Đros kror hâux lưv iz cxiê lênhx nênhs tsik jông siêz ruôr hiêv txos UBND tỉnh Bình Thuận, chôngz nênhs nhoz Sơn La puôr lênhx hêik tsik thôngx ziv đros chor nênhs no têx kror uô co. Cử tri Hà Duy Thành, phường Chiềng An, thành phố Sơn La hêik:

“Trơưk cur mak têx kror nhiv kruôr muôx ntơưv tỉnh Bình Thuận zos têx kror tsik jông, uô muôx yưv tsik ngaz tuk chính trị thiêz tsik ngaz tuk xar hôiv. Pêx xênhv zuôr hêik tơưv tâu zuk siêz xar thiêz zuk têx ziv chênhv trâu Côx hôiv lok têx hâux lưv mak Côx hôiv tsênhv sêiz lax, taz sik têx kror uô li hêik co mak tsik zos nhiêv têz qơưk tsuv tâu xưv bluô cov huv đros trơưk cêr chêi têz qơưk”./.

                                                                                    (Trấn Long-Lik Thox cxêik nhênhv)

Tsôngv box tỉnh Lào Cai cux tsi thôngx ziv đros paz lênhx nênhs uô nxor loanv, sik zâuv mul tsôngv chuôz zênhx ntơưv UB tỉnh Bình Thuận. Niêv lâuk Trần Diệu Thủy, Phường Pom Hán, TP Lào Cai puz pâuz:

“ Lơưr cur, hâux lưv tsôngv box tsov cưv thiêz heik tơưv siêz xar đhâu têx vênhv thix lox côx hôiv heik tơưv chiê sik seiz lax tso pov tsôngv box jênhv pâuz tsênhz mênhx tsôngv box li txơưx jênhv đros têz qơưk, mênhx cxưx li huôv tsar. Taz sik tsưr ziv uô mak tsuv uô li chas cov huv đros, muôx chêx cuk, tsi zos uô nxor loanv tsi taz por txiv ngaz, viv têx huôx tôngv co tso pov txơưv tiêk nhiêv têz nhiêv qơư taz sik zôngx ziv trâus nênhs fêv liv zôngv chiê uô trâu qênhx shênhx ziv tsi jông” ./.

(An Kiên- Txâur Vax cxeik nhênhv)

Nhoz luz tsêr têz thax tsav ndêx đriv têz 65 ntus đriv Việt- Lào, jos Huổi Hịa, jos Hua Mức, huyện Mường Mày, tỉnh Phong Sa Ly, têz qơưk Lào buôk thax tsav ntus đriv huyện Nậm Pồ ( tỉnh Điện Biên), Bộ đội pênhz phax tỉnh Điện Biên nhiv kruôr sik côngv ntês tâu 3 lênhx nênhs Lào tsênhv muôv muôs zax zênhz. Chuôz zênhx sâu tâu muôx 10 đeiv zênhz đơưz, 31 cxênhz njiêr zax zênhz cxuô zav, 2 cir zax zênhz đuz, 4 traz fov, 2 luz điện thoại di động, 5 tsov nhiêx Việt Nân, 390 cxênhz nhiêx Lào thiêz iz cxiê chuôz zênhx muôx lênhx coaz. Têx lênhx nênhs co zos: Thào Sươi xênhz shông 1964, Nang Mui xênhz shông 1988, Nang Dên xênhz shông 1996, nhoz jos Huổi Hịa, huyện Mường Mày, tỉnh Phong Sa Ly, Lào. Têx trinh sát pênhz phax puz pâuz, 3 lênhx nênhs no puôr lênhx zos têx lênhx nênhs sơưr thơưx muôv muôs zax zênhz, tsuôk muôs chor zax zênhz ntâu, thâuv muôs puôr lênhx gra lơưr vưv qiv chiê tir tar lưx lươngv muôx txơưx jênhv. Nhiv no, têx lênhx nênhs no thiêz chuôz zênhx sâu tâu tưz tâu Bộ đội pênhz phax tỉnh Điện Biên choz trâu Bộ chỉ huiz txiv ngaz tỉnh Phong Sa Ly Lào chiê yưr lir lơưr cui tênhv./.

( Vũ Lợi- Txâur Vax cxeik nhênhv)

Txir tuôz ziz hloz lox thiêz huôv tsar jông ntơưv têx qơư nhoz siêz txix 800-1.700 thiêr. Yên Bái zos tỉnh muôx ntâu txir tuôz ziz, tsơưr lươngv txir kaz tiv zix hâur chor tỉnh tox siêz faz Bắc. gri muôs txir tuôz ziz txix 20.000-30.000 đêiv iz cir, ntâu shông 40.000-50.000 đêiv iz cir. Txir tuôz ziz tsênhv paz muôx tâu phênhv siêz thiêz truôx trâu pêx xênhv tox siêz. Viv li, tỉnh Yên Bái tsênhv huôv tsar hênhr tsoz txir tuôz ziz ntơưv chor huyện tox siêz, hâur co muôx iz cxiê zav txir tuôz ziz jông tưz tâu xêir tsov. Txix shông 2016 txos nhiv no Yên Bái chos yiêz tâu xar muôx 2.250 ha txir tuôz ziz, tas nro thax tsav ndê muôx 5.640 ha tsêx trung ntơưv oz huyện Mù Cang Chải thiêz Trạm Tấu thiêz iz cxiê xar tox siêz huyện Văn Chấn. sir jos txos shông 2020 tỉnh Yên Bái muôx thax tsav chos txir tuôz ziz zos 10.000 ha, txix 500-600 tsoz iz ha, sâu tâu 10-15 tấn iz ha, tas nro sâu tâu txix 20.000-25.000 tấn iz shông./.

(KT-Lik Thox cxêik nhênhv)