Hnuz 29/12, Phưv Chủ tịch Côx hôiv Phùng Quốc Hiển thiêz đoanx côngz xưv Côx hôiv tưz dự jiês njiz njêx muôs chiv nhênhv 75 shông hnuz tổng bâux xêir xuz thơưx ciês (6/1/1949-6/1/2021) thiêz tổng kết côngz xưv Đoanx têiv plor Côx hôiv tỉnh Lai Châu, ntu 2016-2021. Ntơưv jiês njiz njêx muôs, Phưv Chủ tịch Côx hôiv Phùng Quốc Hiển tưz hênhr kruôk txos têx kror mak Đoanx têiv plor Côx hôiv tỉnh Lai Châu uô tâu hâur ntu đhâu. Thôngx cxix, hêik ntu zuôr txos, Đoanx têiv plor Côx hôiv tỉnh Lai Châu tror sir jos đuô chuôs njiz cử tri, uô têx hâux lưv sêiz kaz, chiê paz muôz Đảng, Têz qơưk têx tsênhv chêi, cêr chêi piêr txos trâu pêx xênhv pâuz, tiv zix zos txo grêk cêr yêiz pluôs, cxiv tsa jêx jok yiêz…./.

(Khắc Kiên-Lik Thox cxêik nhênhv)

Trấn Long, nênhs sâu xor xưv Đeix TNVN nhoz faz Tây Bắc xa mông: Nhiv kruôr đhâu, đôngx chir Tòng Thị Phóng, Ủy viên Bộ chính trị, Phưv Chủ tịch Thường trực Côx hôiv đros đoanx côngz xưv tưz muk shuôs, muôz huv puz trâu shux xênhz cxênhx iz muôx luz nênhx txov nhêv thiêz nênhs lâuk hnuz nhôngs siêz ntơưv jok Phứa Cón, phường Chiềng An, TP Sơn La, tỉnh Sơn La. Jok Phứa Cón, phường Chiềng An (TP Sơn La) muôx 220 ntâu chuôz zis, 780 ntâu lênhx nênhs, 5 heir nênhs uô nênhx nhoz uô cê. Taz sik, viv luz jok no nhiv kruôr muôz 2 jok Bó Phứa thiêz Bó Cón lok uô cê yênhx iz jok, viv li cux tsênhv yuôr ntâu txov nhêv li: Cêr muk lol, tsêr vênhx huôv tsênhv mê grêiv, tsi txâuk chiê sđ muk lol đhâu thiêz zôngv uô têx hâux lưv uz no hâur jok; đêx xênhz huôx muôx tsi txâuk zôngv, phênhv ntâu tsôngv box tưx khơưz têx kror đêx, tưx gruk đêx lok zôngv, tsi taz por đas jos; tsêr cơưv nhoz đêz tsênhv qơư.... Heik ntơưv jiês chuôs njiz tsôngv lax px cưr tix nênhx tsa sđ, pos Tòng Thị Phóng, Phưv Chủ tịch Thường trực Côx hôiv heik:

“Hnuz no cur tuôx no, xuz thơưx zos nus txos thiêz phôngv côngz trâu chor lâuk, têx pos zơưs, txir hloz niêv hloz, txir nzơưv niêv nzơưv, chor tuz nhuôs sđ muôx đas jos, shông yiêz sđ uô nênhx sik thôngx siêz, siz hluz siz paz. No zos iz jok muôx 5 heir nênhs zos lok six jông, tsôngv box Hmôngz, tsôngv box Nùng, Poz ziz, Choz Tsiz...., cur heik nêx sđ tror sik thôngx siêz, siz hluz siz paz, sik đros huôv tsar uô nox uô hnar chiê sik đros muôx luz nênhx tsâu sor”./.

(Trấn Long-Riê Lâux cxeik, nhênhv)

Hâur ntu no, gri sâu zuôr njiêr poz cưk, kok ntông tsuôr uô yênhx đêiv ntơưv cxuô qơư sâuv thax tsav tỉnh Sơn La chuôz ndê txix 1.200-1.500 đêiv iz cir pir li tsêiz no. Gri têx kôngz lôngk ndê paz trâu pêx xênhv Sơn La txo grêk tsơưs têx phiv liv tiv moz Covid-19. Txos nhiv no, tỉnh Sơn La muôs tơưv saz đrâuv têz qơưk tâu xar muôx 100 cxênhz tấn kok ntông tsuôr uô yênhx đêiv trâu têz qơưk Trung Quốc. Chor nênhs zuôr saz Trung Quốc nhiêv zuôr Việt Nam thiêz Thái Lan têx kok ntông tsuôr đuô. Ciês ntơưv ciêz đrôngs têx huyện nhoz tỉnh Sơn la hnuz 29/12 cux chuôz ndê siêz txix 4.500-5.000 đêiv iz cir; gri kok ntông nhôngk txix 1.800-2.000 đêiv iz cir; gri njiêr poz cưk txix 6.400-6.500 đêiv iz cir. Txơưv zos chor tsoz chos lur hnuz thiêz tsik cxơưz cxiz huôv tsar chos, taz sik đros ntâu thax tsav qơư nhoz Sơn La, poz cưk, kok ntông cux tsênhv zos chor zav tsoz chos paz muôx phênhv sâu chênhr trâu pox nhuôs thâuv tok phênhv sâu txix têx tsoz chos ntêr shông thiêz muôx nzir kôngz krâur chiê huôv tsar tu zus tsiêx cxu./.

(Thanh Thủy-Lik Thox cxêik nhênhv)

Zar hnuz kêix 29/12, đhâu thâuv uô tiêr têx luôs hâux lưv, dưv anr txuôk đros tỉnh txox cêr 152 thiêz cêr muk chênhr Nội Bài-Lào Cai (tsênhz đuô zos ntu cêr muk trâu thị trấn Phố Lu, huyện Bảo Thắng, tỉnh Lào Cai) tưz tâu krêz uô hâur tsôngv px sđ cêr shir phaz, jông siêz uô ntêx shông yiêz 2021. Dưv anr tâu krêz uô tưz đơưk tâu iz phênhv tưs tsôngv px ntơưv qơư siêz vav thiêz tok njôngr hâur 6 shông đhâu, xav txix thâuv txox cêr muk chênhr Nội Bài-Lào Cai tâu zôngv chiê trâu sđ muk lol đhâu; paz tsôngv box Phố Lu thiêz têx thax tsav nhoz jê iz ndis co zôngx ziv muk lol; tsi muôx têx qơư nhoz đêk tok kruô tsi trơưk chei, uô zoz thôngz tsi truôx tuk; tso tsês têx li: tsôngv box ruôr, txiêr têx lax caz xor thêir ntus cêr nhoz tok yêz kruô sâuv txox cêr muk chênhr..... Pos Bùi Thị Hỷ, nhoz thị trấn Phố Lu heik:

“Pêz zos px hâur thax tsav, cux chiê siêz tok lok six ntêr lol no lơưv, txix thâuv dưv anr qir fuô kriê, đhâu ntâu jiês heik trâu têx hloz. Txos nhiv no dưv anr tâu krêzuô, pêz lok six shir phaz thiêz jông siêz, tsôngv box sđ tuôx seiz lok six chôngz, lênhx tưs cux shir phaz lus. Dưv anr no muôx têx zuôr gra lok ntâu têx jông trâu px li: Huôv tsar uô nox, muk lol, muôz six hơưv jông trâu huyện Bảo Thắng cux li tỉnh Lao Cai ziv hnuz ziv huôv tsar đuô”./.

(An Kiên-Riê Lâux cxeik, nhênhv)