Jêx jok hlôngr yiêz khov muôx têz qơưk chor tsaz yênhx yưv pênhr paz

Hâur têx shông đhâu, đros kriz uô truôx jông lơưr Đảng, têz qơưk têz cêr chêi, tỉnh Yên Bái tưz tso tơưv, kriz uô ntâu tsênhv chêi mênhx cxưx sâuv thax tsav; hâur co tsêx trung yưv pênhr huôv tsar kinh têr-xar hôiv; tuôr tsês chiê thiêz phuôx huiz tsiv gri vênhx huôv cxôngx nzor, taz por ngaz tuk côx phax thax tsav tsôngv box mênhx cxưx tsơưs nênhs thiêz tưz uô tâu jông lok ntâu kror. Chor chuôz zis pluôs tas nro tỉnh grêk tsơưs txix 32% (shông 2016) txos yuôr 7% ntâu shông 2020. Hok ntơưv têx huyện pluôs li Mù Cang Chải shông 2016 zos zuôr xar 67% mak shông 2020 tưz grêk tsơưs txos yuôr kik đuô 9%. Yên Bái tưz tso tơưv têx tsênhv chêi paz, hâur co muôx tsênhv chêi paz uô kôngz jôngr thiêz đêx nuv lơưr HĐND tỉnh li Nghị quyết 69.

Tâu paz 8 triệu đêiv lơưr HĐND tỉnh Yên Bái li Nghị quyết 69, tix lâus Dờ Xênhv Zax nhoz jok Púng Luông, xar Púng Luông, huyện Mù Cang Chải, tỉnh yên Bái tưz yưv pênhr chiê uô tsêr guôx thiêz tu zus 30 tuk yil. Khov sir jos cơưv shâuv têx kỹ thuật tsưr ziv tu zus đhâu chor lớp kruôz kriê thiêz đhâu têx ntâuz ntơưr, pov chir viv li tix lâus chor yil  hloz lox thiêz huôv tsar jông, paz chuôz zis muôx nzir phênhv sâu thiêz zuôr uô bluô nux tâu. Txix uô tâu xuz thơưx tix lâus Dờ sêiz lax đros pox niêv sir jos huôv tsar chor yil cov muôx txos 100 tuk hâur ntu zuôr txos. “Iz tuk  yil iz shông xav tas cxuô kror zuôr paz trâu zuk sâu tâu 400-500 cxênhz đêiv. Thâuv pêx xênhv nhoz tox siêz, đêz đrôngs tâu paz, mak cux zos iz kror tsưr ziv chiê paz trâu pêx xênhv txo grêk cêr yêiz pluôs”.

Niêv tix Vũ Thị Minh Thủy nhoz jok Ngã Ba Kim, xar Púng Luông ziv chuôz zis cux tâu paz 15 triệu đêiv lơưr HĐND tỉnh Yên Bái li Nghị quyết 69 chiê huôv tsar tu zus, đros qơư zus muôx 3 tuk mâuv buô sha mê nhuôv thiêz 20 tuk buô muôs grêix. Gruôs thiêz sir jos uô nox ho tâu cxuô cấp chinhr quyền txoz cxơưz txos tsưr tsix chor lớp kruôz kriê lok kỹ thuật tu zus viv li tsêiz no chuôz zis tưz muôs tâu muôx 3 tấn ntâu buô grêix sâu tâu lok 200 triệu đêiv ntâu. Niêv tix Vũ Thị Minh Thủy hêik: txix phênhv sâu no tưz tsik zos paz trâu niêv tix chuôz zis hla đhâu cêr pluôs, mak têx tuz nhuôs tsênhv tâu muk cơưv ntơưr cxix cxuô, luz nênhx cux tsik yuô  txov nhêv lơưv: “Zos tiêk tsik muôx caz moz huôv xênhz, uô nox tâu truôx li no mak kinh têr lok six truôx tuk. Vav tiêk chuôz zis zuôr tror tâu paz têx pênhr nhiêx chiê tu zus cov ntâu đuô”.

