Lâul jos, nênhs muôx côngz bê nhoz qơư tuk đêx  ntưk lok hâur têz qơưk Việt

15 shông đrav ntêx, 40 ntâu ziv chuôz zis tsôngv box Hmôngz nhoz chor jêx jok tox siêz, đêz đrôngs, thax tsav txov nhêv tiv zix oz xar Dìn Chin thiêz Pha Long, huyện Mường Khương tưz txar lok nhoz ntơưv jok Lũng Pô, xar A Mú Sung, huyện Bát Xát. Thiêz iz  hâur chor nênhs txar lok nhoz ntơưv no trơưk Đảng, Chinhr phuv chox kriê txar pêx xênhv muk nhoz trâu ntus đriv zos zơưv Ma Seo Páo:

“Txar lok nhoz ntơưv no mak zênhx pâuz tiêk thax tsav ntus đriv no lok six phiv liv, taz sik cux tsuv sir jos xưz. Thâuv ntêx cur cux tuôx ndis shuôk ntơưv no lơưv, zênhx phiv liv tiês, ntơưv no mak tsik zôngx ziv uô hlo. Tsênhv cik txos ntâu kror thiêz, iz mak zos pêx xênhv sơưr đơưk tsuv sik côngv siêz, sik paz thiêz tsuv mnôngs lơưr Đảng, por vêv jông ntus đriv”.

Tâu huyện Bát Xát, Đảng ủy, chinhr quyền xar A Mú Sung thiêz  tiv zix zos Zênhx Pênhz phax A Mú Sung, Đoanx kinh têr Côx phax 345 moz siêz txos paz, pox nhuôs sơưr đơưk tưz sik côngv iz siêz cxiv tsa luz nênhx ntơưv qơư nhoz yiêz Lũng Pô. Txix thax tsav har phaz tưz tâu tsôngv box Hmôngz nhoz Lũng Pô sik đros chos poz cưk, kok ntông, txir pôngr lux thiêz tsơưz, huôv tsar kinh têr, truôx tuk luz nênhx. Txix 10 ha xuz thơưx, txos nhiv no, jok Lũng Pô tưz muôx 80 ntâu ha tsơưz thiêz xưk li chuôz zis tưs cux chos tau tsơưz. Iz zav li tix lâus Ma Seo Làn chuôz zis (zos zơưv Páo tuk tuz tiv oz nhiv no zos Bí thư Chi bộ jok) chos 4 ha tsơưz, 3 ha poz cưk, kok ntông thiêz 1 ha txir thênhx caz, xav tas cxuô kror, iz shông tix lâus chuôz zis sâu tâu lok txix 200 txos 300 triệu đêiv:

“Nhoz ntơưv jok mak tưz yênhx lix chor đôiv chiv chir uô, txiêr tsơưz, paz muôx phênhv sâu trâu pêx xênhv sơưr đơưk. Txiêr ntiv hâur têx thôngr ntơưr, iz lênhx nênhs uô iz hnuz mak cux sâu tâu txix 1 triệu txos 1 triệu 500 cxênhz đêiv. Nhiv no, sâuv thax tsav A Mú Sung mak cur tsênhv sơưr lok sâu zuôr trâu pox nhuôs chiê muôs muk  trâu saz Trung Quốc, đhâu trôngx đriv Kim Thành Lào Cai. Nhoz ntơưv no, chor chuôz zis li zơưv Lù Seo Páo cxiv uô tâu tsêr xar muôx 1 tiv. Zơưv Lù Seo Lử chuôz zis zuôr tâu yêz ô tô nhiv no tsênhv zôngv chiê thâux xa hax huv trâu pêx xênhv hâur jok, Ly Seo Vư cux zuôr tâu yêz lox chiê chêix muk lok”.

Tix lâus Lù Seo Nhà ziv chuôz zis, muôx 3 lênhx nênhs, thâuv ntêx cux zos chuôz zis muôx luz nênhx txov nhêv. Pov tâu zơưv Páo oz txir tuz chos tsơưz, kok ntông paz muôx tâu kinh têr siêz tưz cơưv shâuv thiêz uô trơưk. Nhiv no tix lâus Nhà chuôz zis tưz muôx luz nênhx truôx tuk lơưv:

“Tâu Đảng, Têz qơưk moz siêz txos chiê pêz lok nhoz ntơưv no mak txos nhiv no pêz tưz muôx tâu luz nênhx yiêz jông đuô lơưv. Pêz tưz chos tâu kok ntông, chos tâu tsơưz, cur chuôz zis chos tâu muôx 3000 tsoz tsơưz, hok kok ntông mak ntâu hênhr. Xav mak iz shông chuôz zis sâu tâu muôx 60 triệu đêiv”.

Côngv siêz, côngv njưl, njênhs njôngr trâu Đảng, txos nhiv no, jok Lũng Pô tưz zos yênhx qơư chi cax lok huôv tsar kinh têr, vênhx huôv, đros tuôr truôx ngaz tuk-Côx phax sâuv thax tsav ntus đriv Lào Cai. Txix iz jok muôx ntâu ziv chuôz zis yêiz pluôs, txos nhiv no, Lũng Pô tưz zos yênhx luz jok muôx thiêz bluô nux. Phênhv sâu xav lênhx nênhs tâu muôx 60 triệu đêiv iz shông. Trung tá Lý Sín Sẩu, Chính trị viên Zênhx Pênhz phax A Mú Sung puz pâuz:

“Jok Lũng Pô txos nhiv no mak tsik yuôr chuôz zis pluôs lơưv. No zos iz luz jok sir jos huôv tsar uô kinh têr, hâur co muôx chos tsơưz, kok ntông paz muôx tâu phênhv sâu siêz, zos iz  haur chor jok uô tâu nox tiv zix xar A Mú Sung”.

Txix thâuv lok nhoz ntơưv Lung Pô txos nhiv no tưz xar muôx 15 shông, zơưv Ma Seo Páo cux iz siêz njênhs lơưr Đảng, hêik pox nhuôs sơưr đơưk por vêv truôx jông thax tsav ntus đriv têz qơưk. Txơưv tiêk ntu thâuv ntêx no uô tsar jok thiêz nhiv no zos iz lênhx lâul jok, nênhs muôx côngz be, zơưv cux zos iz lênhx đảng viên jông, uô ntêx hlo thiêz zos nênhs chiê chor jêx jok nhoz A Mú Sung-qơư tuk đêx đuz ntưk lok trâu têz qơưk Việt cơưv shâuv uô trơưk:

“Uô nênhx nhoz trâu kror tưs zos tsik muôx Đảng paz mak cux zuôr uô nênhx nhoz tsik tâu. Zuk uô nênhx nhoz mak tsuv muôx Đảng, muôx Têz qơưk, tsuv muôx iz tsưr tsix, ngaz tuk, muôx pênhz phax, pêz uô huv zos trơưk cêr chêi, zos iz qơư chi cax chiê A Mú Sung por vêv truôx jông ntus đriv, huôv tsar kinh têr truôx đrênhk”.

Phuôx huiz tsưr tsix Đảng li pưk txux, tiv zix zos chor đảng viên li zơưv Ma Seo Páo, jok Lũng Pô nhiv no tưz muôx chôngz lênhx đảng viên hluôk iz siêz njênhs lơưr Đảng, sir jos cơưv shâuv, huôv tsar kinh têr, txo grêk cêr yêiz pluôs chiê jêx jok muôx tâu iz luz nênhx jông, tsâu sor đuô./.

(Giàng Seo Pùa-Lik Thox cxêik nhênhv)