Lênhx txir nênhx nênhs Ê đê xênhz lok tưz trâus đis muôk

li siêz xar sir jos

          Txir pôngz lơưv nzor, chuôz zis tsuôk yuôr niêv thiêz iz tul tix lâuk trâus đis muôs thâuv nhiv kruôr xênhz zus lok, ho khênhr trâus moz gênhs, viv li cxôngx thâuv tsênhv zâu, txơưv kror muôk tsi yuô pov cêr, zơưv Y Côn Bkrông (mênhx cxưx Êđê) nhoz jos Kla, xã Drai Sắp, huyện Krông Ana, tỉnh Đăk Lăk tưz yênhx lênhx nênhs lox tôngv tsênhv hâur chuôz zis.

          Khov muôx pênhr xưv thiêz nhiêv ntâuk cxuô zav trax, tâu kuz nhạc sỹ Y Moan kriê, viv li Y Côn tưz chiv chir cơưv shâuv ntâus ghi-ta, ooc-gan...Tsôngv box hâur jos lok six nhiêv zơưv li suôz trax, suôz cưr cxiêx hâur têx hnuz tsưr tsix ntênhs nox yôngz, ntênhs phêv...

          Taz sik, phênhv sâu cxôngx hâux lưv mul heik cưr cxiêx, heik gâux tsi paz tâu trâu Y Côn tsoz phưz chuôz zis. Viv li, shông 2014, zơưv truôx siêz cxaz chuôz Hội nênhs trâus đis muôs huyện Krông Ana thiêz tâu cơưv shâuv ntơưr tsês trâu nênhs trâus đis muôs, shâuv cxaz hâux lưv juôx chêr. Trâus đis muôs, tsi muôx nhiêx txiêx chiê krêz qơư juôx chêr, Y Côn mul juôx chêr thâuv muôx lênhx nênhs muôx zoz qơưx chiê muôx cxaz phênhv sâu.

          Lơưr zơưv Y Côn, cxôngx thâuv cxaz chuôz Hội nênhs trâus đis muôs, zơưv luz nênhx tưz muôx ntâu hlôngr yiêz. Pâuz ntơưr paz zơưv pâuz ntâu đuô lok têx lênhx nênhs cux trâus đis muôs li zơưv li luz nênhx, seiz co zos đas jos chiê sir jos ntâu đuô hâur luz nênhx.

          “Muôx tâu têx hlôngr yiêz lox, pir li nhiv no cur tâu mul cxaz chuôz têx jiês khiêz phêv nhoz tỉnh hội thiêz cur chiv chir sâu tâu pov cov zuk li yênhx tix, chiv chir nriêr tâu nhiêx txiêx, muôx ntâu fôngx zưs thiêz paz tâu trâu cur niêv tưz lâuk. Thâuv muôx hâux lưv uô ngaz tul thiêx li muôx tâu nhiêx txiêx”.

          Txơưv luz nênhx tsênhv txov nhêv taz sik Y Côn zos lênhx nênhs jông siêz. Đros thiêz têx lênhx nênhs pluôs, shux xênhz lok sik nênhs lâuk trâus moz gênhs, zơưv puôr lênhx paz juôx chêr tsi zuôr nhiêx txiêx. Zơưv Nguyễn Văn Sơn, chủ tịch Hội nênhs trâus đis muôs huyện Krông Ana puz pâuz, zơưv Y Côn zos lênhx nênhs gruôs cơưv shâuv thiêz jông siêz, tâu ntâu lênhx nênhs tsôngv box hâur jos hluz, zos đeiv iêr chi cax luk chiê têx hội viên txơưr cơưv shâuv uô lơưr.

          “Y Côn zos lênhx nênhs trâus đis muôs cxôngx thâuv nhiv kruôr xênhz zus lok, taz sik zos lênhx nênhs gruôs cơưv shâuv. Tâu hội paz viv li Y Côn tưz truôx siêz cơưv ntơưr tsês trâu nênhs trâus đis muôs. Lok cxuô lênhx nênhs hâur jos mak cur pov Y Côn lok six jông siêz paz têx lênhx nênhs txov nhêv. Cur pov têx lênhx nênhs hâur jos kruôk ntâu txos Y Côn. Pir li nhiv kruôr đhâu Y Côn shâuv tâu juôx chêr tsoz phưz đas jos côngv thôngx Y Côn tưz paz ntâu lênhx nênhs mak tsi zuôr nhiêx txiêx hlo”

          Muôx tâu iz âhux lưv uô chiê muôx phênhv sâu tâu, txơưx nhênhv ntơưr, sâu ntơưr, zơưv Y Côn li cêr shir phaz ziv chuôz ndê thâuv tưz muôx 50 ntâu, zơưv nriêr tâu lênhx pox niêv đros paz tsoz phưz zuk niêv, zuk tul tix lâuk thiêz zơưv. Pos HBơk HĐơk, lênhx pox niêv nhoz côngv jos hluz zơưv Y Côn tưz thôngx ziv uô zơưv pox niêv thiêz sik đros cxiv kho chuôz thênhx. Pos HBơk heik, pâuz txos zơưv Y Côn cxôngx nzor lok, taz sik txos kaz shông tsêz no lơưr thiêx siz zuôr uô txix gơưv:

          “Thâuv ntêx cur cux pov tâu zơưv zos lênhx nênhs jông, paz max ntâu lênhx nênhs txơưr. Thâuv nưs mul cơưv ntơưr thiêz cơưv shâuv hâux lưv thiêz txơưx uô hâux lưv juôx chêr mak cur ziv hluz nưs đuô. Cxôngx no txos tov kaz no ưz 2 niêv txir cux xar njôngr muôx qơư nhoz truôx tul, xar njôngr cur tul txir zuôr paz tâu ntâu lênhx nênhs đuô tuôx cơưv shâuv hâux lưv. Li ntơưv mak cur jông siêz hênhr lơưv”.

          Tâu Hội nênhs trâus đis muôs paz max, shông 2018, Y Côn cxaz chuôz Đeix xa đuôz Vĩnh Long li iz tsaz yênhx truyền hình thiêz jênhv tâu chor nhiêx txiêx paz txưv zos 43 tsov đeiv. Zơưv tưz zôngv chor nhiêx txiêx co zuôr chuôz zênhx juôx chêr thiêz ntiêr iz qơư krêz qơư juôx chêr jê tsêr nhoz, cê uô hâux lưv cê tsoz phưz tâu zuk niêv thiêz zuk tix lâuk. Pheiz kênh lok têx siêz xar njôngr ntu tov kaz no, zơưv Y Côn puz pâuz, zơưv xar njôngr nhiv no muôx txâuk nhiêx txiêx chiê cxiv uô tâu iz qơư juôx chêr jê tsêr nhoz chiê cê muôx qơư uô hâux lưv ngaz tul, cê zuôr tâu têx trax chiê kruôz kriê trâu lênhx tưs nhiêv têx suôz trax co./.

(VOVTN-Txâur Vax cxeik nhênhv)