Nhiv kruôr đhâu, Đoanx côngz xưv TW Hội cxiz cơưv VN zos giáo sư, tiến sĩ Nguyễn Thị Doan, Chủ tịch Hội uô tsar đoanx, tưz khơưk muôz 200 phênhv huv trâu shux xênhz hla đhâu phêv liv sir jos cơưv ntơưr hênhr ntơưv Lai Châu. Phưv chủ tịch thường trực UB tỉnh Lai Châu, zơưv Tống Thanh Hải puz pâuz, tỉnh nhiv no muôx 236 cxênhz ntâu hội viên cxiz cơưv thiêz ntâu chuôz zis, xênhv nênhs tax bê “Chuôz zis gruôs cơưv ntơưr” thiêz “Xênhv nênhs gruôs cơưv ntơưr”. Zươv thix ziv TW Hội tror paz txưv huôv tsar trâur nuv “Tsôngv box gruôs cơưv ntơưr” thiêz “Tsênhv qơư cơưv ntơưr côngv thôngx”. Pos Nguyễn Thị Doan ntâuk grê siêz côngz xưv cxiz cơưv ntơưr Lai Châu thiêz xar njôngr tỉnh tror krêz đar trâur nuv jông hâur côngz xưv cxiz cơưv./.

(Khắc Kiên-Txâur Vax cxeik nhênhv)

Hnuz 26/3, Ủy ban tỉnh Lào Cai cơưv ntâuk grê luôs hâux lưv uô lơưr Ủy ban tsưr ziv sôr 102 lok chuôz tsar kinh tế shông 2025. Txos hnuz 25/3, tas nro 300 ntâu hâux lưv tưz tâu fuô uô, tax 100% tsưr ziv tso tơưv, taz sik tsuôk muôx zuôr xar 18% uô tâu têx hâux lưv zok muôz. Ngênhx dịch vụ uô tâu ntâu đuô hur si zos 42%, hok ngênhx Kôngz nuv mak uô tsi tâu iz zav hâux lưv tưs hlo. Zơưv Trịnh Xuân Trường, Bí thư Tỉnh ủy, Chủ tịch ủy ban tỉnh heik cxuô taz viv qênhz shuôs, đơưk tu têx phiv liv, uô tsi tâu tsi tiêr thiêz cxơưz sei six hơưv fuô uô chiê chuôz tsar 10% ntâu hâur shông 2025./.

Báo Lào Cai-Riê Lâux cxeik, nhênhv

Chiê gôngr phênhv lok hâur phongz yaox cxuôv tsêr lav uô, tsêr xơư nas, txix hâur shôngk shông 2025 ntâu “Trâur nuv hluôk nênhs txưv zênhv paz txưv cxuôv tsêr lav uô, tsêr xơư nas” tưz tâu yênhx lix ntơưv têx Huyện đoàn, thành đoàn thiêz đoàn xã, phường, thị trấn nhoz Yên Bái. Iz tuêv muôx tsơưs tiv zix 15 lênhx txưv zênhv viên, cxaz chuôz thâux chuôz zênhx, kho đuô thiêz cxiv tsêr nhoz yiêz. Têx luôk hâux lưv uô jông co tưz tâu heik kriê đêz đar sâuv têx trang thôngz xor mông, mạng xã hội. Bí thư tỉnh đoàn tỉnh Yên Bái, zơưv Hà Đức Hải puz pâuz, ntu zuôr txos, tỉnh đoàn zuôr tror sik côngv huiz tôngv pênhr jos thiêz phuôx huiz đoàn viên, hluôk nênhs li pưs txux, truôx siêz paz chuôz zis pluôk, chuôz zis chính sách muôx tsêr nhoz truôx jông thiêz taz por:

“Pêz chox kriê đoàn tiv phaz yênhx lix têx tuêv hluôk nênhs txưv zênhv. Đrâuv co hu grus pênhr jos, têx tuêv hluôk nênhs no zuôr paz tsôngv box cxiv uô tsêr yiêz lok sik kho đuô tsêr trâus puôk tsuôx. No chênhr zos hluôk nênhs li chinhz yênhx uô ntêx nyuôk, tso pov đhâu têx hâux lưv uô tsênhv tsênhz”./.

(Thừa Xuân-Txâur Vax cxeik nhênhv)

Sở Zoz zux Sơn La nhiv kruôr heik Ủy ban tỉnh tso tơưv tsưr ziv uô siv luôs hâux lưv kriê thiêz cơưv ntơưr 5 hnuz iz ciêz. Têx tsêr cơưv uô siv li heik sâuv tsuv muôx txâuk chuôz zênhx, qơư nhoz cơưv ntơưr, cưk kriê thiêz taz por tsơưr lươngv zoz zux. Tỉnh muôx 211 luz tsêr cơưv muôx txâuk cxuô zav chiê kriê thiêz cơưv txux chi li heik co, taz sik zuôr xeir 98 tsêr cơưv (hâur co 69 luz tsêr cơưv nhoz thax tsav zôngx ziv muk lol, hâur đrôngs thiêz 29 luz tsêr cơưv thax tsav txov nhêv) chiê uô siv. Chor tsêr cơưv zuôr kriê 2 jiês iz hnuz txix hnuz tiv 2 txos hnuz tiv 6, tsi tsênhr đhâu 7 tiết cơưv iz hnuz. Six hơưv fuô uô siv li heik sâuv njuôk xav qir txix hnuz xiêz 01/4/2025 txos tas shông cơưv 2024-2025./.

    Thu Thùy-Riê Lâux cxeik, nhênhv