Saz pênhz Quàng Văn Sơn côngv jos paz cxiv tsa jêx jok yiêz

Tưz 50 ntâu shông đhâu, zơưv Quàng Văn Sơn cux tsênhv ndo njôngr txos jiês ntâuk tros châuz Mỹ ntơưv qơư ntâuk tros châuz Phong Xa Lì, têz qơưk Lào, shông 1969. Hâur jiês uô hâux lưv thâuv thâux xa chor canr bôv sêiz car txix cêr đêx, zơưv Sơn thiêz sơưr đơưk trâus tros châuz chor yêz za pov thiêz  tso bôngk lok zos tsuôv tav lok ntâuk. Chor bôngk tơưs za tuôx uô zơưv Sơn trâus saz hnhar ntơưv njêx muôs, xuz pưs thiêz chax đaz. Txơưv trâus saz hnhar taz sik zơưv Sơn cux sir jos đros sơưr đơưk ntâuk tros châuz thiêz tuô pôngz tros châuz iz luz yêz za T28. Shông 1976, zơưv Sơn tâu chiê tror lok ntơưv zuk qơư nhoz thiêz trôr uô côngz xưv thâux xa cxuô lênhx nênhs sâuv cêr đêx trâu xar Mường Bú thiêz huyện Mường La. 10 ntâu shông tov kaz, zơưv sos lâul thiêz đros pox niêv mê nhuôs huôv tsar uô kinh têr chuôz zis:

“Thâuv tror lok tsêr mak cur trâus saz, cur cux hêik kriz uô têx liêx trơưk chor ntus đêx chiê chos blêx cov truôx tuk luz nênhx, txoz cxơưx trâu luz nênhx thiêz paz muôx txâuk nox, hnar trâu têx tuz nhuôs…”

Njiz ntâu kror phiv liv, taz sik zơưv Sơn cux sir jos khưr uô nox. Zơưv sơn chuôz zis huôv tsar tu zus nhux đas txix 4 txos 5 tuk; zus yênhx puô tuk kêiz tso vax; chos xar muôx 1 héc ta txir lưv tsiz sôngz, txir mo môngk. Tsuôk ciês shông 2020, zơưv chuôz zis muôs 5 tuk nhux đas, 700 ntâu tuk kêiz, yênhx châuv tấn txir lưv tsiz sôngz, txir mo môngk, sâu tâu lok xar muôx 200 triệu đêiv:

“Cur cux tsik so hêik cov paz trâu chor chuôz zis txơưr hâur jok, cux li hâur chi bộ tsik tâu truôx tuk lok kinh têr, luz nênhx cov uô chak lok muôx tâu luz nênhx jông, jêx jok hênhr, bluô nux mak têz qơưk thiêx bluô nux tâu”.

Tưz muôx 82 shông, saz pênhz Quàng Văn Sơn cux tsênhv muôx jos, ndo njôngr, tsik so uô ntêx hlo hâur têx phongz yaox ntơưv thax tsav qơư. Zos nênhs muôx côngz bê hâur côngv thôngx, zơưv tsik so yax kriê, hêik pêx xênhv sơưr đơưk đros cxaz chuôz cxiv tsa luz nênhx vênhx huôv, taz por ngaz tuk sâuv thax tsav; sir jos hlôngr yiêz tsoz chos, tsiêx tu zus. Zơưv Sơn cux tsik so phêiz kênh chênhz zênhv, paz trâu chor chuôz zis txov nhêv hâur jok, hâur xar chiê jux juk huôv tsar kinh têr, muôx tâu luz nênhx truôx tuk, paz trâu xar Mường Bú zos yênhx iz hâur chor xar xuz thơưx ciês uô tiêr cxiv tsa jêx jok yiêz nhoz huyện Mường La. Zơưv Đặng Huy Toàn, Chủ tịch Hôiv Bôv đôiv lâul huyện Mường La, tỉnh Sơn La puz pâuz:

“Hloz Quàng Văn Sơn zos iz lênhx cán bộ Đảng viên, zos iz lênhx cán bộ bôv đôiv lâul uô ntêx hlo, phuôx huiz tâu jông zos lênhx cán bộ lâul Hôx; so lâul lok hloz cux sir jos huôv tsar kinh têr chuôz zis thiêz kruôz kriê têx tuz nhuôs hâur chuôz zis, cux li hêik cxuô lênhx hâur chi hôiv, jok Giàng xar Mường Bú sir jos uô tâu jông hâur cxiv tsa jêx jok yiêz shông 2018”.

Txơưv trâus saz, zơưv Quàng Văn Sơn cux sir jos uô bluô nux trâu chuôz zis thiêz têz qơưk. Zơưv Sơn chuôz zis kror tsưr ziv thiêz têx sir jos hâur uô nox zos iz kror lok six jông, zos qơư chiê trâu cxuô lênhx saz pênhz thiêz sơưr đơưk cơưv shâuv chiê uô trơưk cov huôv tsar tâu kinh têr paz trâu chuôz zis./.