Hnuz đhâu 23/9, Hội liên hiệp pox niêv tỉnh Yên Bái tưz tsưr tsix Đại hội teiv plor jiês tiv 16.

Six cxiv đhâu, têx cấp hội pox niêv tỉnh Yên Bái tưz uô tâu 5 cxênhz 400 ntâu huôx tôngv yax mông, vênhv tôngv cán bộ, hội viên cxaz chuôz têx phongz yaox tưr thik, tỉnh, tiv phaz li têx hâux lưv chinhr trị, zaz zâuv tâu 770 cxênhz ntâu jiês hội viên pox niêv thiêz tsôngv box cxaz chuôz. Cxôngx qênhx shênhx moz Covid-19 huôv xênhz phêv liv, têx cấp hội tưz tsưr tsix zuôr xar 3 cxênhz jiês yax mông, phuôx tôngv phongz yaox tưr thik phax tar moz cxôngx têx hâux lưv uô tsênhv tsênhz. Hâur phongz yaox “Pox niêv txơưx uô kinh têr” tưz muôx zuôr xar 2 cxênhz 800 trâur nuv yiêz huôv tsar, 5 cxênhz 300 ntâu ziv chuôz zis hội viên pox niêv hla đhâu cêr pluôs. Pos Chu Thị Sinh, Chủ tịch Hội liên hiệp pox niêv xã Mường Lai, huyện Lục Yên, tỉnh Yên Bái shir phaz heik: “Dưv đại hộiv cur pov jiês no muôx ntâu kror yiêz. Đhâu đại hội no tror lok tiv phaz cur zuôr sir jos muôx têx tsưr ziv huôx tôngv côngz xưv hội, uô tỉnh li tsaz yênhx, tsưr ziv heik cxuô thiêz huyện Lục Yên heik taz”./.                        

(Đinh Tuấn- Lan dịch đọc)

Sở Zoz zux tỉnh Sơn La nhiv kruôr cơưv shâuv uô luôs hâux lưv kriê ntơưr txuôk đros têx shux xênhz đhâu hâur mêir tính, máy hu xor tôngx….hâur ntu têx nhuôs shux xênhz tuôx muk tsi tâu trâu tsêr cơưv, cơưv ntơưr chiê phax tar moz Covid-19 nhoz iz cxiê luz tsêr cơưv hâur thax tsav TP Sơn La. Trơưk li zơưv Nguyễn Huy Hoàng, Giám đốc Sở Zoz zux tỉnh Sơn la, jiês cơưv shâuv uô luôs hâux lưv heik sâuv paz chor cưk kriê ntơưr thiêz shux xênhz, shux xênhz li niêv txir, hâu nov ntơưv qơư bax tâu jông tsưr ziv kriê thiêz cơưv ntơưr đhâu hâur mêir tính, máy hu xor tôngx, ti vi thâuv muôx moz gênhk, sđ tuôx tsi tâu trâu tsêr cơưv kriê thiêz cơưv ntơưr. Taz sik, tỉnh Sơn La nhiv no muôx nhos 90 cxênhz ntâu lênhx shux xênhz muôx tsi txâuk têx chuôz zênhx chiê phưx vưv cơưv ntơưr li heik sâuv, chênhr viv li chiê uô tâu jông hâux lưv kriê thiêz cơưv ntơưr đhâu hâur mêir tính, máy hu xor tôngx, ti vi, ngênhx zoz zux tỉnh tsênhv sir jos fuô uô tsaz yênhx “paz muôx sóng thiêz meir tính trâu chor nhuôs shux xênhz cơưv ntơưr”. Xuz thơưx chor mêir tính muôx tâu zuôr muôz uô ntêx trâu shux xênhz huyện Phù Yên thiêz têx shux xênhz vax tsêr txov nhêv, chuôz zis pluôs, zuôr xar pluôs chiê phưx vưv cơưv ntơưr: “Sở Zoz zux cux tưz chox kriê cxuô luz tsêr cơưv, têx qơư kriê ntơưr sir jos yax kriê, heik chiê shux xênhz niêv txir moz siêz txos, yưv pênhr zuôr mêir tính, muôz xor tôngx trâu zuk têx tuz nhuôs cơưv ntơưr, tiv 2 zos têx tsêr cơưv cux chiv chir heik kriê, uô trơưk Bộ li Thông tư sôr 16 lok sâuv heik đros paz max trâu têx tsêr cơưv chiê muôx nzir pênhr jos, têx chuôz zênhx phưx vưv kriê thiêz cơưv ntơưr hâur ntu muôx moz gênhk huôv xênhz phiv liv, cov chor nhuôs tâu cơưv ntơưr đhâu online, cơưv đhâu xor tôngx, mêir tính”./.

