Tsôngv pêx xênhv Yên Bái “pênhr” doanh nghiệp khơưz khoar cxax, viv uô ruôr hiêv txos luz nênhx

Tus đêx Nậm Lùng zos 2 tus đêx Nậm Kim thiêz Nậm Lùng ntưk lol uô cê yênhx tus đêx co, qir txix xã La Pán Tẩn  thiêz Cao Phạ, huyện Mù Cang Chải (Yên Bái). Tus đêx no zos tus đêx tsôngv pêx xênhv nhoz ntâu xã zôngv uô liêx têz, xênhz huôx hâur niêx hnuz, lar heik zos xã Tú Lệ, huyện Văn Chấn, suôv qơư zôngv txos 90% đêx chiê phưx vưv uô liêx têz, hâur co muôx 100 ha chos têx blêx kaz li: Séng cù thiêz blêx blâuv tsư ha Tú Lệ. No zos têx blêx, cxur kaz, nto bê thiêz tâu Cục sở hữu trí tuệ muôz ntơưr côngk nhav đas cir kriê qơư uô.

Taz sik, txix shông 2019 txos nhiv no, tus đêx co tưz tsi yuô nyiêz, tsi so trâul đro thiêz muôx iz tsok tsư nxiêz, lar heik zos têx hnuz ntux nas lox, đêx ziv trâul vuôz tsuôz, kiêk nênhs đuô. Iz lênhx pêx xênhv nhoz jok Côm, xã Tú Lệ heik pâuz:

“Iz, 2 ciêz mak đêx đro iz jiês thiêz tsư nxiêz hênhr. Têx đêx thâuv co pov đro li têx cuô ar”.

Trơưk li tsôngv pêx xênhv nhoz no, viv đêx đro li ntơư, têx shuôz njêk hâur tus đêx co cux trâul tuôs tas, txơưv tso đêx lok hâur pak njêl lok têx njêl hâur luz pak đêx co cux tuôs hur si, tso đêx trâu têx liêx têz blêx, blêx cux tuôs lok sik hloz tsi tâuk hlo. Tsi tas li ntơư, tus đêx no tsênhv uô ar têx liêx têz khor tơưr, uô tsi jông kôngz li thâuv ntêx viv li lênhx tưs cux cxơưx. Pos Hoàng Thị On, nhoz xã Tú Lệ heik:

“Kror liêx têz tưs zos đêx ntưk lol mak tưz uô tsi tâu kôngz lơưv, uô blêx lok blêx kruôr njưk tuôs jux juk tas, tưz tsi lox”.

Zơưv Lò Văn Đức, nhoz jok Phạ Dưới, xã Tú Lệ heik pâuz: Txix thâuv têx cxur blâuv tsư ha Tú Lệ muôx suôz bê nto, ntâu  lênhx chôngz tus pâuz txos, tsôngv cưr tix nênhx tsa sơưr đơưk luz nênhx tưz nhoz khênhr đuô, tsi yuô txov nhêv. Taz sik, thâuv Công ty Thịnh Đạt tuôx tsiv uô khoar cxax pêv hâur đêx Nậm Kim, uô vuôz tsuôz, kiêk nênhs đêx mak têx cxur Tú Lệ uô tâu cux tsi yuô kaz thiêz txơưv uô lok tsi jông, hlêis sâu cux tsi tâu nju. Zos tsi nzor khưx phưx têx tsi jông heik sâuv, zuôr uô ruôr hiêv lox txos tsôngv pêx xênhv luz nênhx thiêz cêr huôv tsar uô nox:

“Công ty têx kiêk nênhs, vuôz tsuôz ntưk lol uô ruôr hiêv, tsi jông txos têx kôngz. Thâuv ntêx uô tâu blêx, cxur nox kaz, tsư ha, nhiv no mak tsi thôngx li thâuv ntơư lơưv”.

Zơưv Phùng Thế Hanh, Chủ tịch Ủy ban xã Tú Lệ, huyện Văn Chấn heik pâuz: Uô ntêx thâuv zuôr ntưk lol trâu pak đêx tênhv, tus đêx Nậm Lùng no ntưk đhâu têx jok li: Búng Sổm, Phạ Trên, Phạ Dưới, Nà Lóng, Pom Ban, jok Côm…..hâur xã. Đhâu heik pâuz thiêz qir qênhz yuôx shuôs tsênhv tsênhz, xã tưz muôx lul heik trâu têx hloz thênhv siêz lok têx đêx trâul kiêk nênhs, vuôz tsuôz ntơư:

“Têx đêx đro kiêk nênhs, vuôz tsuôz tsi nyiêz li thâuv ntêx, xã tưz muôx ntâuz ntơưr xa trâu huyện Văn Chấn thiêz Mù Cang Chải chiê qênhz shuôs qir tiv seiz zos viv li chas thiêz thor têx tsưr ziv chox kriê. Đros thiêz xã li pưs txux, hâux lưv muôx tsi txâuk txux chi chiê ntâuk grê têx co, lok six xar cov têx cơ quan muôx vax huôv tâu phênhz côngz, muôx txâuk txux chi tsưr ziv, chuôz zênhx uz no….paz ntâuk grê, phênhz tsênhz mênhx seiz chor đêx co pok uô ruôr hiêv li chas”.

Txix tsôngv pêx têx mông heik pâuz, chor sâu xor xưv Đeix nta suôz Việt Nam (VOV) tưz muk txos trâu thax qơư công ty tsiv uô khoar cxax, uô ruôr hiêv txos tsôngv pêx xênhv nhoz xã Cao Phạ, huyện Mù Cang Chải luz nênhx xênhz huôx. Qơư khơưz khoar cxax co nhoz hâur iz luz cưx ha, jê ntus đêx, iz saz zos har jôngr lâul, iz saz zos trôngz poz jêz siêz. Trơưk li seiz njiê, muôx ntâu qơư nquôr têx vuôz tsuôz hâur co, lar heik zos 2 qơư trâu têx kiêk nênhs, vuôz tsuôz nhoz jê tsêr meir  ntơư. Iz qơư tưz trâul tơưs njưs, tsi muôx đêx, tsuôk pov têx poz jêz; iz qơư cê tâu khơưz puôz, cê tso đêx kiêk nênhs ntưk trơưk trôngz trâu đrav đêx. Đrav kaz ntơư zos têx tus đêx mê ntưk trâu tus đêx Nậm Kim.

Shông 2019, Sở tênhx qơư tỉnh Yên Bái thiêz Ủy ban xã Tú Lệ tưz uô hâux lưv đros Công ty Thịnh Đạt thiêz taz viv no tưz cir ntơưr, chos luk zuôr uô qơư trâu têx kiêk nênhs, vuôz tsuôz cov truôx tuk, tsi uô ruôr hiêv txos hâur đêx, tênhx qơư, taz sik txix thâuv co txos nhiv no cux tsênhv muôx yưv têx tsi jông li heik sâuv./.