hâux lưv sêiz car, por vêv jôngr, Văn Yên cux lok six tsov cưv txos côngz xưv huôv tsar jôngr. Ciês chiv ntux yiêz shông no, thax tsav qơư tưz chos tâu muôx 2.600 ntâu héc ta jôngr, phênhv ntâu zos jôngr ntông cuêv fix, ntâu đuô tsưr ziv tưz tso tơưv, paz trâu thax tsav muôx jôngr vor hâur huyện ndê muôx 67% ntâu./.

Trịnh Xuân-Lik Thox cxêik nhênhv