Jax thưr 5, hnuz 25/2/2016:

Sơn La khưx phưx têx trâus uô ruôr hiêv lok kôngz lôngk đhâu jiês ntux lok đâuk tê

Têx tox trôngz hâur pêk ntơưv thax tsav jok Ót Luông, xã Chiềng Cọ, TP Sơn la têx hhnuz no seiz kror tưs đrox tsuôs, cà phê cux tuôs tas, kruôr gis guôr zos jiês ntux lok đâuk tê uô hiêv hâur kaz hli iz nhiv kruôr đhâu. Hur si jok muôx 140 ntâu ha têz cà phê trâus uô ruôr hiêv hnhar.

Tsôngv box nhoz no nhiv kruôr đhâu tưz tok nox iz luz tsiêz 30 tsi shir phaz, lov jêv li cxiê sông, đros trâu têx cêr cxơưx, moz siêz viv têx têz cà phê trâus đâuk tê tuô tuôs tas. Moz siêz, khur xiv têx txir cà phê, hur si niêv lâuk Tòng Thị Huyền chuôz zis tưz hu têx cưr tix nênhx tsa đros sâu đê têx txir cà phê tsênhv yuôr, đros siêz vav xar njôngr sâu đê tâu li chas zuôr li ntơư:

“ Jiês ntux lok đâuk tê nhiv kruôr đhâu tưz uô hiêv tas ntâu tsôngv box hâur jok têx cà phê, cur chuôz zis muôx 5 ha mak cux trâus đâuk tê uô ruôr hiêv tas. Nhiv no tsuôk pâuz thor têx cưr tix nênhx tsa sơưr đơưk hâur jok muk đros paz sâu đê seiz tâu li chas, zuôr li ntơư. Tas nro cur chuôz zis tsuôk pâuz tok txos têx têz cà phê no xưz, têx shông zuôr txos mak tsi muôx txir sâu đê, shor luz nênhx zuôr jông li chas, txov nhêv cơưk”.

Xã Chiềng Cọ, TP Sơn La muôx zuôr xar 750 ha têz cà phê, muôx txos 540 ha trâus đâuk tê uô hiêv tas. Trâus uô ruôr hiêv hnhar đuô hur si zos jok Ót Luông, Ót Nọi, phênhv ntâu têx têz cà phê hâur jok puôr lênhx tuôs, tsi jông tas. Nhiv no tsôngv box têx jêx jok tsênhv zênhx max muk sâu đê têx txir cà phê tsênhv yuôr iz kro mê njik thiêz txiêr têx tsoz cà phê tuôs tas lok tuv trâu têx hâur pâuk lơưr canr bôv cxiz kôngz tsưr ziv kriê đros siêz vav xar njôngr têx cà phê zuôr hlar, hloz tâuk tuôx chiê txi txir trâu chiv tov kaz.

Ntâu ziv chuôz zis tsôngv box hâur xã Chiềng Cọ tưz kêr txeik nhiêx têz qơưs chiê yưv pênhr uô têx têz cà phê, chor  nhiêx txeik ntơư ndê txos yênhx puô tsov đeiv. Zos têz qơưs tsi muôx chei, cui tinhv li: tso txeik ntêr thiêz txeik paz huôv tsar uô nox mak tsôngv box zuôr tror njiz trâus ntâu phiv liv, viv têx nhiêx txeik lok six ntâu. Zơưv Lèo Văn Hường, tsar jok Ót Luông, xã Chiềng Cọ, TP Sơn la heik:

“ Lok sâuv tsôngv box têx cà phê, mak 4 shông thiêx uô tâu li no. Khav tinhv 4 shông tov kaz thiêz thiêx muôx têx uô tâu. Chênhr viv li heik tsêr nhiêx têz qơưs, truz ntêr hnuz nhôngs kêr txeik têx nhiêx ntơư trâu pêz tsôngv box, tsôngv box tsênhv kêr txeik nhiêx têz qơưs lok yưv pênhr uô cà phê. Zos tsi uô cà phê mak zuôr tso chos têx tsoz chos txơưr đuô trâu, thiêz têx ziv chuôz zis pluôs lok zuôr iz hnuz ntâu jux juk”.

Hâur jiês ntux no njiv hênhr nhiv kruôr đhâu, ntơưv tỉnh Sơn La tsôngv box yênhx cxênhz ha kôngz lôngk, jâuz tâuv trâus tuôs tas. Têx liêx têz trâus uô ruôr hiêv mak lax khưx phưx tâu, tsôngv box tox siêz luz nênhx tưz txov nhêv lok ziv trâus txov đuô. Zơưv Nguyễn Quốc Khánh, Phưv Chủ tịch UBND tỉnh Sơn La heik:

“ Tỉnh tror fuô kriê têx faz tsưr ziv zov chênhr uô ntêx, lar heik zos khưx phưx, kho têx kôngz, tsiêx cxu trâus uô ruôr hiêv chiê taz por truôx tuk luz nênhx trâu tsôngv box. Lok sâuv muk ntêr, tỉnh zuôr heik trâu têx cơ quan T.Ư, muôx tsưr ziv paz nhiêx đros têx nhiêx ntơưv qơư chiê paz cxiv kho, zuz nôngz kôngz, tsiêx tu zus trâu têx lênhx tsôngv box trâus uô ruôr hiêv”.

Têx tsưr ziv khưx phưx chiê chơưv paz têx cà phê thiêz ntâu liêx têz kôngz lôngk txơưr đuô tưz thiêz tsênhv tâu sir jos uô, hâux lưv chos cxaz thiêz hlôngr chos đuô lưv zav kôngz lur hnuz nhôngs li: jâuz tâuv tsênhv tâu fuô uô. Muôx têx khav tinhv, hâur chiv kôngz zuôr txos, tsôngv box ntơưv têx thax tsav qơư trâus uô ruôr hiêv tiv đâuk tê zuôr njiz trâus lok six ntâu phiv liv, thâuv têx kôngz tsi tâu hloz, tsi tâu jông sâu, zos tsi muôx têx chei, tsưr ziv paz zênhx max./.

                                                 (Thanh Thủy-Riê Lâux cxeik, nhênhv)