Đros thiêz mê nhuôs sâuv tas nro têz qơưk, mê nhuôs zâu nhoz têx tỉnh Tây Bắc puôr lênhx muôx iz luz tsiêz Trung thu sor si, puôr lênhx jênhv tâu huv txơưv tsi tâu cxaz chuôz tơưk tênhz muk uô si li niêx shông viv moz Covid-19 huôv xênhz phêv liv.

Ntơưv tỉnh Sơn La, zuôr xar 100 lênhx mê nhuôs tsênhv kho moz ntơưv tsêr kho moz đa khoa tỉnh Sơn La tưz jênhv tâu têx phênhv huv muôx: ntơư zos thax cuô mis, thax nduôr, chuôz zênhx uô si thiêz chuôz zênhx cơưv ntơưr cxôngx têx qơư piêr puz hax huv tsi pôngz nhiêx txiêx. Iz lênhx mê nhuôs tâu muôz iz đeiv ntơưr muk jênhv zuk li huv. Ndax six hơưv no, Sở lox tôngv thương binh thiêz xã hội tỉnh Sơn La đros trâu iz cxiê taz viv tưz khơưk muôz 40 phênhv huv puz trâu mê nhuôs muôx luz nênhx txov nhêv tsênhv kho moz ntơưv tsêr kho moz đa khoa tỉnh thiêz nhân viên y tế cxaz chuôz tir tar moz têx mê nhuôs./.

(Trấn Long-Txâur Vax cxeik nhênhv)

Cux ntơưv tỉnh Sơn La, thax tsav qơư no nhiv kruôr cuêz tênhv zuôr sir zôngv nhiêx txiêx têz qơưk ntơưv qơư thiêz têx nhiêx huiz tôngv paz chiê paz trâu chor lox tôngv tsik muôx hux thôngx lok tôngv trâus pôngz hâux lưv uô njiz trâus phiv liv tiv moz Covid-19.

Lơưr cuêz tênhv nhiv kruôr tso tơưv, chor nênhs tâu tỉnh Sơn La paz zos chor lox tôngv tsik muôx hux thôngx lox tôngv (lox tôngv tự do) trâus pôngz hâux lưv uô tiv phiv liv txix moz Covid-19 sâuv thax tsav tỉnh tsênhv uô iz hâur têx hâux lưv li: Sâu têx vuôz tsuôz, thâux xa hax huv txix têx yêz pêz luz los, lox tôngv zos chor thợ (thợ cxiv tsa, thợ sơn…); Tưx kriz uô lok sik uô hâux lưv ntơưv têx qơưk nhoz so trâu kruô du lịch, homstay, tsêr kruô so pư, tsêr uô jâuz mor nox hâuk….

Phênhv paz trâu chor nênhs tsik muôx hâux lưv uô txix 15 hnuz tsik so tror sâur txos tsik tâu muôx 30 hnuz zos 50 cxênhz đêiv iz lênhx nênhs iz hnuz; chor nênhs trâus pôngz hâux lưv uô txix iz hli tror sâur mak tâu paz 1,5 triệu đêiv iz lênhx nênhs iz jiês.

Chiê tâu paz mak nênhs lox tôngv tsuv nhoz zos chêi sâuv thax tsav tỉnh Sơn La; nênhs trâus pôngz hâux lưv uô txix 15 hnuz tsik so tror sâur tiv tsuv cêv kuôk xar hôiv lok sik tso tsês têx hâux lưv uô chiê phax tar moz Covid-19 lơưr UBND tỉnh Sơn La li cui tênhv./.

(Thu Thùy-Lik Thox cxêik nhênhv)

Ntơưv xã tox siêz Tiêx Njênhx, huyện Điện Biên Đông, tỉnh Điện Biên, têx shôngk jê ntơưv no, tsôngv box tưz truôx siêz hlôngr yiêz tsoz chos cxôngx chos poz cưk, kok ntông, blêx têz hlôngr chiê chos tâuz tưs chox lok chêx cuk kinh têr siêz đuô. Khov tsov cưv huôv tsar lơưr tsưr ziv uô hax huv, xiv huv tâuz tưs Tiêx Njênhx tâu côngz jênhv zos xiv huv OCOP, yênhx tsoz chos tsênhv paz tsôngv box sâuv thax tsav cxuôv yeiz thiv pluôs. Zơưv Lâux Xênhv Tsaz, Phưv Chủ tịch UB xã Tiêx Njênhx puz pâuz, nhiv no tas nro xã muôx 80 hecta ntâu ar têz chos tâuz tưs đros muôx 100 ntâu ziv chuôz zis cxaz chuôz, phênhv ntâu zos pox nhuôs mênhx cxưx Hmôngz. Nôngz tâuz tưs Tiêx Njênhx zos nôngz tâuz tsư kaz, khor, zôngx ziv por coar, huv đros hâux lưv thâux xa: “Huôv tsar chos tâuz tưs tưz paz pox nhuôs muôs tâu trâu niêv ciêz, hâux lưv tsoz phưz cux zôngx ziv, zuk tsuôk chos thiêz nthuô iz jiês đrox viv li txos nhiv no muôx têx qơư chos nzor mak tưz txos six hơưv sâu đê, yuôr têx qơư chos lis mak tsi tâu sâu tâu. Tâuz tưs paz pox nhuôs hlôngr yiêz luz nênhx”./.

(Vũ Lợi-Txâur Vax cxeik nhênhv)

Jok Phô Hồ Thầu, xar Hồ Thầu, huyện Tam Đường, tỉnh Lai Châu nhiv no muôx 110 ziv chuôz zis mênhx cxưx Cho uô nênhx nhoz, hâur co muôx zuôr xar 40 ziv chuôz zis nho ntơưv têx qơư zôngx ziv njiz trâus ar xưz poz siêz. Têx trâus hiêv txix txuz ar poz shông uô ntêx tưz đhâu muôx iz shông ntâu taz sik đros pêx xênhv jok Phô Hồ Thầu mak cux tsênhv ndo njôngr txos thiêz lok six cxơưx, tiv zix zos thâuv muôx ntux nas lok. Txix thâuv hâur chêix ntux nas txos nhiv no, chiê muk uô tâu liêx mak pox nhuôs tsuv muk đhâu kror qơư muôx ar poz kuz lok six riêz nênhs.

Đros jok Phô Hồ Thầu, nhiv no  tỉnh Lai Châu tsênhv yuôr yênhx cxênhz ziv chuôz zis uô nênhx nhoz hâur têx tơư trôngz, ntus cưx đêx cưx ha zos têx thax tsav qơư zuôr zôngx ziv njiz trâus đêx ngaz cuôr, ar poz siêz tsik tâu txar muk trâu têx qơư nhoz ngaz tuk đuô. Viv li, lok six khov txos Trung ương li têx paz lok pênhr nhiêx chiê ntơưv thax tsav qơư txar chor chuôz zis no muk nhoz trâu têx qơư ngaz tuk đuô./.

(Khắc Kiên-Lik Thox cxêik nhênhv)