Đhâu 3 luz hli xav txix thâuv piz hla trâu chêix sâu đê shông no, chor cà phê ntơưv Sơn La tưz sâu đê tâu xar muôx 120  cxênhz tấn; chor tsênhv tsik tâu sâu đêx cux tsênhv yuôr muôs 60 cxênhz tấn zuôr tror tâu sâu đê txix nhiv no txos hli 1 shông zuôr txos no. Cà phê shông no mak txi txir ntâu, muôs tâu gri (cà phê nhôngk tâu muôs txix 12-14 cxênhz tiv đêiv iz cir), viv li nênhs chos cà phê nhoz Sơn La lok six shir phaz. Đrâuv muôs hâur têz qơưk, tỉnh Sơn La cux tsênhv sir jos muôs tơưv saz đrâuv têz qơưk têx cề phê. Xav txix thâuv hâur chiv txos nhiv no, tas nro chor cà phê tưz tâu muôs xav muôx 17.000 ntâu tấn; hâur co, muôs hâur têz qơưk tâu muôx 450 ntâu tấn, chor tsênhv yuôr mak tâu muôs muk trâu têx têz qơưk Đức, Hoa Kỳ…/.

(Thu Thùy-Lik Thox cxêik nhênhv)

Đros thiêz iz đraz ntâu têx xã hâur tỉnh tưz tâu côngk nhav uô tâu luôs hâux lưv cxiv tsa jêx jok yiêz, Yên Bái tsênhv zos qơư chi cax jông nhoz thax tsav Tây Bắc lok fuô uô tsaz yênhx cxiv tsa jêx jok yiêz. Chênhr tsôngv pêx sơưr đơưk li têx cêr sik thôngx siêz, côngv têk, hâur co tsuv heik txos têx li: Tsôngv pêx xênhv chir chiv muôz ar liêx têz chiê cxiv uô cêr muk lol thiêz têx côngz trênhx côngz côngv tưz uô tâu têx jông li heik sâuv. Zơưv Triệu Đức Chính, Bí thư Đảng ủy xã Khánh Thiện, iz xã muôx chôngz tsôngv box Tày uô nênhx nhoz hâur huyện Lục Yên heik pâuz: Đhâu 10 shông uô tsaz yênhx, tsôngv pêx xênhv hâur xã tưz muôz xav hur si 5 cxênhz ntâu xưv phaz ar têz, iz cxênhz ntâu tsoz shôngz ntông, yênhx puô thiêr nja vax, lax caz uz no….chiê krêz uô cêr đar đuô jông muk lol hâur xã:

“Pêz cux tưz cxiv tsa cuiv nhiêx cxiv uô jêx jok yiêz, hur jông, hu zâuv txix têx tuz nhuôs hâur thax tsav qơư muk uô côngz xưv, uô nox đêz siz chos paz chiê tror cxiv uô têx côngz trênhx, cêr muk lol jêx jok. Iz zav li, thâuv uô cêr muk lol jêx jok, tsôngv pêx xênhv lơưr muôz ar, taz sik thâuv khơưz, luôv uô cêr, krêz đar cêr zos tsuv zôngv txos têx yêz câuk ar uz no, viv li chor nhiêx no zuôr zôngv chiê ntiêr yêz, ntiêr meir uz no uô cêr”./.

(Tuấn Xuân-Riê Lâux cxeik, nhênhv)

Têx shông đhâu, huyện Sìn Hồ, tỉnh Lai Châu tsik so uô jông lơưr hloz Hôx têx luk kriê: “Niêv côngv siêz zos cách mạng li iz tsưr ziv uô zov chênhr, zos kror cuêz tênhv paz uô tâu cov yênhx côngz jông cxuô hâux lưv”. Phuôx huiz tâu thôngx niêv côngv siêz, paz muôx đas jos chiê zênhx liv tâu jênhv vưv chính trị ntơưv thax tsav qơư. Lơưr zơưv Đồng Văn Liệt-Chủ tịch Ủy ban huyện Sìn Hồ, txix hâur shôngk shông txos nhiv no, kinh têr xar hôiv sâuv thax tsav huyện tror huôv tsar, phênhv sâu xav lênhx nênhs tâu muôx 32 triệu đêiv ntâu iz lênhx nênhs iz shông. Kinh têr-xar hôiv tror tâu yưv pênhr, chor tsaz yênhx têz qơưk tâu kriz uô truôx jông, paz huôv tsar tâu kinh têr sâuv thax tsav huyện. Đros co, vênhx huôv, xar hôiv muôx ntâu hlôngr yiêz jông, cxiv tsa jêx jok yiêz, luz nênhx vênhx huôv ntơưv thax tsav qơư nhoz muôx nzir ntâu cêr shir phaz; tsưr qênhx ntus đriv têz qơưk, ngaz tuk côx phax tâu tuôr truôx./.

(Báo LC-Lik Thox cxêik nhênhv)

Hmo 17/11, tỉnh Điện muôx nzir 25 lênhx nênhs trâul moz Covid-19; phênhv ntâu chor nênhs moz no zos canr bôv, cưk kriê ntơưr nhoz hâur đrôngs Điện Biên Phủ, tinhr Điện Biên, nhiv kruôr đros cơưv lớp cơưv cxaz nzir têx txux chi Côx phax txiv ngaz zos Hội đồng zoz zux Côx phax thiêz txiv ngaz đrôngs Điện Biên Phủ tsưr tsix.  Hâur 25 lênhx nênhs trâul moz Covid-19 no, tsuôk muôx iz lênhx zos muk txix Trung Quốc tror lok hâur tỉnh đhâu trôngx đriv Lạng Sơn; 24 lênhx tsênhv yuôr zos canr bôv, cưk kriê ntơưr tưz đros cơưv lớp cơưv heik sâuv. Lớp cơưv co muôx 60 ntâu lênhx nênhs cơưv, phênhv ntâu zos cưk kriê ntơưr têx tsêr cơưv cxênhx nhuôs zâu, cxênhx iz thiêz cxênhx 2 hâur thax tsav  đrôngs Điện Biên Phủ. Li ntơư, xav txix hnuz xiêz 01/11 txos nhiv no, tỉnh Điện Biên tưz muôx 220 lênhx trâul moz Covid-19, ntơưv 4 huyện thiêz đrôngs Điện Biên Phủ./.

 (Vũ  Lợi-Riê Lâux cxeik, nhênhv)