Thừa Xuân, nênhs sâu xor xưv Đaix TNVN thax tsav faz Bắc xa mông: Têx hnuz đhâu, sâuv thax tsav tỉnh Yên Bái muôx yưv chôngz lênhx nênhs sâu sâuv mạng xar hôiv têx xor mông tsik zos li kror tsênhz mênhx lok moz Covid-19 uô trâu chôngz lênhx nênhs lok six cxơưx, uô phiv liv txos côngz xưv phax, tar moz ntơưv tiv phaz. Thượng tá Lê Thị Thanh Hằng-Phưv Giám đốc công an tỉnh Yên Bái puz pâuz:

“Công an tỉnh tror sir jos sik côngv đros chor nganhx txơưx jênhv tiv phaz uô jông côngz xưv yax kriê; hêik pêx xênhv thâuv cxaz chuôz sâuv mậng mak tsuv nriêr pâuz têx xor mông tsênhz mênhx; tsik sêiz, phêiz kênh têx xor mông tsik tsênhz, tsik zos…Hêik têx taz viv, tiv phaz nriêr pâuz, xưv lik chor nênhs tso tơưv têx xor mông tsik zos li kror tsênhz, paz tuôr truôx ngaz tuk sâuv thax tsav thiêz uô jông côngz xưv phax, tar caz moz ntơưv tiv phaz”./.

(Thừa Xuân-Lik Thox cxêik nhênhv)

Têx hnuz đhâu, ntâu chiz coaz, taz viv, tsưr tsix, lênhx nênhs thiêz tsôngv box hâur thiêz đrâuv tỉnh Sơn La tưz vênhv tôngv gôngr côngv têx chuôz zênhx zuôr trâus, chuôz zênhx y tế chiê tôngv vênhx, pheiz kênh têx phêv liv đros cán bộ, chiến sĩ bộ đội pênhz phax tỉnh Sơn La tsênhv hnuz hmo uô jênhv vưv phax tar moz Covid-19 nhoz ntus đriv. Lơưr co, têx chuôz zênhx y tế muôx yênhx cxênhz đeiv bos kror ndâux, yênhx puôk hưx đêx nzuôr tês, đros ntâu hax huv zuôr trâus li: mix tôm, yuôx phongx, jâuz kok, trox tênhz, ntâuz tax, vix tsav....tưz tâu têx đoanx thôngz đhâu Bộ đội pênhz phax xa txos ciês cán bộ, chiến sĩ thiêz têx lưx lươngv sâuv ntus đriv tsênhv uô jênhv vưv phax tar moz./.

(TTTB- Txâur Vax cxeik nhênhv)

Thanh Thủy, nênhs sâu xor xưv Đaix TNVN  thax tsav faz Bắc xa mông: txix thâuv moz Covid-19 txơưr txar phiv liv, têx qơư muôs huv cơư kror trôngx, niêv tix Phạm Bích Hà qơư muôs bún chả nhoz tổ 9, phường Tân Phong, thành phố Lai Châu tsuv so. Chiê phêiz kênh têx phiv liv thiêz paz trâu chor nênhs uô hâux lưv ntơưv qơư cêv kuôk tỉnh, niêv tix Hà tưz muôz nhiêx txiêx thiêz hêik oz lênhx nênhs đros paz uô 150 ntâu kror nox tsik zuôr nhiêx txiêx. Têx têik bún chả tâu niêv tix đros oz lênhx nênhs co ntiv hâur têx têik thiêz gra muk trâu chor qơư cêv kuôk, chiê paz trâu chor nênhs uô hâux lưv tir tar  caz moz:

“Zuk cux tsuôk xar tiêk iz lênhx nênhs sir jos mê njik, mak cux zos paz trâu chor nênhs tsênhv uô hâux lưv lơưv. Viv lơưr cux muôx txâuk lơưv, muôx têz qơưk paz lơưv taz sik njiêz lơưr yênhx hnuz hmo sir jos mak zuk cux xar uô iz kror tưs chiê paz trâu lơưr. Vi li sơưr nzor cur sơưr txix thâuv 4,5 six uô thiêz hêik iz lênhx cưk kriê ntơưr thiêz iz lênhx nhoz đros ntơưv no paz cur uô”./.

(Thanh Thủy-Lik Thox cxêik nhênhv)

Vũ Lợi- nênhs sâu xor xưv Đeix nta suôz VN iz suôv faz Baz tso mông: Chiê paz shux xênhz têx lớp 9 thiêz 12 sâuv thax tsav cơưv ntơưr chiê bax trâu jiês thik hlôngr cấp cơưv thiêz thik THPT têz qơưk shông 2020 hâur six hơưv so ntơưr phax tar moz Covid-19, tỉnh Điện Biên cuiz tênhv zuôr krêz uô tsaz yênhx kriê ntơưr sâu truyền hình trâu têx shux xênhz, qir uô cxôngx hnuz xiêz 10/4. Lơưr co, Sở zaoz zux thiêz thox cxov tỉnh Điện Biên zuôr sik côngv đros Đeix nta suôz-xa đuôz tỉnh Điện Biên krêz uô hâux lưv kriê ntơưr sâuv truyền hình 3 môn zos Toán, Văn thiêz ngoại ngữ trâu shux xênhz lớp 9 thiêz lớp 12 zos 9 môn cơưv tsênhv zuôr tsưr tsix thik THPT têz qơưk shông 2020. Tas nro têx njiêz luv kriê thiêz cơưv zuôr tâu tso sâu Đeix nta suôz-xa đuôz tiv phaz chiê shux xênhz seiz thiêz cơưv./.

(Vũ Lợi- Txâur Vax cxeik nhênhv)