Huyện Mù Cang Chải tưz sir jos yax kriê, hêik chor chuôz zis sir jos đăngk cir uô chor tsưr ziv tu zus cov huv đros trâu yênhx ziv chuôz zis. Txos nhiv no, huyện tưz muôx 86 ziv chuôz zis đăngk cir đros tas nro nhiêx txiêx muôx 1,4 tiv đêiv ntâu. Khov co, tas nro huyện li chor tsiêx cxu tâu muôx 73.000 tuk. Zơưv Vax Bua Tủa, Chủ tịch UBND xar Púng Luông, huyện Mù Cang Chải puz pâuz:“Thâuv muôx chor pênhr no mak phênhv ntâu chor chuôz zis pluôs tâu txêik pênhr, hâur co chuôz zis tưs cux muôx nhux tưv chiê tu zus, paz trâu chor chuôz zis hla đhâu cêr pluôs jux juk. Muôx têx chuôz zis cux sir zôngv chor pênhr nhiêx co chiê kriz đar tsưr ziv tu zus”.

Huyện Mù Cang Chải xav jênhv tror sir jos yax kriê Nghị quyết 69 li tsênhv njiêz, tsênhv chêi paz txos trâu pêx xênhv sâuv thax tsav pâuz; sir jos cxiz tsa, kriz uô chor tsưr ziv chos kôngz lôngk, tu zus têx zav kôngz thiêz tsiêx cxu kaz jông muôx ntơưv thax tsav qơư li kêiz đuz grêis, buô, yil, txir tuôz ziz, txir hơưk….chuôz cxaz uô choz zok kỹ thuật, paz chiê txêik tâu pênhr nhiêx cux li têx tsưr ziv lok tsoz phưz, phax tar caz moz, vêv xênhz tênhv qơư; tror hêik chor hợp tác xã kôngz nuv sâuv thax tsav sir jos đăngk cir têx tsưr ziv uô nox lơưr saz muôx tsiv gri siêz đuô.

Lơưr zơưv Đỗ Văn Chiến, kuz Chủ nhiệm-Bôv trưởng Ủy ban Mênhx cxưx (nhiv no zos Chủ tịch Ủy  ban Trung ương MTTQVN) mak đề án no muôx:“Đề án no tsênhv njiêz uô zos uô 10 dự án thiêz xav mak muôx 3 kror yiêz. Kror tiv iz zos phênhz tsênhz đuô thax tsav mênhx cxưx tsơưs nênhs thiêz tox siêz, xav jênhv tsênhv mênhx têx thax tsav qơư txov nhêv tiv zix chiê txix co tsêx trung yưv pênhr cov huv zos paz uô tâu nox truôx jông, paz huôv tsar tâu pênhr jos trâu thax tsav tsôngv box mênhx cxưx tsơưs nênhs thiêz tox siêz. Uô nox no mak đros đrêiv pêz krir chênhr zos: huôv tsar kinh têr jôngr nuv, por vêv thiêz huôv tsar jôngr; tu zus, huôv tsar paz txiêx cxu lơưr yênhx thax tsav qơư; paz uô nox txix têx zav sâm thiêz yuôx đrox njuôz tsiv gri huv đros trâu đêx ar ntơưv yênhx thax tsav qơư. Đơưk kho têx phiv liv tiv zix trâu pox niêv thiêz nhuôs zâu thax tsav mênhx cxưx tsơưs nênhs thiêz tox siêz. Đros co zos đơưk kho têx kror li siz zuôr cxênhx jêx, siz zuôr nzor thiêz tso tsês têx phongx cxưx pôngz kaz; tsêx trung huôv tsar zoz zux, y têr chiê gra siêz tsơưr lươngv dân sôr thiêz tox siêz”.

Tsaz yênhx tsưr ziv têz qơưk Huôv tsar kinh têr-xar hôiv thax tsav tsôngv box mênhx cxưx tsơưs nênhs thiêz tox siêz ntu 2021-2030 tâu kriz uô zuôr paz uô hlôngr yiêz siêz xar, tsưr ziv uô thiêz paz trâu tsôngv box mênhx cxưx tsơưs nênhs sir jos cov hla đhâu cêr pluôs hâur luz nênhx./.

(Giàng Seo Pùa-VOV4-Lik Thox cxêik nhênhv)