Ntux lok nas tsi tu hlo hâur 2, 3 hnuz đhâu tiv coz nas chuô lox sôr 3 uô hiêv txos, tưz uô yênhx puô thax tsav, suôv qơư sâuv cxuô txox cêr lox, cêr mul lok nhoz tỉnh Sơn La trâus xưz poz, cxuz cêr tas, têx yêz mul lok tsi tâu đhâu. Xav txos 5 six tsâuk ntux hnuz xiêz 4/8, ntux nas tưz uô têx tsas ar siêz trâus xưz poz lok cxuz cêr sâuv 8 txox cêr mul lok hâur tỉnh, đros thiêz muôx 470 qơư trâus xưz poz. Đros thiêz têx cêr mul lok hâur tỉnh, xav hur si muôx 16 txox cêr, muôx 410 ntu trâus xưz poz lok cxuz cêr, uô phiv liv trâu lênhx nênhs thiêz têx yêz mul lok đhâu. Ngênhx zoz thôngz yêz lox tỉnh Sơn La cux tsênhv chox kriê lưv lươngv seiz jor, qênhz shuôs njôngr thơưv hnuz thơưv hmo chiê pâuz tâu têx txơưr txar phiv liv thiêz muôx tsưr ziv phax tir thêir zênhx max.... Huyện Mộc Châu zos thax tsav qơư trâus uô ruôr hiêv hnhar đuô hur si hâur tỉnh Sơn La. Xav txos 5 six tsâuk ntux hnuz xiêz 4/8 tưz muôx iz lênhx nênhs trâul tuôs, 14 luz tsêr trâus ar, poz jêz xưz poz lok cxuz; yênhx puô luz tsêr tưz tsuv txar, khiêr đreiv đêx nas chuô 2 jiês./.

                (Thanh Thủy, Thu Thùy-Riê Lâux cxeik, nhênhv)

Coz nas chuô số 3 uô ruôr hiêv ntâu trâu tỉnh Điện Biên thiêz Yên Bái. Ntơưv Điện Biên, lok nas uô 2 lênhx mê nhuôs tuôs thiêz plox mông, 3 xã ntus đriv nhoz huyện Nậm Pồ muk lok tsi tâu. Yuôr ntơưv tỉnh Yên Bái, đêx cuôr yôngz 8 chuôz zis tsôngv box nhoz huyện Trạm Tấu, lor 7 tul ndêx tênhv nhoz thị xã Nghĩa Lộ, tox poz ntơưv cêr 174. Ntơưv huyện Yên Bình, ntux nas uô tox poz sâuv cêr 170 zaoz thôngz muk lok tsi tâu ntơưv cêr yuôv jê tsêr cơưv THPT Cảm Nhân...Ciês thâuv muôx ntux nas ruôr hiêv, Ban chỉ huiz phax tar ntux nas thiêz nriêr chơưv nanv têx tiv phaz tưz chox kriê têx xã chêx chôngk huiz tôngv lưx lươngv paz têx ziv chuôz zis khưx phưx têx trâus ruôr hiêv. Qênhz yuôx thôngz sâu têx trâus ruôr hiêv, txar qơư nhoz trâu tsôngv box muk nhoz qơư taz por đuô, tror cxiv uô tsêr nhoz trâus têx chuôz zis trâus zênhr shar./.

(Thừa Xuân- Vũ Lợi- Txâur Vax cxeik nhênhv)

Six hơưv jê lok no, tsôngv box thax tsav tox siêz nhoz Lào Cai tsi so njiz trâus ntux uô ruôr hiêv li: Hluôr tơưk cuz jôngr, đêx nas cuôr yôngz, tox xưz poz. Qir tiv uô muôx têx li heik sâuv, iz phênhv zos tiv cxiv uô ntâu têx côngz trênhx tsêr meir tênhv tênhz mê thiêz tov thơưx. Cơ quan seiz car thiêz tsưr yưv pênhr uô luôs hâux lưv cxiv tsa tsi trơưk cui tinhv, tsi moz siêz seiz shuôs jông tưz uô muôx têx jông li heik ntơư. Zơưv Nguyễn Phương Tuấn-Ủy viên thường trực Ủy ban đối ngoại Côx hôiv heik: “Pêz tsuôk huôv tsar cxiv uô têx tsêr meir tênhv tênhz mê thiêz tov thơưx trơưk cui tinhv xưz. Thâuv fuô uô têx côngz trênhx no, pêz tsuv ntâuk grê têx uô hiêv txos tênhx qơư lok six tsênhv mênhx thiêz jông. Viv uô hiêv txos pêz tsi zos tav siv mak lol six ntêr zar tov kaz no, muôx têx yênhx châuv shông tov kaz thiêx uô hiêv txos”./.

                                  (Vũ Thắng-Riê Lâux cxeik, nhênhv)

Tsôngv box li iz luz tsêr nhoz jos Nậm Chua 4, xã Nậm Chua, huyện Nậm Pồ, tỉnh Điện Biên nhoz nhiv kruôr trâus cuz nhiêz tas hur si thâuv tsưr tsêr tsi nhoz hâur tsêr. Qir tiv zos tiv mê nhuôs txov hluôr tơưk uô txeik cuz tsêr nhoz. Môngr jông tsi muôx lênhx tưs trâus saz. Luz tsêr trâus cuz zos zơưv Hoàng A Páo xênhz shong 1974 nhoz jos Nậm Chua 4 luz. Ciês thâuv luz tsêr trâus cuz, têx lênhx nênhs hâur chuôz zis tưz muk khov nhoz ntơưv jêx jos tsêr thiêz uô tsêr tax nhoz. UB xã Nậm Chua cux tưz muk tôngv vênhx, seiz nus thiêz paz txưv têx chuôz zênhx, cxur, njêr, mix chênhr, qox pav....chiê chuôz zis khưx phưx têx trâus ruôr hiêv uô ntêx./.

(Vũ Lợi- Txâur Vax cxeik nhênhv)

Huyện Sông Mã, tỉnh Sơn La nhiv kruôr tsưr tsix ntênhs côngz fur txir lưv tsiz Sơn La muôs trâu ciêz đrôngs Mỹ thiêz Trung Quốc. Huyện Sông Mã, tỉnh Sơn La zos iz hâur têx huyện chos ntâu txir lưv tsiz yax hâur hur si têz qơưk, muôx 6.700 ntâu ha têz txir lưv tsiz, 300 ntâu ha tâu chos thiêz tu trơưk cui tinhv VietGap, 22 ha ntâu tâu côngz ntơưr chos txir lưv tsiz muôs trâu luôs 2 chas têz qơưk đrâuv. Shông 2018, muôs muôx nhos 300 ntâu tênhr txir lưv tsiz nhôngk trâu têx ciêz đrôngs têz qơưk đrâuv, njuôk xav shông 2019 Sông Mã zuôr muôs 6 cxênhz ntâu tênhr muk trâu Hàn Quốc, Mỹ thiêz Trung Quốc.... Hâux lưv tsưr tsix ntênhs côngz fur zuôr piêr txos, heik kriê têx xiv huv, lar heik zos hu lơưk têx lênhx nênhs yưv pênhr uô, doanh nghiệp sik hux jos đros sâu zuôr têx kôngz, paz têx kôngz tâu tsar ndê gri, txix ntơư gra siêz phênhv sâu tâu trâu tsôngv px.../.

                 (Đắc Thanh-Riê Lâux cxeik, nhênhv)