Thủ tướng Chính phuv nhiv kruôr tso tơưv Cuiz tênhv số 79/QĐ-TTg, thôngz đhâu đề án ngaz tul tsôngv box, huôv tsar KTXH, taz por côx phax txiv ngaz huyện Mường Nhé, tỉnh Điện Biên. Qơư tsov txos zos ngaz tul luz nênhx trâu 12 cxênhz ntâu ziv chuôz zis đros 68 cxênhz ntâu lênhx nênhs. Đhâu 8 shông krêz uô đề án tsôngv box tưz tsi tsir têz tsir qơư thiêz luz nênhx jux jus ngaz tul đuô.

Zơưv Jêz Xênhv Thox, Qênhx chủ tịch UB huyện Mường Nhé puz pâuz: Chiê tsôngv box nhoz truôx têz truôx qơư, Ban chox kriê tưz đros têx tsưr yưv pênhr seiz shuôk thax tsav qơư, chiê tsôngv box ngaz tul luz nênhx. Txos nhiv no, tưz muôx 1 cxênhz 16 ziv sâuv 1 cxênhz 79 ziv muôx qơư nhoz truôx, tax 94% ntâu pir đros tsưr ziv tso tơưv; tas nro mênhv chêx ar trâus sâu tsês zos 1 cxênhz 343 hecta, ar nhoz trâu 634 chuôz zis mênhv chêx đar 107 hecta; ar uô kôngz zos 1 cxênhz 236 hecta trâu 528 chuôz zis. Tiv zix, tưz txar têx chuôz zis nhoz tox siêz, thax tsav txov nhêv thiêz iz cxiê chuôz zis nhoz buôk har jôngr phax phưv lok sik đros nhoz chêx chôngk ngaz tul./.

VOV4-Txâur Vax cxeik nhênhv

Nas hmo hnuz 13/1,  ntơưv cxuô tỉnh faz Bắc li: Lào Cai, Yên Bái, Điện Biên, Lai Châu, Sơn La tưz yar ntux tror sor  so,ótik yuô no njiv li têx hnuz đhâu uô ntêx. Ntơưv tỉnh Lai Châu, đhâu oz hnuz shuv xênhz so ntơưr, tiv ntux no njiv hênhr, taz sik nas hmo 13/1, ntux ho tror sor so, tsik yuô no njiv, Lai Châu tưz muôx 133 luz yar cơưv tror tso shuv xênhz tuôx cơưv ntơưr, tsuôk yuôr 123 luz yar cơưv tsênhv six tso shuv xênhz so ntơưr, phênhv ntâu zos nhoz trâu cxuô huyện li: Sìn Hồ, Nậm Nhùn, Mường Tè, Phong Thổ thiêz đrôngl Lai Châu. Ntơưv tỉnh Sơn La, zơưv Cầm Văn An, Phưv Giám đốc Sở zoz zux tỉnh Sơn La hêik pâuz: Têis cik hnuz 13/1, 100% luz yar cơưv tưz tror tso shuv xênhz tuôx trâu cxuô luz yar cơưv: (Hâur têx hnuz tso shuv xênhz so ntơưr, cxuô luz yar cơưv cux tror kriê cơưv cxaz nzir cov huv đros. Viv shông no shuv xênhz so ntâu joês, taz sik hauar six hơưv hnuz nhôngs kriê cơưv nzir mak nzênhx zoz zux cux uô tâu truôx)./.

Tsu cxêik nhênhv-VOV TB - Hạnh BT

Chuôz zis tix lâuk Vix Xênhv Lik nhoz jos Tư Sáng, xã Pá Long, huyện Thuận Châu, tỉnh Sơn La zos iz hâur têx chuôz zis tu zus nhux đas sha nhuôs thiêz zuôr greix cxôngx ntâu shông no đros yênhx châuv tul nhux. Khov sir jos uô têx tsưr ziv phax tar moz thiêz no trâu nhux, ntâu shông no, chuôz zis paz nhux hloz lox jông, tsi trâus tuôs no. Shông tưs cxôngx hâux lưv muôs nhux tix lâuk chuôz zis sâu tâu yênhx châuv tsov đeiv. Pheiz kênh chênhz zênhv por vêv thiêz tsoz phưz nhux hâur cheix ntux no, tix lâuk Vix puz pâuz: Thâuv qiv hơưv qir no tix lâuk lơưr nhux lok cơư, their guôx cov jông. Têx hnuz ntux no ziv tsuv zôngv hnhaz tax, pav hnhar trâu nhux cov sor; trâur tơưs trâu nhux ntê. Tix lâuk chuôz zis cux cxênhx tsês jâuz tâux, hnhaz blês, bax krâur trâu nhux nox hâur têx hnuz ntux no, thôngx cxix đo cuô njêr cxâuk nhux chiê chuôz cxaz đas jos trâu nhux./.

(Lik Thox- Txâur Vax cxeik nhênhv)

Công an tỉnh Sơn La nhiv kruôr đros Công an huyện Sông Mã ntêk cxov tâu oz lênhx nênhs thâux fov ntơưr muôs tsik trơưk chêi. Oz lênhx nênhs ntơư zos  Lò Quang Tùng, xênhz shông 2003, nhoz xã Mường Hung, huyện Sông Mã thiêz Quàng Văn Hùng, xênhz shông 1997,  nhoz xã Chiềng Khương, huyện Sông Mã. Ntơư zos qênhz yuox, yơưz phơưz tâu 9 far fov ntơưr zos zav 36 đros trâu iz hnaz fov ntơưr bi hnhar muôx 13 cir.

        Nhiv no, cơ quan muôx vax huov tsênhv taz tov uô ntauz ntơưr cov tsênhz mênhx chiê muôz oz lênhx nenhs fêv hêik sâu bluô nhiêx thiêz tik cêr cxâuv cov zos đrêiv chêi têz qơưs tso tơưv./.

Tsu cxêik nhênhv-CTV - Hạnh BT