Tiv têx chuô thiêz đêx nas uô hiêv txos, hâur 2 hnuz đhâu, ntơưv thax tsav tỉnh Sơn La muôx ntux nas lox, uô ntâu txox cêr trâul xưz poz, cxuz tas ntâu ntu cêr muk lol nhoz têx thax tsav li: Xã Mường Lầm, huyện Sông Mã, tỉnh Sơn La; jok Mỡ, xã Co Mạ, huyện Thuận Châu , tỉnh Sơn La. Sở zoz thôngz tỉnh Sơn La tưz zênhx max heik, hu têx meir, lênhx nênhs đros thoz huk, kho têx ntu cêr trâul tox xưz poz cxuz co thiêz txos iz jiês no mak têx yêz tưz muk lol tâu thôngz.

Nhiv no, hâur thax tsav huyện Sông Mã thiêz ntâu suôv qơư hâur Sơn La li: Thuận Châu, Mai Sơn, TP Sơn La….. ntux cux tsênhv six lok nas lox; đros trâu têx coz nas lok ntêr hâur têx hnuz đhâu ntơư, uô kror cxiê qơư kror tưs cux muôx đêx, cxênhv đêx tas, zôngx ziv uô tox xưz poz nhoz têx cưx đês cưx ha toz, qơư nxaz thiêz đêx nas ngaz hâur thax tsav đrôngs lox thâuv ntux nas hloz. Lưv lươngv muôx vax huôv heik trâu têx lênhx tsar yêz muk lol tâus cêr sâuv cxuô txox cêr tsuv chênhr phax, tiz jông seiz shuôs, tsi muk đhâu thâuv pov đêx ngaz lox, lok sik tov hâur ntêx muôx ar, poz jêz pôngz…chiê taz por truôx tuk./.

 (Thu Thuỳ-Riê Lâux cxeik, nhênhv)

Ntơưv thax tsav niêv cêr 4D kuz, nhoz thax tsav jos Sùng Chô, xã Sùng Phài, TP Lai châu (tỉnh Lai Châu) nhiv kruôr muôx pov ar jơưx uô ntâu ziv chuôz zis tsuv txar muk qơư nhoz taz por thâuv hmo ntux.

Ar jơưx uô poz cêr 4D kuz, ntêr muôx nhos 10 yiv, đar 4 yiv ntâu, toz muôx nhos 5 yiv. Ar jơưx tưz uô vâu 1 tsoz ntông thiêz 1 tul ndêx tênhv, uô ntâu ziv chuôz zis sâuv thax tsav tsi muôx tênhv tênhz zôngv; ntâu chuôz zis pov nja tsêr trâus tơưs caz plêz; muôx 2 luz tsêr trâus keix, puôk tsuôx hnhar. Tsôngv box nhoz uô nênhx iz buôk ndis puz pâuz, thâuv ar jơưx poz, tsôngv box tsênhv pư tsâus jos. Thâuv pov ar jơưx tưz ciêr chênhr khiêr chiê taz por, sâuv thax tsav muôx ntux lok nas, ar, poz jêz tsênhv tror jơưx thiêz poz toz, uô tsôgnv box njiz ntâu phêv liv hâur côngz xưv khưx phưx./.

(Khắc Kiên-Txâur Vax cxeik nhênhv)

Đoanx côngz xưv lênhx ngênhx zos Công an TP Sơn La, Công an phường Chiềng Sinh, (TP Sơn La) thiêz Phongx Cảnh sát phax cuz tuô cuz thiêz chơưv paz lênhx nênhs (công an tỉnh Sơn La) nhiv kruôr qênhz yuôx shuôs têx zuôr trâul txos lok sâuv phax cuz tuô cuz thiêz chơưv paz lênhx nênhs đros thiêz qơư trâu têx gas, trox LPG, ntơưv qơư muôs huv Đạt Phong, nhoz jok 1, phường Chiềng Sinh, TP Sơn La.

 Qơư muôs chor huv heik co tsuôk ntiv tâu nhos iz cxênhz cir. Taz sik thâuv six hơưv đoanx côngz xưv tuôx qênhz yuôx, hâur qơư co tưz muôx lok six ntâu têx thôngz gas tsi trơưk cui tinhv. Đhâu qênhz yuôx, đoanx côngz xưv tưz uô ntơưr bluô, heik qơư co njêis yêv zênhx max iz cxiê thôngz gas muk tso trâu lưv kror qơư tâu chei por hưv trơưk li cui tênhv chiê txo grêk têx tsi jông zôngx ziv muôx yưv. Thiêz ciês hâur hnuz 17/8, tsưr qơư co tsuv muôx njêx muôs ntơưv Phongx Cảnh sát phax cuz tuô cuz thiêz chơưv paz lênhx nênhs Công an tỉnh Sơn La chiê uô tsênhz mênhx têx li heik sâuv./.

(Trấn Long-Riê Lâux cxeik, nhênhv)

Công an thành phố Lào Cai sik côngv đros iz cxiê lưx lươngv muôx lênhx coaz nhiv kruôr tsưr tsix qênhz yuôx iz qơư tso hax huv sâuv cêr Điện Biên, phường Cốc Lếu, thành phố Lào Cai, tỉnh Lào Cai, pov chor hax huv zos khâu trâu tsi pâuz tsênhz hâur pâus. Qơư tso hax huv nhoz số 053, cêr Điện Biên, đar muôx nhos 600 yiv ndis, zos Ngân Thị Nguyệt Hà (xênhz shông 1993, nhoz tsêr số 002, cêr Vạn Hoa, phường Kim Tân, TP Lào Cai) uô tsưr. Thâuv qênhz yuôx, tsưr tso hax huv tsi muôx ntâuz ntơưr côngz jênhv hâur pâus hax huv. Viv chor hax huv no ntâu, ndê txos yênhx cxênhz gơưv, viv li six hơưv qênhz yuôx txos nhiv no tsênhv tror tâu uô. Hâux lưv no tsênhv tror qênhz yuôx uô cov tsênhz mênhx./.

(VOV-Txâur Vax cxeik nhênhv)