Mông txix Ban chox kriê phax tar moz Covid-19 tỉnh Lai Châu heik pâuz, ntơưv qơư nhiv kruôr muôx nzir iz lênhx nênhs trâul moz SARS-CoV-2 muk txix TP HCM lok. No zos lênhx nênhs moz tiv 4 ntơưv qơư xav txix hâur hli 7 txos nhiv no, hâur co muôx 3 lênhx nênhs zos tror trâul moz đhâu thâuv kho jông moz ntơưv Bắc Giang thiêz Bắc Ninh. Lênhx nênhs moz no zos Đ.Q.H, xênhz shông 2005, nhoz ntơưv thị trấn Mường Tè, huyện Mường Tè. H zos công nhân uô hâux lưv ntơưv qơư xơưs tsôngk tril yo phường Bình Hưng Hòa, sôr 12, quận Bình Tân, TP HCM.

Nhiv no, 17 hâur 18 lênhx nênhs tâu nhoz jê, cheix iz luz yêz đros lênhx nênhs moz tưz tâu cêv kuôk ntơưv qơư thiêz tưz tso nyar seiz njuôk shuôs moz trơưk li cui tinhv, đhâu seiz njuôk shuôs, 15 lênhx tsi pov muôx moz li chas, 2 lênhx tsênhv tsi tâu tâu pâuz tsênhz. Ban chox kriê phax tar moz Covid-19 tỉnh Lai Châu tưz chox kriê têx lưv lươngv yơưz phơưz 66 lênhx tâu nhoz jê đros tus nênhs moz hêik sâu thiêz tso tơưv quyết tinhv kuôk cêv ntơưv tsêr. Iz chas ntơư, lưv lươngv muôx vax huôv ntơưv qơư cux tưz tsuôs yuôx tuô lov caz moz trâu têx qơư lênhx nênhs moz thiêz chor nênhs heik sâuv nhoz, muk lol đhâu./.

                             (Khắc Kiên-Riê Lâux cxeik, nhênhv)

Tỉnh Sơn La cux pov muôx cxaz 2 lênhx nênhs trâus moz SARS-Cov-2 ntơưv huyện Phù yên lok zar hnuz keix hnuz 21/7.

Tsênhv qơư seiz njuôk shuôk moz gênhk tỉnh Sơn La puz pâuz, 2 lênhx nênhs no zos 2 niêv txir, puôr lênhx nhoz huyện Phù Yên, tỉnh Sơn La, uô công nhân ntơưv Công ty Tân Nhật Hội nghĩa, Tân Uyên, Bình Dương. Cxôngx thâuv tror lok trâu huyện Phù Yên, 2 lênhx nênhs no tưz njuôs siv moz jiês 1 lok hnuz 19/7, njuôs xav nziv trâus moz SARS-Cov-2. Hnuz 20/7 njuôs siv jiês 2 thiêx pâuz tâu tsênhz zos trâus moz SARS-Cov-2 lok zar hnuz keix hnuz 21/7; đhâu co 2 lênhx nênhs no tưz tâu chox muk chơưv kho moz, cêv kuôk ntơưv tsêr kho moz đa khoa tỉnh Sơn La. 2 lênhx nênhs no tâu njuôs pov trâus moz hâur thax tsav cêv kuôk chêx chôngk nhoz tiv phaz, viv li njuôs xav cik moz trâu côngv thôngx zos phênhv tsơưs./.

(Trấn Long-Txâur Vax cxeik nhênhv)

Qir txix 12 six iz tas hmo hnuz 21/7, Chủ tịch Ủy ban tỉnh Lai Châu heik hâu nov cxuô thax tsav qơư thiêz têx cơ quan muôx vax huôv tax nduô tsês têx hâux lưv uô zuôr muôx chôngz nênhs, uô lax luôv tsi yuô zov chênhr li: Qơư hu gâux, heik cưr cxiêx uô si, qơư krêz uô si điện tử….. Iz chas ntơư, chox kriêx têx lưv lươngv sir jos qênhz yuôx, seiz kaz, xưv bluô ntov jông têx tsưr tsix, lênhx nênhs uô cxâuv têz qơưk têx cui tinhv lok phax tir thêir moz gênhk. Hok têx lênhx muk đrâuv luôs 2 chas tỉnh xar tror lok hâur thax tsav qơư, tsuv muôx ntơưr seiz njuôk shuôs moz tsi pov muôx moz li chas txơưr txar. Thiêz têx lênhx nênhs no tsuv tưx thêv nhiêx seiz njuôk shuôs moz trơưk li cui tinhv thiêz đhâu seiz njuôk shuôs tas zos tsi pov muôx moz li chas thiêx tâu lok hâur qơư nhoz./.

 (Khắc Kiên-Riê lâux cxeik, nhênhv)

Hâur 2 hnuz đhâu, sâuv thax tsav huyện Mai Sơn, tỉnh Sơn La muôx ntux lok nas lox thiêz lok six lox, đros co zos muôx chuô lox.

Ntux lok nas lox tưz uô 1 lênhx nênhs tuôs tiv trâus đêx cuôr yôngz, co zos tix lâuk Phạm Công L, xênhz shông 1986 nhoz tiểu khu 8, xã Nà Bó, huyện Mai Sơn. Đêx nas cux uô yênhx puôk yiv đruôz ar poz lok hâur cêr uô cêr 110 muk lok tsi tâu.

Ciês thâuv muôx têx ruôr hiêv tiv ntux nas, Ban chỉ huiz phax tar ntux nas thiêz nriêr chơưv nanv huyện Mai Sơn thiêz xã Nà Bó tưz muk qênhz yuôx, chox kriê côngz xưv phưx vưv, thôngz sâu têx trâus ruôr hiêv thiêz khơưk muôz chor nhiêx txiêx zos 7 tsov đeiv ntâu paz chuôz zis muôx nênhs tuôs lơưr cui tênhv.

Njuôs pov, hâur 1-2 hnuz zuôr txos, sâuv thax tsav tỉnh Sơn La tror muôx ntux lok nas. Tsôngv box tsuv tsưv ziv phax tar chiê txu grês têx trâus ruôr hiêv./.

                                                    (Thu Thùy-Txâur Vax cxeik nhênhv)