Sơn La: Pov muôx ntâu jiês thâux xa, chaz tsiêx cxu đhâu ntus đriv tsik zos chei

Nhiv kruôr đhâu, thâuv qênhz yuôx, tôv côngz xưv Zênhx Pênhz phax Chiềng Khương, Bôv Chỉ huy Bôv đôiv Pênhz phax Sơn La tưz pov 2 paz nênhs tsênhv chaz chor tsiêx cxu txix saz têz qơưk Lào đhâu ntus đriv lok hâur têz qơưk Việt Nam. Thâuv tôv côngz xưv qênhz yuôx, 2 paz nênhs no tưz tso têx tsiêx cxu tsês khiêr tror muk trâu saz têz qơưk Lào, muôx 8 tuk nênhl tas nro tsiv gri xar muôx 100 triệu đêiv. Thiếu tá Hoàng Văn Thành, Phưv Zênhx tsar Zênhx Pênhz phax trôngx đriv Chiềng Khương, huyện Sông Ma, tỉnh Sơn La puz pâuz:

“Têis cik sơưr nzor hnuz 11/3, pêz tsưr tsix sêiz jor cxov oz txuz, tâu 8 tuk nênhl, thâuv sêiz jok cxov co mak zos hmo ntux, thax tsav phiv liv, chor nênhs co thâuv pov pêz mak tso têx tsiêx cxu tsês thiêz khiêr gâuv trâu hâur har jôngr. Sâuv thax tsav ntus đriv thâuv hmo ntux thiêz têis cik sơưr nzor mak muôx huôz tsâuk, ntux no, lok six phiv liv lax ntêk cxov tâu chor nênhs co. Pêz chor nênhs cux tsênhv muôx tsơưs thiêz tsênhv tsuv uô têx hâux lưv txơưr thiêz…”.

Xar Chiềng Khương, huyện Sông Ma (Sơn La) muôx zuôr xar 27 cêik cêr ntus đriv, buôs ti đros têz qơưk Lào, muôx ntâu txox cêr zâu, cêr lus, zôngx ziv trâu muk lok đhâu ntus đriv. Chor nênhs nhoz oz saz ntus đriv cux siz pâuz, siz nus, sik côngv uô cê, muôx ntâu tsưr ziv chiê thâux xa, chaz têx tsiêx cxu li nhux, tưv, nênhl lok đhâu ntus đriv chiê muôs… Cxuô kror puôr lênhx tâu siz nus, hêik pâuz đhâu zalo, facebook thiêz chaz lok đhâu ntus đriv thâuv hmo ntux. Chiê pov tâu nzor thiêz phax tir tar tâu qênhx shênhx no, Zênhx Pênhz phax trôngx đriv Chiềng Khương tưz sir jos uô côngz xưv, qênhz yuôx truôx jông cxuô thax tsav qơư sâuv ntus đriv, pov thiêz xưv lik truôx chor nênhs uô cxâuv. Thiếu tá Hoàng Văn Thành, Phưv Zênhx tsar Zênhx Pênhz phax trôngx đriv Chiềng Khương, huyện Sông Mã, tỉnh Sơn La hêik pâuz nzir:

“Pêz taz viv tsik so chox kriê chor Đôiv uô jông hâux lưv nriêr pâuz thax tsav qơư, qênhz yuôx, zos pov chor nênhs zuôr muôs tsiêx cxu đhâu ntus đriv mak pêz zuôr tsưr tsox sêiz jor thiêz ntêk cxov. Pêz tso nênhs uô hâux lưv cov nzor, phênhv ntâu zos thâuv hmo ntux. Pêz cux zuôr sik thav nzir đros têx lưx lươngv saz têz qơưk Lào chiê tsưr tsix ntêk cxov”.

Lơưr thôngz sâu, hâur 1 shông đhâu, Zênhx Pênhz phax Chiềng Khương, huyện Sông Mã tưz pov thiêz cxov tâu 12 txuz, 6 lênhx nênhs thâux xa, chaz têx tsiêx cxu đhâu ntus đriv, cxov tsês tâu 22 tuk nhux đas, 4 tuk tưv thiêz 10 tuk nênhl. Zênhx Pênhz phax Chiềng Khương cux tưz sik côngv đros chor công an xar xav jênhv, qênhz yuôx, uô tsênhz mênhx chor txuz hâux lưv thiêz uô têx ntâuz ntơưr xưv lik chor tsiêx cxu no lơưr chêi têz qơưk li cui tênhv, Đại úy Vì Văn Thỏa, Phưv trưởng Công an xar Chiềng Khương, huyện Sông Mã, tỉnh Sơn La hêik:

“Công an tưz sik côngv đros Zênhx Pênhz phax trôngx đriv Chiềng Khương qênhz yuôx, xav jênhv chor nênhs cik txos, nhiv no mak tsênhv zok nriêr tsik tâu pov chor nênhs co. Tiv chor nênhs co muk lok thâuv hmo ntux, viv li zos pov chor nênhs muôx vax huôv mak zuôr tso têx tsiêx cxu tsês chiê khiêr gâuv. Cơ quan công an nhiv no tsênhv tror sik côngv đros chiê qênhz yuôx chor txuz hâux lưv no”.

Cux lơưr Phưv Công an xar Chiềng Khương Vì Văn Thỏa, ntu zuôr txos, chor lưx lươngv muôx vax huôv sâuv thax tsav zuôr tror sik côngv đros chính quyền cxuô thax tsav qơư sir jos uô côngz xưv qênhz yuôx, phax tar, tsik chiê chor nênhs uô cxâuv chêi thâux xa, chaz tsiêx cxu muk lok đhâu ntus đriv tsis zos chêi, paz tuôr truôx tâu ngaz tuk sâuv thax tsav./.

(TTTB-Lik Thox cxêik nhênhv)