Ntơưv TP Lào Cai nhiv kruôr tsưr tsix phêv ziv cxơưz cxiz sik côngv zuôr muôs kôngz jôngr, đêx nuv đhâu ntus đriv, zaz zâuv 120 teiv plor VN thiêz Trung Quốc cxaz chuôz. Phê vziv zos hâux lưv jông sik côngv trôngx đriv Lào Cai- Hà Khẩu đros Côn Minh-Lào Cai-Hà Nội-Hải Phòng- Quảng Ninh. Đhâu co, gôngr phênhv uô chính phuv thiêz Bộ công thương 2 têz qơưk li chủ trương zos cxơưz tiês muôv muôs hax huv, muôz siêz tsiv grê muôs tơưv hâur VN thiêz Trung Quốc. Hâur phêv ziv jiês no cux muôx 30 qơư piêr muôs VN li têx xiv huv jông li txir ntông, cà phê, shuôz njês, yuôx njuôz…Tiv zix, ntơưv phêv ziv, tưz muôx 5 biên bản sik hux jos tâu cir hâur têx doanh nghiệp VN thiêz Trung Quốc./.          

 (A.Kiên-Txâur Vax cxeik nhênhv)

Ủy ban tỉnh Sơn La nhiv kruôr thôngx ziv lok sâuv hâux lưv, choz cxuô sở, ngênhx thiêz Ủy ban huyện Mai Sơn fuô uô têx tsưr ziv phax tir thêir thiêz cxiv kho têx qơư trâus sâuk, kơưx lox nhoz jok Noong Sơn thiêz Cao Sơn, xã Chiềng Sung, huyện Mai Sơn. Cxuô sở, ngênhx cik txos tưz đros paz tsưr ziv chiê phax txar jav, cxiv kho têx tsi jông li heik sâuv, co zos nquôr suôz jêz, xi măng cxuz têx kror trâus sâuk, kơưx; đros qênhz shuôs, thoz huk cưx trâu chor đêx hâur ar ntưk; ntâuk grê, qênhz yuôx shuôs têx tsi jông; cxiv puôz njưk their ar, poz jêz...... Iz chas ntơư, tso tơưv cxuô faz tsưr ziv, tsênhv chei, hâux lưv seiz car chiê truôx tuk luz nênhx trâu pêx xênhv, huôv tsar uô nox uô hnar./.

Lê Hạnh-Riê Lâux cxeik nhênhv

VOVTB sik côngv đros tsêr cơưv cxênhx 2 Jean Piaget, quận Cầu Giấy, TP Hà Nội thiêz têx lênhx nênhs siêz jông muk seiz yuô, khơưk muôz huv trâu xã Chiềng nơi, huyện Mai Sơn, tỉnh Sơn La. Chiềng Nơi zos xã thax tsav 3 txov nhêv tiv zix, kuôk tsênhv qơư huyện Mai Sơn muôx muôs 100 cei cêr. Tas nro xã muôx 66% ziv chuôz zis p0luôk, phênhv ntâu zos cêr ar, zaoz thôngz lax muk lok, tsôngv box luz nênhx yuôr ntâu phêv liv. Tiv zix, no zos tiv phaz trâus ruôr hiêv hnhar tiv coz nas chuô số 2, đros 6 lênhx nênhs tuôs, 1 lênhx trâus saz hnhar; zuôr xar 70 luz tsêr trâus zênhr shar. Têx cêr muk txix xã txos 15 jêx jos muôx ntâu qơư tox poz lox, muk lok tsi tâu. Đoanx txưv zênhv tưz khơưk muôz 1,2 tênhr cxur, qav sor, têx chuôz zênhx zuôr trâus trâu 122 ziv chuôz zis nhoz jos Phiêng Khôm thiêz Nà Phặng- zos têx jos txov nhêv tiv zix hâur xã. Thôngx cxix, khơuk muôz tivi, meir tính, chuôz zênhx xênhz huôx đros 400 chêr trik yo sor trâu têx shux xênhz tsêr cơưv cxênhx 1 Chiềng Nơi./.

(Lê Hạnh-Txâur Vax cxeik nhênhv)

Txix hâur shôngk shông txos nhiv no, Cơ quan Cảnh sát qênhz yuôx tỉnh Yên Bái tưz xơưz xưv 11 txuz, 22 lênhx nênhs cik txos uô tuôr xuôv nhiêx txiêx têz qơưk, kinh tế thiêz têx tsi jông; hâur co muôx 8 txuz, 16 lênhx nênhs nziêk luôs lưv tus nhiêx nox, uô tuôr xuôv nhiêx txiêx. Trơưk li ntâuk grê, hâur ntu đhâu, Ban chox kriê phax tar uô tuôr xuôv nhiêx txiêx, têx tsi jông tỉnh Yên Bái tưz fuô uô jông trơưk T.Ư têx suô luk; hux jos truôx đros cxuô cơ quan muôx vax huôv chiê sir jos qênhz yuôx, qênhz shuôs thiêz ntêk cxov, tik cêr cxâuv cov txos qơư têx lênhx nênhs uô cxâuv cik txos hâux lưv qênhz yuôx, seiz kaz chor nênhs uô tuôr xuôv nhiêx txiêx, têx tsi jông. Cxuô taz viv muôx vax huôv cux tsi so qênhz shuôs thiêz đơưk tu têx txuz siz pênhr li uz li no. Đhâu qênhz yuôx, tưz heik cov sâu tsês 550 tsov đeiv trâu têz qơưk thiêz bluô  nhiêx tâu 2 tyv đeiv ntâu; tso tơưv 240 quyết định xưv bluô uô cxâuv hành chính, xav hur si tâu nhos 13 tyv đeiv..... Hâur ntu zuôr txos, iz chas tror uô jông luôs hâux lưv qênhz yuôx, qênhz shuôs hâur thax tsav; tỉnh Yên Bái sir jos sơưr tơưv txênhz, phax tir thêir têx tsi jông li heik sâuv thiêz tik cêr cxâuv cov txos qơư têx lênhx nênhs uô cxâuv./.

Đinh Tuấn-Riê Lâux cxeik, nhênhv