Xor mông txix Ban Sêiz car Qơư Kinh têr tỉnh Lào Cai puz pâuz, muk lok đhâu ntơưv trôngx đriv Kim Thành (thành phố Lào Cai) tsênhv tâu uô truôx jông jux juk. Nhiv no, xav iz hnuz muôx nhos 300 luz yêz thâux hax huv muk lok đhâu ntơưv no, hâur co, chor hax huv zuôr saz đrâuv têz qơưk lok, muôs tơưv saz đrâuv têz qơưk tâu tuôr truôx jông. Ciês hax huv muôs tơưv saz đrâuv têz qơưk, xar muôx 70-80% zos hax huv kôngz nuv, têx txir ntông. Nhiv no, tsênhv txos chêix txir lưv tsiz lox lok zos txir vải, chiê paz zôngx ziv trâu chor txir vải no tâu thâux txix Hải Dương, Bắc Giang tuôx muôs tơưv đhâu trâu saz đrâuv têz qơưk, cơ quan muôx vax huôv ntơưv trôngx đriv Kim Thành tưz bax jông qơư nhoz đrêk trâu chor yêz; sir jos uô ntâuz ntơưr nzor đuô muôx 30 phênhz pir li six hơưv kriz trôngx đriv chiê tas nro chor txir vải no tâu muôs muk đhâu trôngx đriv thâuv zar têis cik. Txix hâur chiv txos nhiv no, tưz muôx 7.000 ntâu tấn txir vải tâu muôs tơưv saz đrâuv têz qơưk đhâu ntơưv Lào Cai. Njuôk xav zuôr tror chuôz ndê, tiv zix zos txox thâuv ndax chiv txix 10/6 truz ntêr txos muôx 20 hnuz./.

                                                              An Kiên-Lik Thox cxêik nhênhv

Hâur thax tsav tỉnh Lai Châu, luôs hâux lưv tu zus mur zuôr jiz tsênhv yênhx ntâu qơư thiêz pêx xênhv hâur tỉnh li tsưr ziv huôv tsar kinh tế. Hâur HĐND tỉnh Lai Châu Nghị quyết sôr 07 hnuz 22/3/2021, cui tinhv tsênhv chei huôv tsar uô ntâu kôngz chiê muôs ntu 2021-2025 tưz muôx nzir tsênhv njiêz paz max lok sâuv tu zus mur. Co zos tsưr ziv chiê chor huyện, TP cxiz yênhx lix, hu zâuv têx HTX yưv pênhr, sik côngv têk uô, sâu zuôr têx jiz mur; đros hâu nov ntơưv qơư cxiv tsa yênhx côngz tsaz yênhx “iz xã iz xiv huv”. Nzaz nzơưv têx muôx jông ntơưv qơư đros trâu tỉnh paz max, nhiv no tsôngv pêx xênhv hâur thax tsav tỉnh tưz huôv tsar zus tâu xar muôx 10 cxênhz xuz mur, gra lok phênhv sâu tâu siêz./.

                                                                            DTPT-Riê Lâux cxeik nhênhv

Txix hnuz 2/6 txos nhiv no, sâuv thax tsav tỉnh Sơn La muôx ntâu coz nas chuô lox, uô iz lênhx nênhs tuôs, zuôr xar 150 luz tsêr trâus za trur, xar muôx 60 héc ta tsoz chos trâus hiêv… njuôk xav trâus hiêv tas muôx 2,2 tiv đêiv ntâu. Ntux nas lox uô muôx đêx huôv lox nhoz têx cưx đêx, cưx ha, ar poz sâuv têx qơư nxaz tox thiêz đêx ngaz ntơưv têx qơư pêx xênhv nhoz, têx qơư kik ntơưv iz cxiê thax tsav qơư li: Mường La, Thuận Châu, Quỳnh Nhai… Ban Sêiz car phax tar ntux têz ruôr hiêv thiêz zok nriêr chơưv paz cxuô thax tsav qơư tưz huiz tôngv pênhr jos, cxuô zav chiê khưx phưx têx trâus hiêv, paz trâu pêx xênhv tror truôx tuk luz nênhx. Lơưr Tsênhv qơư njuôk ntux yar ntux nas, txix hnuz 5/6, thax tsav Tây Bắc bôv zuôr tror muôx ntux lok nas thiêz chuô, têx qơư lok nas lox. Hâur têx coz nas chuô zôngx ziv muôx yưv chuô lox, xoz tuô, lok lơưs. Sơưr đơưk tsuv sêiz shuôk jông, kriz uô têx tsưr ziv chiê phax tar, txo grêk tsơưs tiv zix têx trâus hiêv./.

Lê Hạnh-Lik Thox cxêik nhênhv

Hnuz xiêz 05/6, Cơ quan Cảnh sát qênhz yuôx (PC03) Công an tỉnh Sơn La tưz tso tơưv Quyết tinhv xơưz xưv, ntêk zơưv Đào Hữu Bính, xênhz shông 1986, Phưv giám đốc Tsênhv qơư nhênhz chơưv khoa học thiêz chuyển giao công nghệ, Tsêr cơưv Đại học Tây Bắc lok sâuv liv zôngv zuk li hâux lưv uô tuôr xuôv têz qơưs têx nhiêx txiêx. Đhâu qênhz yuôx tso pov, shông 2022, Ủy ban huyện Quỳnh Nhai (Sơn La) tưz tso tơưv quyết tinhv cir thiêz choz hâux lưv trâu Phongx Lox tôngv saz pênhz xã hội huyện Quỳnh Nhai kriz lớp kriê cơưv uô hâux lưv trâu lox tôngv tox siêz txix 3 luz hlik, xav hur si chor nhiêx uô luôs hâux lưv co zos 3 tyv 267 tsov đeiv. Phongx lox tôngv saz pênhz xã hội tưz cir hux thôngx đros Tsênhv qơư nhênhz chơưv khoa học thiêz chuyển giao công nghệ (Tsêr cơưv Đại học Tây Bắc) chiê krêz 25 lớp kriê cơưv tsưr ziv tsêz chos kôngz trâu 860 lênhx. Đào Hữu Bính tưz liv zôngv zuk li hâux lưv uô chiê uô chuôr têx ntâuz ntơưr thêv nhiêx côngk kriê, nhiêx muk lol, nhiêx nox nhoz trâu chor cưk kriê. Xav chor nhiêx uô chuôr ntâuz ntơưr co tas zuôr xar 2 tyv đeiv, Đào Hữu Bính tưz muôz chor nhiêx no zôngv thiêz uô ntâu zav nuv txơưr tsi trơưk cui tinhv. Nhiv no txuz nuv co tsênhv tror tâu qênhz yuôx, uô tsênhz mênhx./.

                                                                                  CTV-Riê Lâux cxeik nhênhv