Têx huôx tôngv chiv nhênhv 70 shông ntâuk zênhx Điện Biên Phuv xiêz (7/5/1954-7/5/2024) hnuz 13/5 zuôr txos, UB TWMTTQ VN zuôr tsưr tsix ntênhs phuôx tôngv tsaz yênhx paz txưv uô tsêr niêv côngv siêz trâu ziv chuôz zis pluôs tỉnh Điện Biên. Chiê ntênhs phuôx tôngv tsưr tsix yênhx côngz, tas cik hnuz đhâu ntơưv Hà Nội, UB TWMTTQVN đros Đảng ủy Khối doanh nghiệp TW tsưr tsix njiz doanh nghiệp, tsưr tsix cxênhz chuôz gôngr paz uô tsêr niêv côngv siêz trâu ziv chuôz zis pluôs tỉnh Điện Biên. Phưv chủ tịch UB TWMTTQ VN Hoàng Công Thủy puz pâuz: tsaz yênhx li qơư tsov txos zos chêx chôngk vênhv tôngv têx pênhr jos txix xã hội hâur ntu txix hnuz xiêz 7/5/2023 txos xiêz 7/5/2024 chiê paz uô 7 cxênhz txos 8 cxênhz luz tsêr niêv côngv siêz trâu ziv chuôz zis pluôs, zuôr xar pluôs hâur tỉnh Điện Biên thiêz thax tsav Tây Bắc. Hâur co, paz tỉnh Điện Biên 5 cxênhz luz, phênhv paz zos 50 tsov đeiv iz luz tsêr; tas nro nhiêx txiêx vênhv tôngv paz njuôs xav zos 350 txos 400 tỷ đeiv./.

(VOV-Txâur Vax cxeik nhênhv

         Muôx nhos 3 six zar hnuz kêix xiêz 7/5, iz lênhx nhuôs xênhz shông 2009, nhoz jok Trà, xã Điện Quan, huyện Bảo Yên, tỉnh Lào Cai đros 6 lênhx fôngx zưs muk đa đêx jê thax tsav tsêr meir tênhv tênhz Vĩnh Hà, xã Điện Quan tưz trâul pôngz đêx tuôs. Hu đros iz lênhx nênhs hlôngr njêx muôs Phongx Kôngz nuv huyện Bảo Yên thav, lênhx nênhs co heik pâuz: Đa thiêz uô luôv đêx nhoz têx thax tsav kaz njưs tar đêx lok six riêz nênhs. Viv ciês hâur cheix ntux kruôr, tsêr meir cux tso đêx chiê phuôx tênhv. Tâu pâuz, lênhx nhuôv co zos shux xênhz tsênhv cơưv ntơưr trâu tsêr cơưv cxênhx 2 hâur thax tsav./.

An Kiên-Riê Lâux cxeik nhênhv

        Chiz coaz muôx txơưx jênhv tỉnh Yên Bái nhiv kruôr tso tơưv Cuiz tênhv xưv phuôv uô cxâuv hành chính đros Phạm Duy Thành, xênhz shông 1992, nhoz tuêv 6, phường Trung Tâm, thị xã Nghĩa Lộ, tỉnh Yên Bái viv tsi muôx ntâuz ntơưr kinh doanh thiêz nhiês zuôr hax huv tsi txâuk tsơưr lươngv lok muôs, chor nhiêx txiêx trâus xưv bluô zos 22 tsov đeiv ntâu. Đhâu côngz xưv qênhz yuôx, pâuz tâu qênhx shênhx, lưx lươngv muôx txơưx jênhv pov qơư muôs tênhv tênhz Khanh Ngân, ntơưv tuêv 6, phường Trung Tâm, thị xã Nghĩa Lộ, tỉnh Yên Bái muôs tsi trơưk chei têx zênhz caz ntơưr điện tử tsi pâuz tsênhz qơư tsiv uô. Đhâu qênhz yuôx, Phạm Duy Thành zos tsưr qơư muôv muôs no tsi muôx ntơưr tso chei kinh doanh, tsi muôx ntơưr heik kriê hâur pâus hax huv zênhz điện tử. Tuêv côngz xưv tưz uô ntâuz ntơưr, choz trâu Cục seiz car niêv ciêz tỉnh Yên bái yưr lir trơưk cui tênhv./.

(TTTB-Txâur Vax cxeik nhênhv

       Hnuz xiêz 08/5, Cơ quan Cảnh sát qênhz yuôx, Công an tỉnh Sơn La tưz ntêk zơưv Lê Văn Kỳ, Phưv Giám đốc Sở Kôngz nuv thiêz huôv tsar tox siêz tỉnh Sơn La (kuz Chủ tịch Ủy ban huyện Bắc Yên, tỉnh Sơn La) thiêz ntêk zơưv Phạm Bình Minh, Giám đốc Chi nhánh Văn phòng uô ntâuz ntơưr sir zôngv ar huyện Mai Sơn (kuz Giám đốc Chi nhánh Văn phòng uô ntâuz ntơưr sir zôngv ar huyện Bắc Yên) thiêz Lò Văn Thành, kuz tsar phongx sêiz car tênhx qơư huyện Bắc Yên, viv liv zôngv têx hâux lưv uô chiê uô têx nuv tsi trơưk chei. Trơưk li Cơ quan qênhz yuôx, txix shông 2017, liv zôngv zuk hâux lưv uô, Lê Văn Kỳ, Phạm Bình Minh thiêz Lò Văn Thành tưz chox kriê, uô ntâuz ntơưr thiêz muôz ntơưr côngk nhav sir zôngv thax ar ntơưv jok I, thị trấn Bắc Yên, huyện Bắc Yên, tỉnh Sơn La txix têz qơưk têx ar chiê chox lok uô ar nhoz trâu chor nênhs cxênhz jê, luôs lưv tus tsi trơưk chei li Chei ar têz shông 2013 cui tinhv, uô tuôr xuôv nhiêx txiêx têz qơưk. Têx quyết tinhv xơưz xưv tưz tâu Viện Kiểm sát tỉnh Sơn La cir thiêz tâu uô lơưr chei têz qơưk cui tinhv. Nhiv no txuz nuv co tsênhv tror tâu qênhz yuôx chiê uô tsênhz mênhx./.

VOVTB-Riê Lâux cxeik nhênhv