3 lênhx nênhs F1 nhoz TP Sơn La tưz tâu muôz nyar njuôs siv caz moz jiês 2 thiêz tso chêx cuk zos tsi muôx caz moz SARS covi 2. Li tưz tso mông uô ntêx hnuz 30/7 3 lênhx nênhs hâur iz chuôz zis no nhoz tuêv 3, phường Tô Hiệu, TP Sơn La, tỉnh Sơn La tâu xav tênhv zos F1 thâuv đros nênhs moz Covid-19 muk uô cê luz yêz za VJ 770. Ciês thâuv xav tênhv xor mông, tas nro 3 lênhx nênhs no tưz tâu cêv kuôk ntơưv Trung đoàn 754 chiê seiz njuôs đas jos, njuôs siv caz moz. Têx lênhx nênhs nhoz jê 3 lênhx nênhs F1 no cux tưz tâu heik kriê tsưr ziv cêv kuôk, seiz njuôs đas jos hâur tsêr./.

(Trấn Long-Txâur Vax cxeik nhênhv)

Tiv ntux nas lox lok trâu cxuô thax tsav qơư pêv hâur đêx tus đêx Chảy, uô trâu đêx nas ntưk lol ntâu trâu hâur pak đêx, uô đêx pur siêz, viv li tsêr meir tênhv tênhz Bắc Hà, tỉnh Lào Cai tưz heik, tsuv tâu tso iz đraz têx đêx hâur co muk. Đhâu qơư qênhz njuôk shuôs têx đêx nas xã Long Phúc, huyện Bảo Yên, đhâu thâuv tsêr meir tênhv tênhz Bắc Hà tso đêx, sâuv tus đêx Chảy nhoz Bảo Yên zuôr huôv lok six lox.

Tas cik hnuz 13/8, têx đêx hâur tus đêx Chảy tưz pur siêz tuôx muôx 69 thiêr. Nhiv no, têx đêx hâur tus đêx co cux tsênhv tror huôv lok six lox thiêz zuôr tror pur siêz nzir đuô zos pêv hâur đêx cux tsênhv six lok nas tsi tu./.

(An Kiên-Riê Lâux cxeik, nhênhv)

Tsêr kho moz đa khoa tỉnh Sơn La nhiv kruôr fuô yênhx côngz trưx hlưz hâu trâu nênhs moz Cà Thị X muôx 52 shông, mênhx cxưx Thái nhoz jos Lầu, xã Mường Lầm, huyện Sông Mã. Nênhs moz tuôx chơưv kho thâuv pov moz tâuz hâu zov chênhr thiêz iz saz chêr pov tsi yuô muôx zos. Zos tsês ntêr, trưx huôv lox tuôx uô zênhr shar txos hlưz hâu mak nênhs moz zuôr trâus tuôs iz saz chêr, lôngx lok sik tuôs. Ntơưv tsêr kho moz, têx bác sỹ seiz njuôs thiêz pov nênhs moz trâus moz trưx hlưz hâu lox. Xav tênhv no zos zav moz lax fuô, tsuv lok six txơưx thiêz fênhx yax mak tsuôk tâu fuô ntơưv têx tsêr kho moz Trung ương đros têx chuôz zênhx yiêz. Thâuv heik trâu chuôz zis nênhs moz lok têx hâux lưv njuôs xav muôx yưv thâuv fuô moz thiêz sik seiz lax, têx bác sỹ tsêr kho moz đa khoa tỉnh Sơn La tưz cuiz tênhv fuô moz ntơuv tsêr kho moz. Đhâu zuôr xar 4 six hơưv fuô moz, tas nro luz trưx hlưz hâu tâu txiêr por tsês. Nhiv no nênhs moz tsênhv tâu tsoz phưz tsov cưv ntơưv qơư tsov cưv đhâu thâuv fuô moz./.

(Thanh Thủy- Txâur Vax cxeik nhênhv)

Cơ quan Cảnh sát qênhz yuôx, Công an huyện điện Biên đông, tỉnh Điện Biên tsênhv zênhx max uô tsênhz mênhx txuz iz lênhx pox niêv trâul nênhs fêv zuôv uô đaz uô tuôs, hâur thax tsav jok Har Trơưv, xã Phiz Nhưx. 2 lênhx txir nênhx ntơư tưz trâul hu tuôx trâu ntơưv cơ quan Công an.

Trơưk li mông txix Công an huyện Điện Biên đông, thâuv 12 six iz tak hmo hnuz 13/8, niêv lâuk L.T.M, xênhz zus shông 1997, tsênhv pư đros 2 lênhx nhuôs ntơưv tsêr, nhoz jok Har Trơưv, txơưv  muôx 2 lênhx nênhs tsi pâuz bê kriz kror trôngx lok hâur tsêr, sik hlôngr njo zuôv niêv lâuk uô đaz uô tuôs. Txos thâuv 3 six sơưr nzor, zuôr pov cêr ntơư, 2 lênhx nênhs co txơưv tơưv khiêr đhâu niêv lâuk tsêr muk lơưv. Đhâu hlo thâuv muôx têx li heik sâuv, niêv lâuk L.T.M tưz heik trâu cơ quan Công an huyện Điện Biên Đông đros công an xã Phiz Nhưx hu têx lênhx nênhs fêv tuôx lênhk nhav zuk têx cêr cxâuv.

Ntơưv cơ quan cảnh sát qênhz yuôx, 2 lênhx nênhs ntơư krêz lênhk zos: Chầu Xênhv Hơưx, xênhz zus 1998, thiêz Lái Xênhv Hơưx, xênhz zus shông 1998, puôr lênhx nhoz uô cê ntơưv jok Har Trơưv, xã Phiz Nhưx, huyện điện Biên đông. Chầu thiêz Lái gơưk tưz lênhk nhav tas nro zuk cêr cxâuv trâu cơ quan công an. Nhiv no cơ cảnh sát tsênhv tror qênhz yuôx, uô tsênhz mênhx chiê muôz 2 lênhx nênhs ntơư tik cêr cxâuv trơưk li chei têz qơưk cui tinhv./.

 (Vũ Lợi-Riê Lâux cxeik, nhênhv)