Ciês thâuv Bộ zaoz zux thiêz thox cxov côngz fur tsưr ziv thik THPT yiêz tưz jênhv tâu ntâu ziv chênhv txơưr cxôngx têx cưk kriê ntơưr, shux xênhz li niêv txir thiêz shux xênhz nhoz tox siêz Sơn La. Phênhv ntâu cưk kriê thiêz shux xênhz puôr lênhx xar tiêk: Đros tsưr ziv zos txu grês mak jiês thik no tsi cxoz pheiz uô 2 jiês. Zos tsuôk phưx vưv hâux lưv tsênhv zos xeir zuôr cơưv tiêr cxênhx 3, hâux lưv xeir zuôr shux xênhz mul cơưv đại học, cao đẳng zos têx tsêr cơưv đại học chiv chir uô mak zuôr hla đhâu 2 jiês thik li thâuv ntêx. Txơưv zôngx ziv lok sik tsi zôngx ziv, muôx cxaz 1 jiês thik thiêz cux uô trâu shux xênhz thiêz shux xênhz li niêv txir lok six cxơưx. Hâur co nhoz tox siêz, cêr lax mul lok, six hơưv thik zos thâuv txos cheix ntux nas. Tiv zix đros shux xênhz nhoz tox siêz tsuôk xar cơưv tiêr cxênhx 3 chiê lok tsêr uô hâux lưv lok sik mul cơưv shâuv hâux lưv uô. Cưk kriê Trần Thị Nhung, tsêr cơưv THPT Mường Bú, huyện Mường La puz pâuz:

“Têx shux xênhz đăng cir cơưv đại học mak tsuv thik 2 jiês viv li lok six cxơưx. Xưk li shông 2018, 2019 mak tsuv thik iz jiês xưz, taz sik đrâuv thik cơưv tiêr cxênhx 3 ho tsuv thik mul cơưv têx tsêr cơưv đại học, cao đẳng thiêz. Hlôngr yiêz li co mak cxơưx ntâu đuô”./.

(Thanh Thủy- Txâur Vax cxeik nhênhv)

Hnuz 23/4, tas nro shux xênhz lớp 9 thiêz lớp 12 nhoz tỉnh Yên Bái tưz tror tuôx cơưv ntơưr đhâu iz ntu so ntêr tiv moz Covid-19.

Têis cik nas hmo ntux lok nas lox, taz sik jê six hơưv cơưv mak ntux cux tu nas jux juk, viv li shux xênhz chor cơưv ntơưr ntơưv Yên Bái puôr lênhx tuôx cơưv huv six hoưv. Shux xênhz cux tuôx cơưv cxix cxuô, ntâu luz tsêr cơưv nhoz tox siêz lok cux li. Chor tsêr cơưv ntơưr tưz hêik kriê shux xênhz uô truôx jông têx tsưr ziv chiê phax, mtar caz moz trơưk li hêik pâuz./.

(TTTB-Lik Thox cxêik nhênhv)

Hâur 2 hnuz 22 thiêz 23/4, ntux lok nas thiêz chuô lox uô ruôr hiêv ntâu trâu têx tiv phaz nhoz thax tsav Tây Bắc. Thôngz sâu txos zar hnuz keix hnuz 23/4, Tỉnh Sơn La muôx 1 lênhx nênhs tuôs, 4 lênhx trâus saz tiv ntux lok nas thiêz chuô lox. Tas nro tỉnh muôx 710 luz tsêr trâus ruôr hiêv, 430 hecta ntâu kôngz lôngk cxuô zav trâus ruôr hiêv...njuôs xav ruôr hiêv 6 tỷ đeiv ntâu.

Ntơưv Lào Cai tso pov, chuô lox thiêz lok nas lox uô 43 luz tsêr ntơưv têx huyện Bảo Thắng, Bát Xát, Si Ma Cai trâus puôk tsuôx, 3 luz trâus puôk tsuôx tas hur si, 4 cxênhz yiv ndis tsêr uô kôngz nuv công nghệ yiêz ntơưv Quang Kim (Bát Xát) trâus zênhr shar; ntâu ndêx tênhv, ntông trâus lor.

Ntơưv Lai Châu, lok lơưs thiêz chuô lox tưz uô zuôr xar 800 luz tsêr trâus zênhr shar, hâur co muôx zuôr xar 20 luz zos tsôngv box li tsêr thiêz 1 luz tsêr huôx tôngv nhoz tsêr cơưv cxênhx 1 trâus puôk tsuôx tas hur si. Chuô lox thiêz lok lơưs cux uô 320 hecta ntâu tsoz ntông nox txir, blêx chiv tsâux yiêz, poz cưk, kok kriêr.... trâus ruôr hiêv.

Sâuv thax tsav huyện Nậm pồ (tỉnh Điện Biên) ntux lok nas thiêz chuô lox uô 400 ntâu luz tsêr nhoz trâus zênhr shar, 2 lênhx nênhs trâus saz, iz tsêr cơưv trâus zơưk trur, ntâu mênhv chêx kôngz lôngk trâus zênhr shar. Njuôs xav ruôr hiêv muôx nhos 11 tỷ đeiv.

Chuô lox thiêz lok nas hâur iz hnuz ntâu đhâu ntơưv Yên Bái cux uô 1 lênhx nênhs tuôs, zuôr xar 800 luz tsêr trâus puôk tsuôx, 260 hecta ntâu kôngz lôngk trâus ruôr hiêv....njuôs xav uô hiêv muôx nhos 8,5 tỷ đeiv.

Thâuv muôx yưv ntux nas, Ban chỉ huy phax tar ntux nas thiêz nriêr chơưv nanv têx tiv phaz tưz ciêr chênhr qênhz yuôx qênhx shênhx tsênhv tsênhz sâuv thax tsav; paz txưv thiêz tôngv vênhx chuôz zis muôx lênhx nênhs trâus ruôr hiêv./.

(VOV TB-Txâur Vax cxeik nhênhv)

Sở Zoz thôngz vận tải Sơn La cuêz tênhv chiê chor yêz muk lok hâur tỉnh tror thâux xa kruô muk lok. Piz tâu muk lok txix hnuz 24/4/2020 đros chor yêz thâux xa kruô trơưk six hơưv thâuv uô ntêx tâu so thiêz piz thâux xa kruô muk lok txix hnuz 25/4/2020 trâu chor yêz tsuv kho đuô six hơưv, tsưr ziv muk lok. Hâur ntu muk lok, chor taz viv thâux xa kruô, nênhs tsar yêz, nhân viên phưx vưv sâuv yêz tsuv tâu uô cxix cxuô, truôx jông cxuô kror lok phax, tar moz covid-19 sâuv têx yêz trơưk li cui tênhv./.

(Thu Thùy-Lik Thox cxêik nhênhv)