Têis cik 26/8, Công an tỉnh Điện Biên kriz uô phongz yaox sik tưr hâur phax, tar caz moz Covid-19 đros tsênhv njiêz “Lưx lươngv Công an Điện Biên, sir jos phax, tar moz Covid-19, zos chor nênhs uô ntêx hlo, sik côngv siêz, côngv jos đros côngv thôngx chiê taz por ngaz tuk trâu tas nro xar hôiv”. Đại Tá Tuôv Xênhv Tsaz, Giám đốc Công an tỉnh Điện Biên puz pâuz: hâur ntu moz Covid-19 txơưr txar phiv liv, Công an tỉnh Điện Biên tsik so zos chor nênhs uô ntêx hlo, uô jông hâux lưv cê taz por ngaz tuk, cê phax, tar moz Covid-19. Lưx lươngv tưz ruôr tâu 3 jiês, khởi tố 5 txuz, 31 lênhx nênhs lok kror cxâu chox nênhs muk lok đhâu ntus đriv tsik zos chêi; uô truôx jông hâux lưv ntơưv 4 qơư sêiz jor phax tar caz moz cấp tỉnh thiêz yênhx châuv qơư sêiz jor phax tar caz moz cấp huyện chiê sêiz car, hêik sơưr đơưk hêik pâuz y têr trâu 200 cxênhz ntâu lênhx nênhs; por vêv ngaz tuk trâu 36 qơư cêv kuôk, tsêr kho moz, qơư cêv kuô; pov, xưv lik yênhx puô lênhx nênhs uô cxâuv cik txos côngz xưv phax, tar moz Covid-19…/.

(Vũ Lợi-Lik Thox cxêik nhênhv)

Hmo 26/8, tỉnh Sơn La muôx nzir 3 lênhx nênhs trâul moz yiêz SARS-CoV-2, tsar ndê hur si chor nênhs trâul moz Covid-19 ntơưv tỉnh hâur jiês moz huôv xênhz no muôx 178 lênhx, tas nro chor nênhs moz co puôr lênhx zos ntơưv huyện Phù Yên.

Hur si 3 lênhx nênhs trâul moz yiêz ntơư puôr lênhx nhoz ntơưv jok Úm 2, xã Huy Thượng, huyện Phù Yên thiêz puôr lênhx zos têx lênhx tâu nhoz jê đros chor nênhs trâul moz uô ntêx ntơư. Hâur co muôx iz lênhx zos cưk kriê ntơưr, iz lênhx zos nhuôv zâu muôx 4 shông, iz lênhx zos công nhân.

Têx hnuz jê lok no, hur si 3 lênhx nênhs co puôr lênhx cêv kuôk nhoz hâur tsêr viv thax tsav qơư no tưz trâul cêv kuôk XH nhiêk nhoz nhiêk vax nhiêk tsêr tsi tâu muk trâu uz trâu no trơưk li Thủ tướng Chính phủ Chỉ thị 16; hok lênhx công nhân mak cêv kuôk txix hnuz 24/8/2021. Taz sik, têx hnuz uô ntêx co, hur si 3 lênhx nênhs no puôr lênhx tưz tâu nhoz jê đros chor nênhs hâur tsêr, lênhx cưk kriê ntơưr mak tưz muk ntâu qơư thiêz chuôs njiz ntâu lênhx nênhs nhoz xã Huy Thượng thiêz thị trấn Phù Yên. Nhiv no, 2 lênhx nênhs tsi pov muôx moz li chak txơưr txar; hok iz tus mak mê njik uô cuz uô nox, cxơưs njưs.

Txos nhiv no tưz muôx 16 lênhx kho tâu jông moz tơưv tsêr kho moz, iz lênhx muk chơưv kho trâu tsêr kho moz nhiệt đới T.Ư; yuôr đuô li zos tsênhv nhoz chơưv kho moz ntơưv têx tsêr kho moz hâur huyện Phù Yên./.

