Chủ tịch UB tỉnh Lai Châu Trần Tiến Dũng nhiv kruôr cir ntâuz ntơưr tso shux xênhz so ntơưr chiê phax tar moz lok cêr uô pa tiv caz moz côrôna. Lơưr co, zuôr xar 150 cxênhz lênhx shux xênhz nhoz 5 cxênhz 700 lớp cơưv, nhoz 353 luz tsêr cơuv sâuv thax tsav tỉnh zuôr tâu so ntơưr cxôngx hnuz xiêz 3 txos hnuz xiêz 9/2. Ntâuz ntơưr heik mênhx, cxôngx qênhx shênhx moz lok cêr uô pa tiv caz moz côrôna tsi so cik đêz đar, thiêz phax tar ntux no njiv, taz por đas jos trâu shux xênhz, Chủ tịch UB tỉnh Lai châu heik Sở zaoz zux thiêz thox cxov, UB têx huyện, thành phố thôngz pov txos têx tsêr cơưv, têx taz viv trực thuộc tso shux xênhz têx tsêr cơưv mê nhuôs zâu, cxênhx 1, cxênhx 2, tsênhv qơư zaoz zux hâux lưv uô thiêz zaoz zux yax six so ntơưr hâur 7 hnuz, cxôngx hnuz xiêz 3 txos hnuz xiêz 9/2./.

(Khắc Kiên- Txâur Vax cxeik nhênhv)

  Ntơưv huyện Mường La, tỉnh Sơn La, chor nênhs uô lox tôngv txix Trung Quốc tror lok muôx iz lênhx nênhs zos niêv tix Q.T.V, nhoz ntơưv xar Mường Bú, huyện Mường La, tỉnh Sơn La muk uô jos ntơưv tỉnh Nam Ninh (Trung Quốc) tror lok têz qơưk txix hnuz 23/1. Kuôk no 5 hnuz, niêv tix V trâus uô cuz, hnôngk viv li tưz tâu tsêr kho moz huyện Mường La yêv tuôx tsêr kho moz đa khoa tỉnh Sơn La chiê sêiz njuôk thiêz chơưv kho. Thav đros nênhs sâu xor xưv hmo 2/2, zơưv Đỗ Xuân Thụ, Giám đốc tsêr kho moz đa khoa tỉnh Sơn La puz pâuz: Nhiv no Q. T. V, tưz tror jông  moz. Xuz thơưx njuôk xav tiêk nênhs moz trâus moz khâuz thuôk xưz. Uô ntêx thâuv zuôr tuôx trâu tsêr kho moz đa khoa tỉnh Sơn La, nênhs moz trâus uô cuz, moz khâuz thuôk ntơưv tsêr oz pêz hnuz thiêz tưz jông moz. Taz sik, tiv tror lok txix Trung Quốc, viv li chiê cov ngaz tuk, uô jôngz côngz xưv phax, tar caz moz, tsêr kho moz đa khoa tỉnh Sơn La tưz chơưv kho cêv kuôk chiê sêiz shuôk đas jos thiêz xa nyar trâu Trung ương njuôk shuôk caz moz./.

(Tuyết Lan-Lik Thox cxêik nhênhv)

  Lơưr Viện vêv xênhz dịch tễ Trung ương li chêx cuk njuôs siv, muôx 2 lênhx nênhs zos Lê Văn Thạch, 19 shông thiêz Ngô Thị Thu Huyền 30 shông trâus cêv kuôk, seiz njuôs ntơưv tsêr kho moz đa khoa tỉnh Yên bái puôr lênhx tsi zos trâus caz moz côrona. Li ntơưv, nhoz tỉnh Yên Bái muôx 5 lênhx nênhs njuôs xav trâus caz moz côrôna tâu cêv kuôk, kho moz puôr lênhx tsi zos tiv caz moz côrôna. Đros chêx cuk no mak khav tênhv tâu tiêk tỉnh Yên Bái nhiv no tsi tâu muôx lênhx nênhs tưs trâus moz lok cêr uô pa tiv caz moz côrôna./.

(Thừa Xuân-Txâur Vax cxeik nhênhv)

Lưx lươngv phax tar zax zênhz thiêz nênhs phamv cxâuv Công an tỉnh Điện Biên thiêz Bôv chỉ huy Bôv đôiv Pênhz phax tỉnh Điện Biên nhiv kruôr zok cxov tâu iz txuz zuôr muôs zax zênhz ntâu thôngz têz qơưk, cxov tâu oz lênhx nênhs zos, Lầu Xênhv Zax (zus shông 1984), nhoz jok Háng Pa, xar Chiềng Sơ, huyện Điện Biên Đông thiêz Sai Xênhv Zax (zus shông 1971), nhoz ntơưv jok Thẩm Chấu, xar Chiềng Sơ, huyện Điện Biên Đông, tỉnh Điện Biên. Têx sâu tâu zos: 120.000 luz yuôx zax zênhz, 1 luz yêz mêir đros ntâu zav txơưr đuô cik txos.

Ntơưv cơ quan qênhz yuôx Lầu Xênhv Zax hêik tiêk chor zax zênhz co tâu Sai Xênhv Zax ntiêr gra tuôx trâu jok nênhs Lào ntơưv xar Núa Ngam, huyện Điện Biên zuôr muôx nênhs txêik thiêz thêv nhiêx côngz zos 100 triệu đêiv. Taz sik thâuv tsênhv gra zax zênhz tuôx txos tos cêr chêk trâus cxov tsês. Nhiv no txuz hâux lưv tsênhv tror tâu qênhz yuôx uô cov tsênhz mênhx./.

(Vũ Lợi-Lik Thox cxêik nhênhv)