Zok nriêr qơư nhoz truôx trâu yênhx cxênhz chuôz zis pêx xênhv tox siêz Sơn La

            Luz tsêr iz yôngx cxiv uô truôx khor, đar 35 xưv phaz xưv mênhv tưz tâu hlôngr trâu Quàng Duy Khanh, shux xênhz tsêr cơưv Phổ thông nội trú xênhz 2-cxênhx 3 Sông Mã luz tsêr tsar lơưx đaz tuôs, tsi truôx khor ntơư. Co zos poz huv jông mak canr bôv, chiến sĩ Zênhx Pênhz phax Trôngx đriv Chiềng Khương đros cxuô cơ quan, taz viv, nênhs siêz jông uô puz trâu tuz lênhv pênhz phax têx nhuôv puôs. Khanh chuôz zis lok six txov nhêv, Khanh niêv trâus muôx moz gênhk, tsuv muk chơưv kho moz tsi so, tsi muôx đas jos uô nox. Ntâu shông lok no, Khanh đros đaz lâul thiêz niêv têik nhoz uô nênhx hâur luz tsêr đaz tuôs, tsi truôx khor ntơưv xã ntus đriv Mường Sai, huyện Sông Mã, Khanh heik: “Cur lok six jông siêz thiêz shir phaz thâuv tâu nhoz hâur luz tsêr yiêz no. Uô tsâus ntâu txos chor txir nzơưv tuz lênhv tưz paz uô tsêr nhoz trâu cur chuôz zis, cur chos luk zuôr sir jos cơưv chiê tsiv nhos chor txir nzơưv têx cêr paz”.

          Têx luz tsêr yiêz tưz thiêz tsênhv gra lok cêr shir phaz trâu tsôngv box huyện ntus đriv Sông Mã, Sơn La. Cấp ủy, hâu nov ntơưv qơư tsênhv sir jos uô tiêr luôs hâux lưv paz uô tsêr nhoz trâu chor chuôz zis txov nhêv uô ntêx hli 4 shông no. Zơưv Nguyễn Đức Thiện, Phưv Chủ tịch Ủy ban huyện Sông Mã heik: “Huyện tưz fuô uô ntâu faz tsưr ziv, sir jos qênhz shuôs, thôngz sâu tsênhz mênhx chor chuôz zis pluôs, chuôz zis txov nhêv hâur thax tsav zuôr trâus tâu paz uô tsêr nhoz, taz por tsi yuôr chuôz zis tưs tsi tâu paz”.

             Têx hnuz no, phôngz yaox sik tưr 79 hnuz hmo “siz chos paz uô tsêr nhoz trâu têx chuôz zis pluôs, chuôz zis txov nhêv” shông 2025 tsênhv tâu fuô uô nhoz cxuô xã, thị trấn, cơ quan, taz viv hâur huyện Mường La. Thax tsav qơư sir jos paz uô tiêr zuôr xar 360 luz tsêr,hâur co zuôr xar 340 luz cxiv uô yiêz, 20 luz kho đuô hâur ntu no, qir txix hnuz xiêz 10/2. Zơưv Khương Thế Anh, Giám đốc Công ty tênhv tênhz Sơn La heik: “Thâuv txeik tâu Ủy ban huyện Mường La tsaz yênhx phuôx tôngv, công ty tưz heik txos trâu tas nro sơưr đơưk hâur công ty chiê sik đros paz max, lênhx tưs muôx li chas mak paz li ntơư, tus muôx ntâu paz ntâu, tus muôx tsơưs paz tsơưs”.

            Ntơưv tỉnh Tsênhv qơư kinh tế-chính trị, TP Sơn La cux tsênhv sir jos uô cov tiêr têx luôs hâux lưv tso tơưv. Lar heik, TP xav tinhv, chor chuôz zis pluôs, chuôz zis txov nhêv tâu paz uô tsêr nhoz zuôr ntâu đuô, tsi tiêk 60 ntâu chuôz zis pluôs, chuôz zis zuôr xar pluôs, nênhs muôx côngz trâu têz qơưk thiêx tâu paz xưz. Zơưv Hà Trung Chiến, Bí thư thành ủy Sơn La heik pâuz: “Tas nro têx chuôz zis pluôs, chuôz zis zuôr xar pluôs, nênhs muôx côngz têz qơưk....thiêz chor chuôz zis tsi muôx vax tsêr truôx khor nhoz cux zuôr tâu paz uô tsêr nhoz hur si”.

           Nhiv no, tỉnh Sơn La tsênhv yuôr 2 cxênhz ntâu chuôz zis zuôr tsuv tâu paz cxiv uô yiêz tsêr nhoz thiêz kho đuô xar muôx 300 luz, xav nhiêx txiêx paz uô tsêr nhoz trâu têx chuôz zis li heik sâuv tas 130 tyv đeiv ntâu. Thax tsav tox siêz đêz đrôngs, ntus đriv tsênhv yuôr ntâu txov nhêv, taz sik Sơn La xav tinhv luôs hâux lưv uô co hâur thax tsav lok six zov chênhr, hu lơưk tas nro côngv thôngx sơưr đơưk sik đros paz, côngv têk uô chiê sir jos uô tiêr tsêr nhoz trâu têx chuôz zis pluôs, chuôz zis txov nhêv uô ntêx hnuz 19/5 shông no./.

Lê Hạnh-Riê Lâux cxeik, nhênhv