(Thù Thùy-Riê Lâux cxeik, nhênhv)

Cux ntơưv Sơn La, zar hnuz kêix 26/8, Đoanx cán bôv y têr tỉnh Sơn La muôx 30 lênhx bác sỹ, điều dưỡng, kỹ thuật viên tưz sơưr cêr muk trâu thành phố Hồ Chí Minh chiê paz uô hâux lưv phax, tar moz Covid-19. No zos chor cưk yuôx tâu xêir tsov txix têx tsêr kho moz tỉnh thiêz tsênhv qơư y têr, tsêr kho moz đa khoa têx huyện hâur tỉnh, muôx txux chi uô hâux lưv siêz, tax tâu chiê hâux lưv phax tar caz moz. Uô ntêx thâuv zuôr sơưr cêr muk chor nênhs no tưz tâu cxax cxix cxuô 2 côngz yuôx vắc xin phax moz Covid-19 thiêz tâu njuôk shuôk tsik trâus cik caz moz Sát-Covi-2. Thôngx cxix, tâu kruôz kriê uô hâux lưv lok njuôk shuôk thiêz chơưv kho, tsoz phưz chor nênhs moz Covid-19… Hêik ntơưv jiês piz sơưr cêr muk, Bác sỹ chuyên khoa I Phạm Hồng Thái, Phưv Giám đốc Tsêr kho moz Y dược cổ truyền tỉnh Sơn La, trưởng đoanx cán bộ Y têr tỉnh Sơn La cxaz chuôz paz trâu côngz xưv phax tir tar moz Covid-19 ntơưv thành phố Hồ Chí Minh puz pâuz:

“Tas nro pêz sơưr đơưk puôr lênhx sir jos chiê muk paz trâu faz Nam. Zos chor nênhs hnar têx chêr trik yo đơưz, pêz zuôr sir jos paz trâu faz Nam thiêz uô cov tiêr jông têx jênhv vưv tâu choz zok chiê paz tir tar cov tâu moz Covid-19”./.

(Trấn Long-Lik Thox cxêik nhênhv)

Hnuz 26/8, tỉnh Lào Cai qir muôz luz tsêr kho moz xuz thơưx tsês trâu chor nênhs moz thiêz tâu xav tiêk zôngx ziv trâul cik tâu caz moz Covid-19 lok uô hâux lưv phưx vưv seiz njuôk shuôs, kho moz gênhk. Luz tsêr kho moz co nhoz hâur tỉnh li tsênhv qơư Pháp y qơư uô hâux lưv, ntơưv phường Bắc Lệnh, TP lào Cai, muôx qơư lox đar, nưk nhoz nưk trâu iz kro qơư, tsi nhoz shơư thax tsav tsôngv px nhoz, cêr muk lol zôngx ziv. Luz tsêr kho moz no muôx 150 luz txax trâu nênhs moz tuôx nhoz pư, muôx cxix cxuô têx chuôz zênhx phưx vưv seiz njuôk shuôs, kho moz. 14 qơư uô hâux lưv hâur tsêr kho moz tâu phênhz nhiêk muôx nhiêk trơưk cui tinhv, tir thêir tsi siz cik tâu caz moz, zôngx ziv trâu tsoz phưz thiêz chơưv kho ntâu lênhx nênhs moz. Bắc sĩ Nguyễn Quốc Huy, Phưv Giám đốc tsêr kho moz Đa khoa tỉnh Lào Cai nhiv kruôr tâu tso uô Giám đốc luz tsêr kho moz heik sâuv hâur tỉnh Lào Cai heik pâuz:

“Tsêr kho moz cux tưz muôx quyết tinhv yênhx lix têx đoanx chơưv kho moz gênhk, chor canr bôv tuôx no uô hâux lưv puôr lênhx tâu cơưv cxaz têx txux chi tsưr ziv lok sâuv qênhz njuôk shuôs moz, chơưv kho têx lênhx nênhs trâul moz Covid-19”./.

(An Kiên-Riê Lâux cxeik, nhênhv)