Tas cik hnuz xiêz 10/8, HĐ tỉnh Sơn La khóa 15 krêz uô jiês khiêz phêv tiv 2 lơưr tsưr ziv trực tuyến côngv đros 12 huyện, thành phố. Têx teiv plor cxaz chuôz dưv puôr lênhx uô jông têx tsưr ziv phax tar moz Covid-19.

Hâur 7 luz hlik hâur shôngk shông, tỉnh Sơn La tưz uô tsưr ziv cê sir jos phax tir their moz Covid-19 cê krêz uô têx jênhv vưv tsênhv thiêz tưz tax tâu têx chêx cuk coaz tsôngv. Kinh tế huôv tsar ngaz tul tax zuôr xar 11%, sơưr tiv 2/14 tỉnh thax tsav trung du thiêz tox siêz faz Bắc. Têx huôx tôngv vênhx huô-xã hôiv ngaz tul; têx chính sách nox nhoz xã hôiv tâu tsov cưv uô; tsôngv box luz nênhx tâu taz por...

Ntơưv jiês khiêz phêv, têx teiv plor zuôr seiz shuôk, cuiz tênhv ntâu njiêz luv coaz tsôngv li: sik seiz lax UB tỉnh li têx pov cov lok chêx cuk uô jênhv vưv huôv tsar KTXH 7 luz hlik hâur shôngk shông, tsưr ziv 5 luz hlik kaz shôngk shông lơưr HĐ tỉnh li Nghị quyết; sik seiz lax thiêz thôngz đhâu 21 nghị quyết chuyên đề....Dưv thiêz chox kriê jiês khiêz phêv, zơưv Nguyễn Hữu Đông, Bí thư tỉnh ủy tỉnh Sơn La heik:

“Ciês đhâu jiês khiêz phêv no, HĐ thiêz Ub tỉnh zuôr chêx chôngk lênhs tov, chox kriê, seiz njôngr qênhx shênhx tsênhv tsênhz, lơưr Trung ương li lênhs tov chox kriê sâuv tas nro têx vênhv thix, chuôz tsar têx tsưr ziv zov chênhr đuô, muôx chêx cuk đuô thiêz chiê tir tar moz Covid-19, cxơưz tiês huôv tsar KTXH”./.

(Trấn Long-Txâur Vax cxeik nhênhv)

Đhâu 2 luz hli, xav txix thâuv tso tơưv jiês kriz uô, Ủy ban Mặt trận Têz qơưk Việt Nam tỉnh Lào Cai tưz txêik jênhv tâu muôx 15 tiv đêiv ntâu muôz paz trâu côngz xưv phax, tar caz moz Covid-19. Txos nhiv no tưz muôx 900 ntâu tsưr tsix, tiz nênhs sik côngv paz. No zuôr zos kror pênhr jos zov chênhr chiê tỉnh tox siêz Lào Cai uô jông đuô côngz xưv phax, tar caz moz sâuv thax tsav. Zơưv Giàng Seo Vần, Chủ tịch Ủy ban mặt trận Têz qơưk Việt nam tỉnh Lào Cai puz pâuz:

“Phênhv ntâu têx nhiêx txiêx sâu tâu zuôr tâu tsês chiê muôz paz trâu chor nênhs uô têx hâux lưv phax, tar caz moz; đros co zos muôz paz trâu tỉnh têx nhiêx txiêx chiê zuôr yuôx vắc xin phax moz Covid-19”./.

(An Kiên-Lik Thox cxêik nhênhv)

Xor mông cxôngx Tsênhv qơư seiz car moz tỉnh Sơn La, hnuz xiêz 10/8, tiv phaz sâu jênhv cxaz 19 lênhx nênhs trâus moz Covid-19, tas nro chor nênhs moz F0 nhoz hâur tỉnh jiês no ndê txos 67 lênhx. Hâur 19 lênhx trâus moz no, muôx 17 lênhx zos công nhân muk uô jos ntơưv tỉnh Bình Dương tror lok; 1 lênhx muk cxôngx Hà Nội lok; 1 lênhx zos cán bộ y tế uô hâux lưv hâur thax tsav chơưv kho moz trâu nênhs moz F0 ntơưv huyện Phù Yên.

Têx lênhx công nhân muk uô jos tror lok thâuv lok txos qơư seiz car moz huyện, tỉnh tưz uô jông hâux lưv heik kriê y tế, đhâu co tâu chox muk cêv kuôk ntơưv qơư cêv kuôk chêx chôngk hâur huyện.

Nhiv no, tas nro 19 lênhx nênhs moz tsi pov cuz sor, nôngk li chas. 19 lênhx puôr lênhx tâu njuôs siv moz 2-8 jiês. Lơưr ntâus grê, têx nênhs moz no njuôs xav cik moz trâu côngv thôngx kis, viv puôr lênhx nhoz hâur qơư cêv kuôk. Taz sik, tsuv canhv pov njuôs xav zuôr siz cik moz hâur thax tsav qơư cêv kuôk, zos tsi uô truôx jông trơưk li Bộ y tế 5 faz tsưr ziv lok phax tar moz./.

(Thu Thùy-Txâur Vax cxeik nhênhv)

Công an thành phố Điện Biên Phủ, tỉnh Điện Biên nhiv kruôr cxov tâu oz lênhx nênhs zos Nguyễn Thị Mỹ Linh, zus shông 1998, nhoz ntơưv jok Bom La, xar Thanh Xương, huyện Điện Biên thiêz Hoàng Đình Huy, zus shông 1992, nhoz tôv 21, phường Him Lam zuôr muôs, jêik chiê tsik zos chêi zax zênhz. Têx sâu tâu zos 1.099 luz yuôx shơư zax zênhz, iz poz zênhz đơưz hnhar muôx 1,25g khor li poz jêz, 5 luz điện thoại thiêz ntâu zav cik txos. Ntơưv cơ quan Công an Hoàng Đình Huy hêik pâuz, zos lênhx nênhs muôx zênhk zax zênhz ntêr shông, viv li tưz zuôr chor zax zênhz co lok zôngv thiêz muôs chiê zuôr nhiêx liv. Nhiv no txuz hâux lưv no tsênhv tror tâu qênhz yuôx, nriêr pâuz cov tsênhz mênhx chiê muôz tik cêr cxâuv trơưk chêi têz qơưk cui tênhv./.

(Vũ Lợi-Lik Thox cxêik nhênhv)