Uô truôx jông mênhx cxưx tsơưs nênhs li vax huôv bâux xêir

Lơưr Grê 27, Hiến pháp shông 2013 hêik mênhx: Chor nênhs txưv 18 shông tror sâur muôx vax huôv tâu bâux xêir thiêz txưv 21 shông tror sâur mak muôx vax huôv chiê zuk tâu nhoz hâur Côx hôiv lok sik trâu luôs xêir nhoz hâur Côx hôiv, Hôiv đôngx cxuô cấp. Hâur têx six cxiv Côx hôiv, HĐND cxuô cấp, cxuô thax tsav qơư zênhx sir jos uô jông cxuô mênhx cxưx tsơưs nênhs li vax huôv bâux xêir no.

Tsênhv tsênhz, hâur six cxiv Côx hôiv khóa 14, muôx 86 lênhx têiv plor tâu bâux xêir (tsav muôx 17% ntâu). Uô ntêx co, hâur 4 six cxiv Côx hôiv jê lok no, chor têiv plor zos mênhx cxưx tsơưs nênhs tsav txix 15% ntâu txos 17% ntâu (pir đros dân số zos 14% ntâu). Li co, chor nênhs tâu bâux xêir uô têiv plor Côx hôiv zos mênhx cxưx tsơưs nênhs tsik so siêz đuô pir đros dân số.

Taz sik, txix thâuv ntêx txos nhiv no, đhâu ntâu khóa cux tsênhv muôx tsik tâu cxix cxuô 53 zav mênhx cxưx tsơưs nênhs hâur Côx hôiv, kror no cux tưz uô phiv liv txos chor mênhx cxưx tsik muôx nênhs nhoz hâur cơ quan lập pháp siêz tiv zix têz qơưk.

Chiê khưx phưx têx phiv liv co, mak tsuv muôx cấp ủy Đảng, Chính quyền li chox kriê truôx jông, thôngx ziv thiêz chor cơ quan ban, nganhx, Mặt trận têz qơưk Việt Nam li sir jos thôngx ziv đros hâur côngz xưv bâux xêir. Taz sik đuô hur si, yênhx lênhx cử tri mênhx cxưx tsơưs nênhs tsuv sir jos uô zuk pưk txux, sêiz hâux lưv bâux xêir zos iz kror vax huôv tsuv uô thiêz zov chênhr. Zơưv Thái Mạnh Trí, Tsar jok nhoz xar Gio Mỹ, huyện Gio Linh (Quảng Trị) hêik: “Cur tsuv tsik so muk yax kriê hêik trâu pox nhuôs pâuz lok bê ntơưr chor nênhs tsuv tâu bâux xêir thiêz lơưr ntu nênhx txux chi bâuv li cak”.

Têiv plor Côx hôiv thiêz têiv plor HĐND zos têiv plor uô hâux lưv paz trâu pêx xênhv. Viv li, pêx xênhv zênhx muôx pưk txux lox hâur cxuô kror, cxuô ntu, tsưr ziv bâux xêir. Khov trâu pêx xênhv, mnôngs pêx xênhv têx luk hêik, siêz xar chiê xêir tsov chor cán bộ, chor nênhs chiê trâu sơưr đơưk bâux xêir uô têx hâux lưv hâur bôv mêir Chính trị cxuô cấp, hêik pâuz chiê bâux xêir uô têiv plor Côx hôiv, têiv plor HĐND cxuô cấp zos Đảng li iz kror tsưr ziv uô jông hâur côngz xưv cán bộ. Pos Nông Thị Lan nhoz Lạng Sơn puz pâuz, đros têx sir jos uô jông hâur mênhx cxưx tsơưs nênhs li côngz xưv yax kriê lok bâux xêir, tsôngv box li jênhv pâuz lok hâux lưv no tưz tâu gra siêz đuô, côngz xưv bâux xêir cux tâu pox nhuôs uô jông sêiz thiêz xêir tsov jông: “Pêz tưz pâuz đuô lơưv viv tưz tâu yax kriê, hêik pâuz hâur ntu đhâu. Iz zav li Côx hôiv bâux 10 lênhx mak pêz xêir tsov 8 lênhx muôx txâuk txux chi, tsưr ziv uô jông chiê paz trâu têx qơưk”.

Chiê uô tâu li tsưr ziv tưz tso tơưv, ntâu thax tsav qơư kriz uô ntâu zav tsưr ziv yax kriê li rêik fiêx, ntâuz piêr pâuz, yax kriê ntơưv têx tsênhv qơư xar, chor qơư bâux xêir; tsik so nta suôz chor xor mông hêik lok Chêi Bâux xêir, cử tri li vax huôv thiêz jênhv vưv đhâu cxiv luôs loa nta suôz…Thôngx cxix chox kriê chor cán bộ uô côngz xưv mênhx cxưx sik côngv đros cxuô thax tsav qơư muk yênhx ziv chuôz zis chiê hêik kriê, nus lok hâux lưv bâux xêir, txix co paz trâu pêx xênhv pâuz tsênhz đuô lok vax huôv thiêz jênhv vưv hâur hâux lưv bâux xêir.

Đros co, tsuv sir jos cov muôx txâuk li Chêi Bâux xêir cui tênhv, hâur co tsuv muôx tsơưs tiv zix 18% tas nro chor nênhs hâur bê ntơưr chênhr chor nênhs bâux xêir uô têiv plor Côx hôiv zos mênhx cxưx tsơưs nênhs. Xar uô tâu li, tsuv qênhz yuôx, paz chiê cov cxuô mênhx cxưx tsơưs nênhs tsik tâu muôx nênhs hlôngr njêx muôs zuk mênhx cxưx hâur chor khóa Côx hôiv thâuv ntêx no hêik pâuz chor nênhs muôx txux chi hlôngr njêx muôs trâu zuk mênhx cxưx tâu bâux xêir nhoz hâur Côx hôiv khóa 15 zuôr txos./.

(VOV4-Lik Thox cxêik nhênhv)