(Trấn Long-Riê Lâux cxeik, nhênhv)

Chiz coaz cảnh sát qênhz yuôx C03, Bộ công an côngv đros Phongx cảnh sát kinh têr, Công an tỉnh Điện Biên nhiv kruôr krêz tik cêr cxâuv txuz án uô cxâuv cui tênhv lok đấu thâux uô ruôr hiêv hnhar; tik cêr cxâuv ntês kuz Giám đốc Sở zaoz zux thiêz thox cxov tỉnh Điện Biên zơưv Nguyễn Văn Kiên đros 7 lênhx nênhs txơưr. Lơưr co, tsov lơưr chêx cuk qênhz yuôx, xav tênhv thiêz ntâuz ntơưr sâu tâu: zơưv Nguyễn Văn Kiên, kuz Giám đốc Sở zaoz zux thiêz thox cxov tỉnh Điện Biên tưz chox kriê iz cxiê cán bộ sik côngv đros Công ty cổ phần ntơưr thiêz chuôz zênhx cơưv ntơưr Điện Biên (tsưr thâux) thiêz Công ty cổ phần seiz shuôk grê BTCVALUE, Công ty trách nhiệm HH heik kriê cxiv tsa T&C, Công ty TNHH heik kriê thiêz cxiv tsa Tây Đô muôx têx hâux lưv uô cxâuv Chei đấu thầu chiê Công ty cổ phần ntơưr thiêz chuôz zênhx cơưv ntơưr Điện Biên txeik jênhv tâu 2 poz thâux cungz chuôz zênhx kriê ntơưr, uô ruôr hiêv txos têz qơưk li chuôz zênhx chuôz tas. Nhiv no chiz coaz cảnh sát qênhz yuôx Bộ công an tsênhv tror qênhz yuôx txuz án thiêz xav tênhv sâu tsês tas nro têx chuôz zênhx co./.

(Vũ Lợi-Txâur Vax cxeik nhênhv)

Ntơưv thax tsav đriv têz hâur jok Na Bủ-Hàm Rồng, thị trấn Mường Khương, tỉnh Lào Cai, tổ côngz xưv Zênhx Pênhz phax Mường Khương đros Công an hâur thax tsav qênhz pov Vùi Chẩn Làng, heir nênhs Nùng, xênhz shông 1971, nhoz ntơưv jok Tùng Lâu, thị trấn Mường Khương tsar iz luz yêz meir thâux gra tsi trơưk chei 0,81 gram zênhz đơưz. Đhâu hlo thâuv uô tiêr têx ntâuz ntơưr, Zênhx Pênhz phax Mường Khương tưz tso tơưv quyết tinhv chiê qênhz yuôx, muôz tik cêr cxâuv trơưk li chei têz qơưk cui tinhv. Đhâu qênhz yuôx nus, Làng zos lênhx nênhs trâul muôx zênhk zax zênhz, tsi tâu tâu trâul tik cêr cxâuv iz jiês tưs hlo, taz sik tưz muôx jiês tâu chox muk chiv zênhk zax zênhz iz shông ntâu, đhâu co tror lok ho tror kaz trâul muôx zênhk zax zênhz./.

(An Kiên-Riê Lâux cxeik, nhênhv)

Zuôr xar 2 luz hlik no trôngx đriv Ma Lù Thàng, ntơưv huyện Phong Thổ, tỉnh Lai Châu tso tsês tsi huôx tôngv muôv muôs xiv huv kôngz nuv đhâu ntus đriv, uô yênhx cxênhz ziv chuôz zis nôngx mênhx nhoz tiv phaz njiz ntâu phêv liv viv muôs tsi tâu txir tsơưz njuôz. Muôs tsi tâu txir tsơưz mak tsi muôx phênhv sâu, ntâu chuôz zis tsuôk txiêr por tsês tas têx tsơưz tưz chos. Thax tsav ciêz muôs tsơưz ntơưv xã ntus đriv Ma Ly Pho, huyện Phong Thổ, tỉnh Lai Châu ntâu hnuz no tsi muôx lênhx nênhs muôv muôs. Tiv moz Covid-19 uô zênhr shar, huôx tôngv muôv muôs tsơưz đhâu trôngx đriv Ma Lù Thàng tso tsês tsi huôx tôngv iz ntu ntêr, uô nôngx mênhx njiz ntâu phêv liv. Chiê muôs tsơưz trâu tsôngv box, têx chiz coaz muôx txơưx jênhv tỉnh Lai Châu tsênhv cxơưz tiês huôx tôngv paz txưv, heik kriê têx doanh nghiệp sik côngv chox têx xiv huv no muôs ntơưv têx siêu thị hâur thiêz đrâuv tỉnh. Lok lêx ntêr, tiv phaz tsênhv zaz zâuv têx doanh nghiệp yưv pênhr cxiv tsa tsêr meir tsiv uô, paz pox nhuôs nôngx mênhx muôx qơư muôs xiv huv truôx vênhs./.

(K.Kiên-Txâur Vax cxeik nhênhv)