Thạc sỹ Nênhs Thái lok jêx jok uô bluô nux

Cơưv tiêr ntơưr khoa Nông Lâm-tsêr cơưv đại học Tây Bắc shông 2010, lênhx hluôk Vì Văn Bình xar tsưr ziv txos luôs hâux lưv chos ndêz, viv tix lâus pov tâu zuk qơư nhoz muôx ntâu ar thiêz cxuô zav chiê chos ndêz li: nhaz blêx, cxa poz cưk. Đros 10 triệu đêiv nhiêx txiêx tâu chuôz zis muôz kir txêik, tix lâus Bình tưz đros chor fôngx zưs txơưr đuô sik đros côngv pênhr chiê chos ndêz. Hâur têx hnuz xuz thơưx tiv tsik tâu pâuz tsưr ziv huôv tsar uô, nriêr tsik tâu qơư muôs truôx, viv li tix lâus thiêz sơưr đơưk tsưr ziv uô co tưz tsik jông xưv li siêz xar. Tsik tsês li co, tix lâus sir jos cơưv shâuv, sir zôngv têx tsưr ziv zuk tưz cơưv tâu hâur tsêr cơưv, nriêr pâuz nzir tsưr ziv chos ndêz đhâu ntâuz ntơưr, pov chir, ti vi…Viv li mak tix lâus tưz muôx tâu têx yênhx côngz xưz thơưx. Tix lâus Bình hêik:

“Thâuv zuk tâu muk cơưv, zuk pâuz tâu, njiê pov tâu lok kôngz nuv. Zuk cucc pov thiêz pâuz tâu tiêk ntơưv zuk qơư nhoz muôx ntâu tsar tov chiê huôv tsar kôngz nuv. Hâur têx co mak xav txos chos ndêz, viv đhâu iz chiv mak pox nhuôs muôx lok six ntâu nhaz blêx thiêz cxa poz cưk thiêz no zos têx zav chiê zus tâu ndêz”.

Đros muôx 3 kror qơư chos ndêz, tas nro đar muôx 4000 yiv ndis, tix lâus Bình qơư chos ndêz zos chos chor ndêz li ndêz sò, ndê nhaz blêx, ndêz trox, ndêz kim châm. Đros 3-4 chiv iz shông, ndê sâu tâu muôx 130 tấn iz shông, gri muôs sâuv ciêz đrôngs zos 35 cxênhz đêiv iz cir. Pov chôngz lênhx nênhs muôx zoz qơưx chos ndêz, tix lâus tsênhv uô hnaz chos ndêz chiê muôs, iz shông tix lâus kror qơư muôs muôx 35 txos 40 cxênhz hnaz chos ndêz trâu chor tiv phaz hâur, thiêz đrâuv tỉnh, đros gri muôs iz hnaz txix 10-15 cxênhz đeiv. Lơưr tix lâus Bình: Ndêz zos zav tsoz chos lok six phiv liv đros tênhv qơư li: đêx zưs, jêx tưv, nông, pov cêr, caz hmoz…Viv li, zos nênhs chos tsik pâuz tsênhz tsưr ziv uô mak chêx cur kinh tế zuôr kuk.

Chiê zôngx ziv hâur hêik pâuz têx hax huv muôx tsơưr lươngv, ngaz tuk txos trâu nênhs sir zôngv, tix lâus Bình đros chor fôngx zưs tưz cuêz tênhv yênhx lix Công ty cổ phần Kôngz nuv Sơn La uô xênhz yar thiêz kinh doanh hax huv hur, ngaz tuk phưx vưv trâu nênhs sir zôngv đros têx hax huv chênhr zos ndêz thiêz cxuô zav jâuz txir kok thiêz tix lâus zpss giám đốc. Đrâuv chor ciêz lox chênhr, siêu thị hâur tỉnh, nhiv no tix lâus Bình chos hax huv tưz tâu muôs ntơưv Điện Biên, Lai Châu, tâu nênhs sir ôngz njênhs, nhiêv, paz muôx phênhv sâu 5 tiv đêiv ntâu iz shông. Đrâuv paz muôx hâux lưv uô tsik so trâu 25-30 lox tôngv nhoz tiv phaz đros nhiêx hli zos 3-3,5 triệu đêiv iz lênhx nênhs iz hli, tix lâus Bình luz Công ty tsênhv paz muôx hâux lưv uô lơưr chêix chiv trâu txix 10-15 lox tôngv. Niêv tix Vì Thị Thúy, Công nhân Công ty cổ phần Kôngz nuv Sơn La puz pâuz:

“Txix thâuv tâuv uô hâux lưv ntơưv no mak hâux lưv truôx, phênhv sâu siêz đuô, paz cxơưx tâu luz nênhx đuô pir li thâuv ntêx”.

Tix lâus Bình li qơư huôv tsar cêr uô nox nhoz Chiềng Ban zos thax tsav kinh tế kôngz nuv zov chênhr nhoz huyện Mai Sơn, tỉnh Sơn La đros muôx 1.500 ntâu ha cà phê, ntông nox txir thiêz blêx liêx. Tix lâus Bình li tsưr ziv uô kinh tế, tưz tâu chôngz hluôk nênhs, pox nhuôs ntơưv tiv phaz tsov cưv txos, tuôx cơưv shâuv uô trơưk, paz muôx hlôngr yiêz ntâu hâur luôs hâux lưv chos cxuô zav tsoz chos, tsiêx tu zus thiêz uô nox ntơưv tiv phaz. Zơưv Hoàng Văn Sương, phưv chủ tịch UBND xã Chiềng Ban, huyện Mai Sơn, tỉnh Sơn La ntâuk gri:

“Tix lâus Bình li tsưr ziv uô nox mak chêx cur kinh tế siêz. Nhiv no xã cux hêik kriê kriz uô ntơưv têx jêx jok thiêz cux muôx ntâu ziv chuôz zis uô trơưk. Tsưr ziv no đros ntâu tsưr ziv txơưr đuô cux paz uô bluô nux huv đros trâu pox nhuôs nhoz xã Chiềng Ban”.

Tsưr ziv chos ndêz yênhx côngz, hâur công ty tix lâus Bình tror yưv pênhr, yênhx lix Hợp tác xã 26/3 chos jâuz ngaz tuk. Tsưr ziv yênhx lix Hợp tác xa chiê taz por tsưr ziv uô xênhz yar truôx jông, sir zôngv têx kror tsik zuôr txix ndêz chiê chos jâuz ngaz tuk muôs trâu ciêz đrôngs. Nhiv no Hợp tác xã tưz muôx 3 kror qơư chos jâuz đros thax tsav xar muôx 5 ha. Chêx cur xuz thơưx txix chos jâuz cux lok six jông./.

(Cà Thành-Lik Thox cxêik nhênhv)