Tsôngv box mênhx cxưx tsơưs nênhs pluôs seiz njuôs thiêz kho moz tsi tas nhiêx

          Têx shôngk đhâu, Đảng thiêz têz qơưk Việt Nam tso tơưv ntâu tsênhv chêi paz txưv tsôngv box têx mênhx cxưx uô qênhx fênhx zav, đhâu co muôz siêz luz nênhx chinhz yênhx, yênhx trus chiê têx mênhx cxưx tâu sik đros huôv tsar jông iz zav. Tiv zix li nhoz Lào Cai, tâu sơưv chính sách BHYT tsi tsuv thêv nhiêx txiêx đros tsôngv box mênhx cxưx tsơưs nênhs pluôs, têx shôngk jê ntơưv no tsôngv box têx mênhx cxưx nhoz têx xã thax tsav huyện Bắc Hà, tỉnh Lào Cai tưz tâu seiz njuôs thiêz kho moz tsi tsuv thêv nhiêx txiêx ntơưv qơư seiz car moz đa khoa thax tsav Lùng Phình hlôngr trâu hâux lưv hu txir nênhz tuôx kho moz li thâuv ntêx. Zơưv Đặng Văn Phủ, mênhx cxưx Cho nhoz xã Tả Cù Tỷ, huyện Bắc Hà, tỉnh Lào Cai tuôx kho moz ntơưv qơư kho moz đa khoa Lùng Phình pheiz kênh, khov muôx ntơưr BHYT viv li zơưv cux tso siêz đuô chiê kho moz:

          “Tuôx no kho moz tsi pôngz nhiêx txiêx, tâu têx y bác sĩ tsoz phưz jông, paz nênhs moz pêz tso siêz đuô”.

          Qơư seiz njuôs moz đa khoa thax tsav xã Lùng Phình nhoz sâuv thax tsav xã tox siêz Lùng Phình, zos iz hâur 4 qơư seiz njuôs moz đa kho thax tsav huyện Bắc Hà, tỉnh Lào Cai. Qơư no phưx vưv seiz njuôs thiêz kho moz trâu tsôngv box thax tsav têx xã: Tả Cù Tỷ- Jos Già, Lùng Cải, Tả Văn Chư, Lùng Phình- Lầu Thí Ngài. Tas nro pox nhuôs têx mênhx cxưx nhoz têx xã no puôr lênhx tâu muôz ntơưr BHYT lơưr tsaz yênhx 30a. Tix lâuk Lênhx Xênhv Seo nhoz jos Lả Gì Thàng, xã Tả Văn Chư puz pâuz, cxôngx thâuv muôx ntơưr BHYT zos têz qơưk muôz, tix lâuk thiêz pox nhuôs hâur jos tsi ndo txos hâux lưv muôx moz tsuv hu txir nênhz tuôx kho moz thiêz:

          “BHYT mênhx cxưx tsơưs nênhs nhoz tox siêz lok six muôx liv. Thâuv muôx moz gênhs, muk tsêr yuôx mak tsênhv tâu muôz yuôx, kho moz tsi pôngz nhiêx txiêx. Têx lênhx nênhs moz tsêr nhoz đêz tsênhv tâu paz txưv nhiêx nox thiêz muk lok. Thâuv ntêx muôx moz tsuv muk nriêr yuôx njuôz, muk hu txir nênhz tuôx kho moz lok six phêv liv, muôx ntơưr BHYT mak jông đuô lok six ntâu”.

          Pos Sì Hồng Sến, 70 shông, mênhx cxưx Phù Lá nhoz jos Lùng Phình, xã Lùng Phình cux pheiz kênh tiêk, nhiv no tsôngv box muôx moz gênhs mak txơưv ciêr chênhr chox muk qơư seiz njuôs thiêz kho moz thax tsav chiê tâu seiz njuôs thiêz kho moz:

“Muôx têz qơưk li BHYT tsês trâu nênhs pluôs, thâuv muôx moz gênhs muk seiz njuôs thiêz kho moz tsi tsuv pôngz nhiêx txiêx. Tiv 2 zos nhoz kho moz ntơưv qơư tsênhv tâu paz pluôk nox tar su, viv li tưz paz nênhs pluôs lok six ntâu chiê hla đhâu têx moz gênhs”.

          Đros đeiv ntơưr BHYT, pox nhuôs têx mênhx cxưx nhoz têx xã tox siêz huyện Bắc Hà tsênhz tsênhz tâu tsov cưv tsoz phưz đas jos jông đuô. Fênhx pheiz iz shông muôx cxôngx 2.500-3000 jiês tsôngv box tuôx seiz njuôs thiêz kho moz. Bác sĩ Trần Xuân Quý, Tsar phongx seiz njuôs moz đa khoa thax tsav Lùng Phình khav tênhv:

          “Uô côngz xưv seiz njuôs moz nhoz qơư seiz njuôs moz puôr lênhx zos têz qơưk paz txưv têx ziv chuôz zis tsôngv box mênhx cxưx tsơưs nênhs  pluôs. Đrâuv seiz njuôs thiêz kho moz trâu pox nhuôs nhoz 6 thax tsav, Qơu seiz njuôs moz tsênhv seiz njuôs thiêz kho moz trâu iz cxiê nênhs moz nhoz xã Lử Thẩn huyện Si Ma Cai. Muôz yuôx cxix cxuô lơưr zoz qơưx, trơưk nênhs moz, yuôx tsi tas six hơưv zôngv”.

          Khov muôx ntơưr BHYT, nhiv no tsôngv box têx mênhx cxưx nhoz thax tsav huyện Bắc Hà tưz tâu zôngv têx jix vuv y tế, cux xưk li tso siêz đuô thâuv tuôx seiz njuôs thiêz kho moz ntơưv Qơư seiz njuôs thiêz kho moz đa khoa thax tsav Lùng Phình.

          Tsôngv box thiêz cưr tix fôngx zưs hmor yuô! Đhâu têx li heik sâuv, pêz pov Chính phuv li tsaz yênhx huôx tôngv 122 lok côngz xưv mênhx cxưx tưz khav tênhv tâu chính sách paz txưv tsôngv box têx mênhx cxưx tsơưs nênhs uô qênhx fênhx zav, muôz siêz luz nênhx chinhz yênhxx, yênhx trus paz têx mênhx cxưx sik đros huôv tsar iz zav. No chênhr zos hâux lưv tsênhv tsênhz hâur taz por thiêz cxơưz tiês mênhx cxưx tsơưs nênhs li qênhx heik taz thiêz qênhx lênhx nênhs heik cxuô nhoz Việt Nam./.

(Puôr Xênhv Zax-Txâur Vax cxeik nhênhv)