Phênhv viv nhuôv zâu

Hêik kriê tir thêir tsik chiê chor nênhs fêv zuôv têx nhuôv nxêik uô đaz uô tuôs (Oz luz suôz)

Chor uô niêv uô txir tsuv kriê mê nhuôv pâuz tir thêir tsik chiê chor nênhs fêv zuôv têx mê nhuôv nxêik uô đaz uô tuôs.

Tsênhz mênhx thiêz uô ntêx hlo zos tsik chiê chor nênhs fêv xuôk thiêz flưk têx mê nhuôv nxêik zâu oz luz tâuz kaz lok zos oz luz poz njas thiêz tsik chiê flưk oz cxêik ndêx puôz, faz xuz ntiês thiêz tsik chiê têx nênhs fêv nưx mê nhuôv luz kror ndâux mak chor nênhs fêv thiêx tsik uô ruôr hiêv txos cxuô lênhx mê nhuôv nxêik li têx qơư mok thiêz tsik trâus kuôz zuôv uô đaz uô tuôs.

Hur tiz si têx kror ndâux, faz xuz ntiês, oz cxêik ndêx puôz thiêz tâuz kaz lok zos poz njas puôr lênhx zos tus nxêik co ntiês tus, têx nênhs txơưr đuô tsik muôx vax huôv flưk txos.

Chênhr zos li hêik ntơư, chor uô niêv uô txir tsuv kriê cxuô lênhx mê nhuôv nxêik sđ pâuz tsênhz têx kror tsik jông hêik co, têx nênhs fêv thiêx tsik uô ruôr hiêv txos cxuô lênhx mê nhuôv nxêik li luz chêr thiêz qơư mok.

Tsuv txar đêz têx nênhs tsik cxênhz jê thiêz têx nênhs zuk tsik pâuz shor zos lênhx tưs; zos muôx yưv têx tsik jông hêik ntơư, chor uô niêv uô txir tsuv kriê mê nhuôv kư thiêz đhiê chênhr cov niêv txir, jêx jos hnor đros chơưv paz.

Tsik cxoz chiê têx nênhs fêv, tsik pâuz tsênhz shor nhoz kror tưs lok hâur zuk tsêr; lar hêik zos thâuv mê nhuôv nhoz hâur tsêr iz lênhs thiêz tsik cxoz chiê mê nhuôv muk uô si iz lênhs trâu cxuô qơư, cxuô chuôz zis hâur jos, zos niêv txir tsik đros muk.

Kriê mê nhuôv shâuv đhiê sêi đrơưv, thâuv muôx yưv têx tsik jông li hêik sau thiêx tsik trâus chor nênhs fêv hâuz nziêk đas, tsik uô ruôr hiêv txos cxuô lênhx mê nhuôv cxêik li têx qơư mok thiêz luz chêr. Iz chas ntơư, chor uô niêv uô txir, tsuv kriê cov  têx mê nhuôv pâuz ndo njôngr niêv thiêz txir li tus số máy hu xor tôngx, thâuv mê trâus njiz phiv têx phiv liv hêik sâu, mê nhuôv thiêx hu tâu trâu niêv thiêz txir pâuz đros chơưv tâu zênhx max, têx nênhs fêv thiêx tsik uô ruôr  hiêv txos mê nhuôv li luz chêr.

Thâuv trâus njiz têx tsik jông li hêik sau, mê nhuôv tsuv hêik kriê ciês trâu niêv thiêz txir lok sik têx nênhs cxênhz jê pâuz chiê đros tir thêir tsik chiê têx nênhs fêv kuôz zuôv uô đaz uô tuôs, uô ruôr hiêv tsik jông txos cxuô lênhx mê nhuôv nxêik li luz chêr./.

(Tsu Vưx cxêik nhênhv-Thanh Thủy)