Luôs hâux lưv sir jos uô phax tir thêir chor nênhs zuôr muôs zax zênhz

Sơn La

Thax tsav đriv têz VN-Lào hâur ntu đhâu tror tâu ntâuk grê zos thax tsav cuz nxor lok zax zênhz; muôx 270 ntâu cêik cêr ntus đriv buôk 2 tỉnh Hủa Phăn thiêz Luông Pha Băng (Lào), viv li Sơn La yênhx qơư chor nênhs zuôr muôs zax zênhz, thâux gra têx zax zênhz txix saz đrâuv lol đhâu hâur VN chiê muôs.

Ntơư zos txuz hnuz 11/6/2018, ntơưv jok Chiềng Khương, xã Chiềng Khương, huyện Sông Mã (Sơn La) Phongx Cảnh sát qênhz yuôx têx nênhs zuôr muôs zax zênhz tsi trơưk chei, Công an tỉnh Sơn La seiz car, hux jos đros chor lưv lươngv muôx vax huôv tưz ruôr por tsês yênhx côngz txuz zuôr muôs zax zênhz, ntêk tâu iz lênhx nênhs saz têz qơưk đrâuv tsênhv zuôr muôs zax zênhz tsi trơưk chei. Lênhx nênhs trâul ntêk co zos Ly La (muôx iz luz bê hu txơưr zos Nô La, xênhz shông 1992, nhoz ntơưv Viêng Xay, tỉnh Hủa Phăn, têz qơưk Lào, têx chuôz zênhx sâu tâu muôx 20 poz zênhz đơưz thiêz iz cxiê chuôz zênhx txơưr đuô cik txos. Ntơưv cơ quan Công an, Ly La krêz lênhk tiêk, zuôr chor zax zênhz heik sâuv txix thax tsav đriv têz 3 luz têz qơưk VN-Lào-Campuchia lok, tsênhv taz tov thâux gra muk muôs thiêx trâul ntêk cxov.

Txix têx txuz trâul ntêk tâu tso pov, chor nênhs zuôr muôs zax zênhz muk lol đhâu tỉnh ziv hnuz muôx tsưr ziv jông thiêz riêz nênhs đuô. Lơưr muôx cêr sik thôngx siêz truôx, liv zôngv chei têz qơưk têx uô tsi yuô ntov, lok sik hlôngr luôs lưv tus bê chiê uô têx nuv tsi trơưk chei, chênhr viv li cơ quan muôx vax huôv lok six phiv liv qênhz yuôx, yơưz phơưz.

Iz chas sir jos tir thêir chor nênhs uô cxâuv chei li heik sâuv, têx lênhx chiến sĩ  lês uô hâux lưv thâuv tưs cux njiz trâul têx phiv liv, riêz nênhs hâur uô têx hâux lưv zok muôz, viv đros têx txuz zuôr muôs, thâux gra ntâu zax zênhz, chor nênhs uô cxâuv chei co lơưr zênhx pâuz tsênhz, zos trâul ntêk cxov tâu, zuôr trâul cxâuv lox, chênhr zos li heik co thâuv tưs lơưr cux chênhr phax, gra đros đreiv têx triêv, fov chiê tir thêir thâuv trâul ntêk cxov.

Lok têx hnuz hâur hli 6/2019, Phongx Cảnh sát Qênhz yuôx têx nênhs zuôr muôs zax zênhz tsi trơưk chei, Công an tỉnh Sơn La tưz ruôr por tsês tâu iz txuz zuôr muôs zax zênhz, ntêk tâu Jêz Xênhv Muôk, nhoz ntơưv jok Pá Đông, xã Nà Bó, huyện Mai Sơn (Sơn La) tsênhv taz tov zuôr muôs 30 cxênhz njiêr yuôx shơư zênhz tsi trơưk chei. Txix co, iz txuz zuôr muôs zax zênhz lox muk lol đhâu tỉnh tâu qênhz pov. Chiê ruôr por tsês tâu txuz zuôr muôs zax zênhz no, taz viv tưz pôngz lok six ntâu six hơưv, hnuz nhôngs, côngz đas jos yơưz phơưz lênhx nênhs. Đhâu 3 luz hlik sir jos yơưz phơưz, txos hli 9/2019, Phongx Cảnh sát qênhz qênhz yuôx têx nênhs zax zênhz tưz hux jos đros Công an huyện Mai Sơn ntêk tâu Cứ A Páo, nhoz ntơưv xã Nà Bó, huyện Mai Sơn, sâu tsês tâu 100 ntâu njiêr yuôx shơư zênhz, iz traz fov K59 thiêz iz bak muôk txưr.

