Ntux nas lox lok ntêr ntơưv ntâu thax tsav hâur tỉnh Điện Biên hâur 2 hnuz đhâu tưz uô iz lênhx nênhs trâus pôngz plox mông, uô ruôr hiêv lok kinh tế tas muôx 2 tỷ đeiv. Điện Biên Đông nhiv no zos thax tsav qơư trâus uô hiêv hnhar yax tiv đêx nas uô. Txox cêr lox số 12 trâus xưz poz lox, uô ntâu ar thiêz poz jêz lok cxuz cêr tas, uô huyện no trâus kuôk cêv muk tsi tâu đhâu trâu kror tưs.

Ntux nas lox cux uô ntâu liêx têz kôngz lôngk, têx pak đêx hâur thax tsav trâus puôk tsuôx, tsi jông tas thiêz muôx têx sâu tsi tâu. Tsêr cơưv cxênhx nhuôs zâu Suối Lư trâus đêx ngaz thiêz 2 chuôz zis tsôngv box nhoz jok Suối  Lư 1 cux tưz tâu yeik txar zênhx max. Ar, poz  jêz xưz poz cux uô 2 lênhx công nhân hâur công ty seiz car têx cưx đês liêx Điện Biên trâus saz tsênhv thâuv uô hâux lưv qênhz shuôs têx đêx nas ntơưv pak đêx Nậm Ngám, xã Pú Nhi, huyện Điện Biên Đông./.

(Vũ Lợi-Riê Lâux cxeik, nhênhv)

       Hnuz 16/8, thax tsav huyện Mường la, tỉnh Sơn La tror muôx ntux nas lox, uô tuk đêx Nậm Păm tror huôv hloz thiêz uô tox xưz poz nzir nhoz ntâu thax tsav qơư, uô phiv liv trâu luô hâux lưv thâux xa têx hax huv chơưv paz thiêz chuôz zênhx uz no phưx vưv hâux lưv khưx phưx têx trâu uô hiêv tiv đêx nas cuôr yôngz.

      Txix têx li heik no, lưv lươngv bộ đội, công an tưz tâu tso tuôx đros hâu nov ntơưv qơư yax kriê chiê tsôngv box bax tsưr ziv phax tir thêir đêx nas lox; yeik txar muk nhoz têx qơư taz por, lar heik zos tsi bo tơưk lok sik tsi nhoz jê têx ntus đêx, cưx đês cưx ha thâuv đêx huôv hloz.... Iz chas ntơư đros thiêz hâux lưv khưx phưx, kho têx cêr mul lok zov chênhr, trâus puôk tsuôx, hâu nov tỉnh Sơn La nhiv no tsênhv zênhx max cxiv uô têx tsêr nhoz, qơư y tế txix đhok kuôr hlâu, taz por txiv ngaz luz nênhx xênhz huôx thiêz qơư nhoz đreiv nas chuô ngaz tuk trâu tsôngv box sơưr đơưk./.

(Hoàng Long-Txâur Vax nhênhv)

        Txix hnuz xiêz 10-20/8, Phòng zoz zux thiêz thox cxov huyện Bát Xát, tỉnh Lào Cai hux jos đros Tsênhv qơư y tế huyện fuô uô luôs hâux lưv tsuôs yuôx tuô, lov têx caz moz ntơưv 29 tsêr cơưv muôx shux xênhz nox nhoz hâur tsêr niêv txir zus mor hâur thax tsav huyện. Hâux lưv tsuôs yuôx tuô, lov caz moz chiê bax tsưr ziv phax tir thêir têx moz gênhs, por hưv đas jos trâu shux xênhz. Têx yuôx tâu zôngv tsuôs ntơưv têx tsêr cơưv heik sâuv zos: CloraminB; tsuôs tuô lov têx caz moz uz no; tsuôs phax tar moz hlưz hâu Nhật Bản, moz suôz liêz, moz uô no txix yuôx FENDONA. Tsuôs yuôx tuô, lov caz moz ntơưv têx tsêr cơưv muôx shux xênhz nhoz hâur tsêr cơưv, niêv txir zus mor paz shux xênhz txo grêk tsơưs trâul têx moz txơưx siz cik, taz por đas jos cơưv ntơưr./.

(KT-Riê Lâux cxeik, nhênhv)

        Lưv lươngv phax tar zax zênhz, Công an tỉnh Lai Châu nhiv kruôr ntêk tâu 2 lênhx nênhs, luôs lưv tuk ntiêr thâux gra 2 poz zênhz đơưz muk muôs, đros thiêz tsiv grê nhos 20 tsov đeiv.

Ntơưv cơ quan cảnh sát, lênhx nênhs trâul ntêk tâu krêz lênhk tiêk, bê hu uô Ly Seo Hòa, 26 shông nhoz jok Lao Chải, xã Quan Thần Sán, huyện Si Ma Cai, tỉnh Lào Cai. Hòa krêz lênhk nhav tiêk, tâu iz lênhx nênhs ntiêr thâux gra 2 poz zênhz đơưz heik sâuv muk trâu ntơưv jok Chu Va 12 chiê muôs. Zos nhiês thâux gra, muôs tâu mak zuôr tâu 20 tsov đeiv.

Đhâu qênhz yuôx nuk, Phòng cảnh sát qênhz yuôx têx nênhs fêv lok sâuv uô luôv zax zênhz, Công an tỉnh Lai Châu tror ntêk zênhx max tâu Hoàng thị Pay, 35 shông nhoz jok Chù Khèo, xã Khun Há, huyện Tam Đường, tỉnh lai Châu lok sâuv nhiês zuôr muôs, uô luôv zax zênhz tsi trơưk chei.

        Nhiv no txuz plâuz co tsênhv tâu Cơ quan Cảnh sát qênhz yuôx têx nênhs fêv lok zuôr muôs uô luôv zax zênhz, Công an tỉnh Lai Châu tror qênhz yuôx, uô tsênhz mênhx./.

(Khắc Kiên-Txâur Vax nhênhv)