Txuôk lơưr co, txos hli 12/2019, cơ quan Công an tror ntêk tâu Sú Xênhv Hav, nhoz xã Mường Chùm, huyện Mường La (Sơn La). Iz luz hlik ntâu tov kaz, txix ntâu faz tsưr ziv, chor lưv lươngv công an tror ntêk tâu Vũ Trọng Đại, thâuv Đại tsênhv taz tov uô ntâuz ntơưr thor zuôr muk uô lox tôngv trâu têz qơưk Nhật Bản. Iz chas co, hux jos đros Công an TP Hà Nội xav tinhv Đặng Trọng Dũng li vax tsêr nhoz ntơưv xã Võng Xuyên, huyện Phúc Thọ, TP Hà Nội, chênhr zos lênhx nênhs Phongx Cảnh sát qênhz yuôx têx lênhx nênhs zuôr muôs zax zênhz tsi trơưk chei, Công an tỉnh Sơn La tsênhv yơưz phơưz, zok nriêr.

Đhâu iz hnuz iz hmo sox kaz, qênhz yuôx, công an tưz tsông tâu kror trôngx, muk hâur tsêr ntêk cxov tâu Đặng Trọng Dũng, sâu tsês tâu 100g ntâu zax zênhz cxuô zav, iz traz fov K54, 11 luz muôk txưr thiêz zuôr xar 50 tsov đeiv nhiêx, suôx câuv luôs hâux lưv yơưz phơưz, sơưr tơưv txênhz, phax tar chor nênhs zuôr muôs zax zênhz tsi trơưk chei đhâu 8 luz hlik ntâu qênhz yuôx.

Thôngz sâu hâur 5 shông đhâu, Phongx Cảnh sát qênhz yuôx chor nênhs zuôr muôs zax zênhz tsi trơưk chei, Công an tỉnh Sơn La tưz ruôr por tsês tâu 224 txuz, ntêk tâu 387 lênhx nênhs, sâu tsês zuôr xar 200 cir zênhz đơưz; 53 cir ntâu zênhz đuz; 663 cxênhz njiêr yuôx shơư zênhz; zuôr xar 13 cir zax zênhz poz jêz; 61 traz fov cxuô zav; 7.100 ntâu luz muôk txưr thiêz 27 luz hôngz poz đros trâu zuôr xar 4 tyv đeiv nhiêx.

Nhiv no, chor lưv lươngv Cảnh sát qênhz yuôx têx nênhs zuôr muôs zax zênhz tsi trơưk chei (Công an Sơn La) tsênhv tror sir jos uô luôs hâux lưv yơưz phơưz, tir thêir têx nênhs uô cxâuv chei têz qơưk, cxơưz sei six hơưv xav jênhv, qênhz yuôx, phax tir thêir têx txuz zuôr muôs zax zênhz tsi trơưk chei. Iz chas ntơư, ruôr por tsês, tsi chiê muôx yưv têx cuz nxor, phiv liv lok zax zênhz thiêz hux jos truôx đros têx cơ quan muôx vax huôv txơưr đuô sik côngv tsưr ziv tir thêir chiê txo grêk tsơưs têx nênhs fêv, zuôr muôs zax zênhz tsi trơưk chei, jux juk uô trâu thax tsav tox siêz Sơn La-Tây Bắc cov tsôngv pêx xênhv sơưr đơưk muôx luz nênhx truôx tuk, tsâu sor./.

(CTV-VOVTB-Riê Lâux cxeik)